Газаахи температурын 8 градусһаа дээшээ болоходо, тойрогой котельнинүүд түлигдэхэеэ болидог юм. Энэ болбол ерэхэ намар болотор котельнинүүдэй соргоһоо хара утаан бушхахаа болибо. Үнгэрэгшэ үбэл дулаан байжа, дулаасуулгын хаһа онсо байдалгүйгөөр үнгэрөө. Тойрогой гэр байрын ба коммунальна ажахын мэргэжэлтэдэй тайлбарилһаар, дулаан үбэл байжа, котельнинүүд ехэ һаатангүй хүдэлөө. Байшангууд дулаагаар таһалгаряагүй хангагдаһан байна. Тосхоной ба хүдөө нютагуудай котельнинүүдтэ хоёр долоон хоногто хүрэхэ шулуун нүүрһэн буулгаатай байгаа бшуу. Үнгэрэгшэ үбэл тойрог дотор 114 котельни ашаглагдаа, тэдэнэй 41-иинь Могойтын аймагта тоологдоно. Тиихэдэ дулаагаар хангадаг 17 эмхи бии. Юһэарбан һарын хугасаада үргэлжэлдэг дулаасуулгын хаһада тойрогой котельнинүүд дунда зэргээр 100 мянган тонно түлишэ галдадаг. Агын аймаг эгээл ехэ - 33 мянган тонно түлишэ ашаглана. Удаань Ага тосхон – 30 мянган тонно. Майн 10-ай байдалаар, тойрогой котельнинүүдтэ гурба мянга гаран тонно түлишэ хадагалаатай, энэ хадаа 19 хоногто хүрэхэ нүүрһэн болоно. Онсо байдал ехэ гараагүй.
Дулаасуулгын хаһын түгэсэхэдэ, заһабарилгын хүдэлмэринүүдэй хэмжээнүүд, түсэбүүд тодорхойлогдодог юм. Котельнинүүдтэ июль, август һарануудта заһабарилганууд эхилдэг гуримтай. Заһабарилгын хүдэлмэринүүдые саг соонь эхилхэдэ, амар байдаг гээшэ. Мүнгэнһөө дулдыдаха. Үнгэрэгшэ жэл хизаарай бюджедһээ һомологдохо мүнгэн хожомдожо ороо һэн. Заһабарилгын хүдэлмэринүүдэй урда тээ подрядна эмхинүүдтэ түрүүн иимэ ажалай байһые соносхоод, удаань аукцион үнгэргэдэг юм. Үнгэрэгшэ жэл Шэтын «ЗабТЭК» гэһэн нээмэл эмхиин барилгашад аукциондо хабаадажа, хоёр Орловскнуудай котельнинүүдэй хуушарһан теплосетьнүүдые һэлгүүлээ һэн.
Үнгэрэгшэ үбэл дулаагаар хангагдаһанай үри шэриеэ түлөөдүй ажаһуугшад болон шэнгэн түлишэ ашаглаһанай түлөө мүнгэеэ бусаагаагүй эмхинүүд бии. Коммунальна хангалтануудай дебиторско үри шэри бусааха ажал хэгдэдэг. Мүнөөдэрэй байдалаар, тойрогоор хараад үзэбэл, 85,5 гаран сая түхэригэй үри шэри тоологдоно. Эндэ шэнгэн түлишын, налогой, зайн галай, салин түлэлгын г.м. үри шэринүүд угаа ехэ. Агын аймагай ажаһуугшад дулаагаар хангагдаһанай түлөө Амидхаашын «Луч», Орловскын «Шанс» нээмэл бүлгэмүүдтэ үритэй. Дулдаргын аймагай ажаһуугшад «Саханай» нээмэл бүлгэмдэ үритэй. Мүнөө жэл хүдөө нютагууд Түгнын, Хара-Нуурай, Уртын г.м. шулуун нүүрһэнэй уурхайнуудһаа түлишөөр хангагдаһан байна. Дулаан үбэл боложо, олон котельнинүүдтэ түлишын нөөсэ хадагалагдаһан гээшэ. «Агауглесбыт» гэhэн гүрэнэй унитарна эмхиин бааза дээрэ түхэреэн жэл хүдэлмэринүүд тогтонгүй ябуулагдадаг гуримтай. Мүнөө хабарай сагта түмэр харгыгаар асарагдаhан шулуун нүүрhэ буулгаха, шэрэхэ, ашаха хүдэлмэринүүд хэгдэнэ. Хэлсээнэй ёhоор, Могойтын, Агын аймагуудай, Ага тосхоной эмхи зургаанууд, муниципальна байгуулалтанууд техникэтэеэ ерэжэ, нүүрhэ абаашадаг гээшэ. «Агауглесбыт» гэhэн гүрэнэй унитарна эмхиин бааза дээрэ 349,98 тонно нүүрhэн хадагалаатай. Хизаарай ЖКХ-гай, энергетикын ба хэлхеэ холбооной яаманай мэдээсэһээр, Могойтын ба Краснокаменскын аймагууд дулаасуулгын хаһаяа хараалагдаһан болзорһоо урид дүүргэһэн байна.
