Тэрэ Сагаан-Шулуутай нютагайнгаа дунда һургуули дүүргээд, Буряадай гүрэнэй багшанарай дээдэ һургуули «Географи ба биологиин багша» мэргэжэлээр түгэсхөө бэлэй. Үшөө институдта һуража байхадаа, полициин ажалда орожо, хүн зондо туһалха хүсэлтэй болоо һэн. Тиихэдэ энэ ажал бэлэн бэшэ, харюусалгатай гэжэ ойлгохо наһандаа ябаа. Мүнөө Доржи Цыренжапович полициин ажалда 17-дохи жэлээ хүдэлнэ. 2003 ондо Могойтын милицидэ ажалда ороод, Хила ба Хүһөөшэ нютагуудта участковоор 2-2 жэл хүдэлһэн юм. Уридшалан мүрдэлгын бүлэг һаяшаг, 1992 ондо байгуу-лагдаһан. Ажалдаа бэрхэ, харюусалгатай участковые 2007 ондо мүрдэгшөөр ажалда абаа, удангүй ахалагша мүрдэгшэ болоо, һүүлээрнь бүлэгэйнгөө даргаар томилогдоһон байна. Мүнөө полициин капитанууд Баира Дабаева ба Тамара Данзановатай суг хүдэлнэ.
Уголовно-процессуальна кодексын (УПК) ёһоор, энэ албанайхид хүндэ бэшэ, эгээ ехэнь 5 жэлээр эрхэ сүлөө хаһаха уголовно хэрэгүүдые мүрдэдэг. Тиибэшье тэдэ мүрдэгшэдтэ адли процессуальна эрхэтэй болон эрхэ түлөөлэлгэтэй (полномочие) юм. Тиимэһээ баһал мүрдэлгэ хэдэг, тэдэнэй тоодо мүшхэлгэһөө эхилээд, нэгжүүл хэхэ, гэмнэгшэ гэжэ тоолохо г.м. Уридшалан мүрдэлгын бүлэгэй хүдэлмэрилэгшэд 30-40 хэрэг мүрдэдэг. Ямар статьянууд олоор дайралданаб гэхэдэ, зорюута хүниие гэмтээлгэ, заналга г.м. болоно. Һүүлэй үедэ һогтуугаар авто-унаа жолоодолго эгээ ехээр дайралдадаг. Энэ статьяда 9 һара соо мүрдэгдэһэн 72 уголовно хэрэгэй 30-иинь хабаатай. Һэргылэлгын ажалай ябуулагдабашье, һогтуугаар жолоодогшодой тоо үсөөрнэгүй, жэлэй 2-3 дахин һогтуугаар баригдадагшье зон бии ха. Авто-унаагаар түрүүшынхеэ һогтуугаар баригдахадаа, административна хэһээлтэ абадаг. Харин энэ болзор соо дахин баригдахадаа, хүн уголовно хэһээлтэтэй болодог байна. «Харамтайнь гэхэдэ, эдэ зон ганса өөһэдынгөө бэшэ, харин хүүгэдэй, аша зээнэрэйнгээ харгы хаана – гүрэнэй аюулгүйе хангадаг албангууд руу һургуулида, ажалда орохо болоходонь, гэртэхиниинь, аха дүүнэрынь сүүдлүүлһэн гү гэжэ шалгадаг ха юм. Сүүдэй шиидхэбэриин болзорой дүүрэбэшье, мэдээсэлэй түбэй бааза соо мэдээнүүд үлэдэг. «Хүбүүмни сэрэгэй һургуулида орохоёо һанаа һэн», - гээд халаглаха ушарнууд нэгэтэ бэшэ дайралдадаг. Гадна сэсэрлигэй, һургуулиин харуулшадые, кочегарнуудые сүүдлүүлһэн гү гэжэ шалгажа байдаг. Мэнэ-мэнэ ушардаг гэмтэ ябадалнуудай нэгэн хүниие сохихо хэрэг болоно. Анхан энэ гэмтэ ябадал эблэрүүлгын (мировой) судья харадаг байһан. Энэ статьяда 2016 ондо хубилалтанууд оруулагдажа, хүндэ түрүүшынхеэ гар хүрэбэл, мэдүүлгын ороошьегүй һаа, административна протокол заал һаа бэшэдэг болоһон. Хэрбэеэ административна хэһээлтын болзор соо – 1 жэлэй туршада хэнииеб даа сохиболнь, тэрэ хүндэ уголовно хэрэг үүдхэгдэдэг», - гэжэ Доржи Цыренжапович тайлбарилна. Энээн тухай ажаһуугшадтаа дахяад һануулха хүсэлтэй байһанаа мэдүүлээ һэн.
Доржи Ванчиков бүлэгэйнгөө дарга байхадаа, бүхы уголовно хэрэгүүдые үзэжэ, хэрэг бүхэндэ заабари үгэжэ, мүрдэлгэ ябуулдаг. Хэрэгүүд саг соогоо хуулиин ёһоор ябана гү гэжэ хинадаг, хэрбэеэ буруу хэгдэжэ байгаа һаань, зүб руунь шэглүүлдэг шуу. Мүрдэлгын һүүлээр хэрэгүүдые, гэмнэлгын акт заатагүй шалгадаг. Бүлэг соонь үсөөн хүн хүдэлдэг, ажалынь ехэ, тиимэһээ Доржи Цыренжапович өөрөө баһа хэрэгүүдые мүрдэдэг юм. Хүтэлбэрилэгшэ байхадаа, бүхы тоосоо, элидхэл г.м. бэлдэхэ, зүблөөндэ, суглаанда, планёркодо хабаададаг.
Полициин майор Доржи Ванчиков ажалдаа амжалтатай хүдэлһэнэй түлөө олон грамотануудта, баярай бэшэгүүдтэ хүртэһэн юм. Ажал хэхэдэ, эгээ шухалань харюусалга, тэсэбэри хэрэгтэй гэжэ тэрэ тоолоно. Хубиин сүлөө саг гэжэ байдаггүй шахуу. Ямаршье сагта, жэшээнь, коронавирус үбшэнэй дэлгэрһэншье үедэ ажалдань хизаарлалгын хэмжээнүүд абтан-гүй, сүлөөгүй хүдэлһөөрөөл хүдэлжэ байһан тухайгаа полициин майор мэдүүлнэ һэн.
Уридшалан мүрдэлгын бүлэгэй ажал аймагай прокуратурын хиналта доро байдаг юм. Тиимэһээ энэ албанайхид прокуратуратай нягта холбоотойгоор ажалладаг, илангаяа Могойтын аймагай прокуророй орлогшо А.Багдуевтай. Энэ албанда Доржи Ванчиков олон жэлэй туршада полициин майорнууд Лариса Димчикова ба Оксана Гунтыповатай хүдэлһэн. Доржи Цыренжаповичай шэнэ албанда ороходо, ахалагша мүрдэгшөөр хүдэлжэ байһан полициин майор, ветеран Александр Порошонов дүршэл шадабаритаяа хубаалдаһан, дэмжэһэн хүн. Бүлэгэй дарга аха нүхэртөө баяртай байдаг.
Доржи Ванчиков бэрхэ ударидагша, суг хүдэлдэг нүхэдтэеэ ажаһуугшадайнгаа амгалан байдалай түлөө оролдожо, харюусалгатайгаар хүдэлнэ бшуу.
Айлай ехэ Доржи хүбүүн эгээл һайханаар Валентина Дашидондоковна эжыгээ һанадаг. 1991 ондо абань үбшэндэ нэрбэгдэжэ, бурхандаа ошоһон. Тэдэ хатуу жэлнүүдтэ эжынь 5 хүүгэдээ гансаараа үндылгөө, бултандань дээдэ һургуули хүүлээ. Баир дүү хүбүүниинь Шэтэдэ Энгидэйн дотоодын хэрэгүүдэй зургаанай уголовно-бэдэрэлгын таһагай даргын орлогшо, подполковник юм. Билигма басаган уголовно-гүйсэдхэлгын инспекцидэ даргаар хүдэлжэ байһанаа, наһанай амаралтада гараа. Баярма «Дружба» агрокооперативта бухгалтераар хүдэлнэ. Одхон Туяна багша мэргэжэлтэй.
Найдамтай наһанайнь нүхэр Элеонора сүлөөгүйшэг ажалтай инагаа дэмжэжэ байдаг, хэдынэйшье сагта халуун эдеэтэй хүлеэдэг юм. Энэ бүлэ гурбан хүүгэдые хүмүүжүүлнэ.
