Буряад хэлэнэй һара эрдэмэй-практическа хуралдаанаар түгэсэбэ. Эхэ хүнэй энэрхы, уян сэдьхэлтэй, үхибүүнэй нарай нялха наһанда эмэй ехэ эм болодог эжын һүн далайтай сасуулагдадаг буряад хэлэнэймнай хүгжэхын тула энэ хэмжээ ябуулга эмхидхэгдэдэг гээшэ. Уран зохёолшод Чимит-Рэгзэн Намжиловай түрэһѳѳр 90, Дондок-Ринчин Намжилоной түрэһѳѳр 125 жэлнүүдэй ойнуудта зорюулагдаһан «Буряад хэлэн: түүхэ ба хүгжэлтэ» гэһэн энэ хуралдаан Дулдаргын аймагай Үзѳѳн нютагай дунда һургуулида октябриин 28-да үргэн дэлисэтэйгээр үнгэргэгдѳѳ.
Мастер - классай үедэ. Сохимол сохихоёо утаһа һэлгүүлжэ һургана.
ҺУРГУУЛИИН МУЗЕЙ СОО
Хоёр дабхартай, томо, һаруул, үргэн коридорнуудтай, олон таһагуудтай Үзѳѳнэй дунда һургуулиин музей ороходо, досоонь гоё, хүнэй гараар зохёоһон хэрэгсэлнүүд анхарал татана. Олон тоото эдэ хэрэгсэлнүүд 4 таһагта гуримшуулан табигдаһан гү, ханада үлгѳѳтэй гү байна. Эрдэмэй-практическа хуралдаанда ерэһэн зон – тойрогой Захиргаанай, Агын социальна һалбариин ажалтадай мэргэжэл дээшэлүүлгын институдай түлѳѳлэгшэд, тойрогой багшанар, һурагшад таһагуудаар ябажа, һургуулиин түүхэ ба хүгжэлтэтэй танилсаа. Мүн һургуулиин байгуулагдаһаар 50 жэлэй ойн баярта зорюулжа бүтээһэн, багшанар тухай мэдээсэлтэй ба дүрэ-зурагуудтай альбомууд, урдын парта, үни сагай аад, элдэб гүрэнүүдэй хашарһан, саарһан мүнгэнүүд, Ч-Р.Намжиловай эхин шатын һургуулиин һурагшадта зорюулһан «Парта» шүлэгынь, элдэб стенднүүд, һургуулиин түрүүшын компьютер, видеопроигрыватель, телевизор г.м. бултанай һонирхол татаа. Үзѳѳнһѳѳ дайнда ошоһон зон, ара талын ажалшад тухай мэдээсэл, тэдэнэй дүрэ-зурагууд, гэртэхиндээ бэшэһэн гурбалжан углуутай бэшэгүүд, хүүгэдэй гараар хэһэн солдадай багахан пулаадууд, зурагууд… - миин алад гарахын аргагүйл даа. Тиихэдэ һүүлшын таһагта һургуулиин түгэсхэгшэдэй фото-зурагууд, уран зохёолшо Ч-Р.Намжиловай угай бэшэгтэй стенд, нютаг зоной урлаһан гү, али наһан соогоо абажа ябаһан буряад хубсаһан, модон шанага, модон аяга, гунгарбаа, үхэг, һаба, ханза, дэн, гадаһан, барайнсаг г.м. эд зѳѳриин хэрэгсэлнүүд бии. Түрэл нютагаа шэнжэлжэ, түүхэтэйнь танилсаха үедѳѳ һурагшад физикын багша Альма Чимитдоржиевна Баировагай хүтэлбэри доро энэ музейдэ орохо экспонадуудые суглуулалсаһан байна.
Дэлгэрэнгыгээр 44-дэхи дугаарта.
