Агын дасанай шэрээтэ Бадма ламхай иимэ тайлбари үгэһэн байна: «Монгол литээр, зунай эхин һарын 15-ай үдэр Бурхан багша энэ юртэмсэдэ түрэһэн, энэ үдэр боди хутаг олоһон, мүн энэл үдэр тагаалал болоһон байна. Энэ үдэрые Бурхан багшын Ехэ Дүйсэн үдэр гэжэ хэлэдэг. Бурхан багша гэжэ буддын шажаниие байгуулагша Сиддхартха Гаутамын нэрэ юм. Бисалгал хэжэ гэгээрһэнэй һүүлээр Будда Шэгэмүүни гэжэ нэрэтэй болоо. Тиимэһээ Бурхан багшын мүндэлһэн, бурхан болоһон, нүгшэжэ, нирваанда opohoн һарые «Буянта hapa» гэжэ нэрлэнэбди. Энэ һарада жиндагууд буян хуряахые оролдодог. Мүнөө түби дэлхэйгээр халдабарита үбшэнэй тараад байхада, шанга эрилтэнүүд табигдана. Зүгтөө дасан шүтөөнэй, буянай хэрэг таһалданагүй, хураха уншалгануудаа хэжэл байнабди. Теэд карантинай үедэ хүн зон гэртээ байжа, буян, мүргэл хэхэ ёһотой. Тэдэнэр дасан дуганда олоороо ябахагүй гэһэн эрилтэ яһала дүүргэнэ».
Буянта һарын 15-да Бурхан багшын гурбан дүйсэн үдэртэ зорюулагдаһан «мянган тахилай» һайндэр - Доншод хурал жэлһээ жэлдэ үнгэргэгдэдэг юм. Мянган тахил гэхэдээ, 1000 зула ба 1000 балин барижа, үргэл хэхые хэлэнэ.
Энэ һарада хэһэн буян ба нүгэлтэ ябадалнууд 100 мянга дахин олошордог. Тиимэһээ мүнөө олоной газарта ябахань хорюултайшье һаань, бурхандаа зальбаржа, маани мэгзэм уншажа, һунажа мүргэжэ байбал, ехэ һайн юм. Монгол һарын 2, 8, 15, 30-ай Дүйсэн үдэрнүүдтэ зула бадараажа, бурхандаа мүргэжэ байбал, хамаг хэрэг эрхимээр бүтэхэ гэжэ хэлэгдэдэг. Эдэ үдэрнүүдтэ мал гаргажа болохогүй, архи тамхи, хулгай, худал, һальхай ябадал сээрлэжэ, хэрүүл шууяа гаргангүй, сэдьхэлээ сэбэрлэжэ, бурхандаа зальбарбал, буян хуряагдаха юм. Илангаяа Доншод хуралай үедэ масаглахада һайн гэхэ байна.
