Дулаан үбэлэй ашаар тойрогой ТЭК ба ЖКХ-гай объектнүүд һаатангүй, түлишэ ехээр галдангүй хүдэлөө. Бага сага аварийна байдал гарабашье, дары усадхагдадаг байгаа. Дулаасуулгын ээлжээтэ хаһын түгэсэхэдэ, тойрогой гэшүүд, гэр байрын коммунальна ажахын һалбариин мэргэжэлтэд сугларжа, дүнгүүдээ согсолоо, зунай сагай заhабарилгын хүдэлмэринүүдэй түсэбүүдые тодорхойлоо. Мүнөө зундаа тойрогой хүдөө нютагуудай олон котельнинүүдтэ заhабарилгын хүдэлмэринүүд ябуулагдаха.

Августда дулаасуулгын шэнэ хаhада бэлэдхэлгын ажал түгэсэхэ шатадаа ородог гуримтай.

Тойрогой гурбан аймагта, Ага тосхондо дулаасуулгын хаhада бэлэдхэлгын хэмжээ ябуулгануудай түсэбүүд тодорхойлогдонхой. Тойрогой дэбисхэр дээрэ дулаагаар хангадаг хори гаран эмхи ажал ябуулдаг. Эдэ эмхинүүд тойрогой 133 котельниин ажаябуулгые хангадаг гээшэ. Мүнөө үедэ котельнинүүдтэ хуушарhан түхеэрэлтэнүүдые hэлгүүлгын, шэнэ котёлнуудые табилгын, дулаа дамжуулдаг соргонуудые заhабарилгын хүдэлмэринүүд түлэг дундаа ябана.

Могойтын аймагай муниципальна байгуулалтануудаар оршодог 51 котельни дулаагаар хангадаг 14 эмхи ажалладаг байна. Хара-Шэбэр нютагай hургуулиин котельнидэ заhабарилгын хүдэлмэринүүд нягтаар ябуулагдана. Барнаулай «Алтайснабмаш» гэһэн подрядна эмхи КВр-1,25 МВт котёл табина. Энэл эмхиин барилгашад нютагай участково больница руу дулаа оруулдаг түхеэрэлтэнүүдые һэлгүүлнэ. Нэмэжэ хэлэхэдэ, тус подрядна эмхиинхид иимэшүү хэмжээнэй ажал аймагай урда бэеын нютагуудта - Хүһөөшэдэ, Нуринскда ябуулна. Тиимэһээ гурбан нютагта заһабарилгын хүдэлмэринүүд нэгэ доро хэгдэнэ гээшэ. Мүн тиихэдэ Хара-Шэбэртэ Москва хотын «Контур» эмхи түбэй котельнидэ котёл һэлгүүлгын ба бусад хүдэлмэринүүдые дүүргэжэ байнхай. Нютагай захиргаанай толгойлогшо Билик Гомбоевой хэлэһээр, подрядна эмхинүүд үнэ хаялсаанда шүүжэ, саг соогоо барилгын ажал эхилээ һэн. Харюусалгатайгаар ажалаа ябуулнад. Эмхи бүхэн мүнөөнэй һайн техникэтэй, ажалаа хүсэтэйгөөр ябуулна бшуу. Үнгэрэгшэ үбэл Хара-Шэбэрэй эмхи зургаанууд дулаан байгаа. Котёлнууд хуушарһаншье һаа, ехэ һаатангүй хүдэлһэн байна. Нёдондо дулаасуулгын талаар ехэ ажал хэгдээгүй байһанаа, байгша ондо ажаһуугшадай урманда горитой ажал хэгдэнэ гээд мэргэжэлтэд тэмдэглэнэ. Дээрэ хэлэгдэһэн «Контур» эмхиин барилгашад Ушарбайн түб котельнидэ 2 шэнэ котёл табина. Түб котельни шэнэ котёлнуудтай болоходоо, байшангуудые дулаагаар таһалгаряагүй хангадаг болохо бшуу. Аймагай комиссиин гэшүүд нютагуудаар ябажа хараад, заhабарилгын хүдэлмэринүүдэй дутуу дундануудые оложо, подрядчигтань усадхаха тухай даабаринуудые үгэнэ.

Зунай сагта Агын аймагай муниципальна эмхинүүд котельнинүүдэй үбэлдөө hаатангүй хүдэлхын тула горитой хэмжээнэй ажал ябуулна. Орловск тосхоной захиргаан котельнинүүдтээ заhабарилгын хүдэлмэринүүдые үнгэргэхэ тухай Шэтын «Альфастрой», «Благоустройство» бүлгэмүүдтэй хэлсээ баталhан байна. Тэдэ эмхинүүд тосхоной котельнинүүдэй хуушарhан сетьнүүдые hэлгүүлхэ, хүсэ ехэтэй котёлнуудые табиха түсэб-даабаритай юм. Нэмэжэ хэлэхэдэ, «Благоустройство» эмхи ганса Орловскдо бэшэ, мүн Хүнхэртэ, Гүнэйдэ котёл табилгын, дулаа дамжуулдаг сетьнүүдые, утаанай гарадаг, уһанай ябадаг соргонуудые hэлгүүлгын хүдэлмэринүүдые хэнэ бшуу. Тиин эдэ нютагуудай котельнинүүдтэ энэ жэлэй зунай хүдэлмэринүүд эршэдэнхэй. Сентябриин хорёодһоо эхилжэ, гүрэнэй, үмсыншье гэр байранууд дулаагаар хангагдажа эхилдэг болзортой. Агын аймагай эмхи зургаанууд хизаарай дэбисхэр дээрэ шулуун нүүрhэ олзоборилдог уурхайнуудтай түлишөөр хангагдаха талаар хэлсээ батална. Августын эсэстэ нүүрhэн шэрэгдэжэ эхилхэ болзортой.

Дулдаргын аймагай 28 котельни мүнөө үбэлдөө хүдэлхэ юм. Аймагай захиргаанай бюджедhээ hомологдоhон мүнгэн зөөриин туhаар котельнинүүдэй заhабарилгын хүдэлмэринүүд үнгэргэгдэнэ. Дулдарга hууринай түбэй, зарим хүдөө нютагуудай котельнинүүдтэ котёлнууд hэлгүүлэгдэнэ, утаанай соргонууд тортогhоо сэбэрлэгдэнэ. Газар доогуур халуун уhа дамжуулдаг соргонууд олон модоной зайда шэнэлэгдэнэ бшуу. Нёдондоной үлэhэн нүүрhэтэй. Тэрэнь hарын туршада хүрэхөөр хараалагдана. Мүнөө жэлэй дулаасуулгын хаhада дулдаргынхид Yрейн ба бусад шулуун нүүрhэнэй уурхайhаа нүүрhээр хангагдаха гэжэ хэлэгдэнэ.

Балжана, Ара-Элеэ нютагуудай дунда һургуулинуудта дулаа оруулдаг котельнинүүдтэ ажал түлэг дундаа ябана. Эндэ Барнаулай «Промышленная группа СПИКОМ» гэһэн подрядна эмхи олон жэлдэ ашаглагдаһан котёлнуудые абажа, орондонь шэнэ котёл табина бшуу. Шэнэ котёлнууд ехэ хүсэтэй, дулаа һайнаар үгэдэг юм. Бүхыдөө заһабарилгын хүдэлмэринүүд августда дүүрэхэ болзортой. Даалгагдаһан ажалаа саг соонь, һайн шанартайгаар дүүргэхэеэ подрядна эмхинүүд оролдон ажаллана.

Ага тосхондо дулаагаар ханг адаг «Тепловик» эмхи (Ц.Содномдашиева) «Баатар» тамирай түб руу дулаа оруулдаг котельнидэ котёл табина. Цыбиковэй нэрэмжэтэ гудамжаар оршодог түб котельнидэ жэл бүхэндэ үргэн хэмжээнэй ажал хэгдэжэ байдаг. Жэл бүри котёлнуудаа шэнэлдэг. «Бэшэ аргагүйбди. Шадахал аргаараа котельнинүүдтээ шэнэ түхеэрэлтэнүүдые абажа байдагбди. Түбэй котельниһээ олон байшангууд дулаагаар хангагдана ха юм», - гэжэ «Тепловик» эмхиин хүтэлбэрилэгшэ Цыремжит Дарижаповна хэлэнэ һэн.

You have no rights to post comments