Июниин 5-да тэмдэглэгдэдэг Оршон тойронхи байгаали хамгаалгын үдэртэй дашарамдуулан, хорото бодосуудай лабораторно анализ ба техническэ шалгалта хэдэг Агын таһагай дарга Цыпелма Аюроватай уулзажа, хөөрэлдэһэн байнабди.

- Цыпелма Цыденжаповна, танай хүтэлбэрилдэг таһагта ажалладаг мэргэжэлтэд ямар уялгануудые дүүргэдэг бэ?

- Үбэр Байгалай хизаарта ашагта малтамалнуудые олзоборилдог томо эмхинүүдые, дулаа үгэдэг котельнинүүдые шалгажа, агаар руу хэр зэргэ хорото бодосуудые хаянаб гэжэ элирүүлдэгбди. Хорото бодосуудай болон уһанай шанар шалгадагбди. Манай тойрогой байгаалида хорото бодосуудые хаядаг, оршон тойронхиие бузарладаг үйлэдбэринүүд үгы шахуу. Харин тойрогһоо гадуур шалгалтада ородог олон үйлэдбэринүүд бии. Тойрогтомнай Шэнэ Орловскын хадын шулуу малтадаг комбинат, мүн Краснокаменскда, Приаргунскын ПГХО, Газимурска Заводто Быстринский ГОК г.м. томо үйлэдбэринүүдээр ябажа, шалгалта хэжэ байдагбди. Тэрэнэй хажуугаар Хара-Нуурай, Түгнын шулуун нүүрһэ олзоборилдог уурхайнуудай ажаябуулга манай мэргэжэлтэд хинадаг гээшэ. Ага дээрэ оршодог котельнинүүд саг үргэлжэ шалгалтада ородог.

- Шалгалтануудай дүнгүүдые согсолбол, хэр зэргэ хорото бодосууд агаар руу хаягдадаг бэ?

- Диилэнхидээ бараг байдаг. Үйлэдбэринүүд, котельнинүүд хэды шэнээн хорото бодосуудые хаяхаб гэһэн тусхай хэмжээнтэй байдаг. Үбэлдөө онсо байдалай тохёолдоходо, соргонуудһаа хорото бодосууд ехээр гарадаг. Үнгэрэгшэ үбэл хизаарай байгаалиин нөөсэнүүдые шалгадаг гүрэнэй эмхиин (Росприроднадзор) Шэтын ТЭЦ шалгаа һэмди. Тэрэ ТЭЦ одоол хорото бодосуудые ехээр хаядаг байна даа. Ашагта малтамалнуудые олзоборилһон үйлэдбэриин үлэгдэлнүүд хорото бодосуудаар агаар бузарлана. Бидэ шэнжэлжэ үзөөд, хорото бодосуудай хэмһээ ехэ үлүү һаань, тэдэ эмхинүүдтэ дуулгадагбди. Хэрбэеэ үйлэдбэринүүд хорото бодосуудаа бага болгоогүй һаань, Росприроднадзор, прокуратура хинадаг гээшэ.

- Хизаарта хорото бодосуудай шэнжэлгэ хэдэг лабораторинууд олон гү?

- Шэтэдэ, Агада лабораторинууд бии. Шэтын лаборатори хойто бэеын аймагуудаар шалгадаг, бидэ - урда бэеын. Гол хүтэлбэримнай Эрхүүдэ оршодог. Манай таһагта зургаан мэргэжэлтэд ажалладаг. Минии орлогшо - Баир Батожапов, гурбан инженернүүд: Биликто Балданов, Нагмит Бальжирова, Цыцыгма Бадмаева хүдэлдэг. Ажалнай үбэлэй сагта ехэ болодог гээшэ. Дулаасуулгын, хадын шулуу малталгын үедэ талаар ябадагбди. Дулаан болоходо, саарһа дансанууд дээрэ хүдэлдэгбди. Ажалтаднай мэргэжэлээ дээшэлүүлжэ, Эрхүү, Красноярск, Пермь хотонуудта курснуудые гараһан. Эндээ анализ хэхэ бүхы хэрэгтэй хэрэгсэлнүүдээр хангагдаһамди.

- Һайнта даа.

You have no rights to post comments