Манай тойрог тиихэдэ нэгэ томо барилгын талмай hануулдаг байгаа. Yргэлжэ ямар нэгэн шэнэ байшангуудай, дасан дугангуудай нээлгэдэ зорюулагдаhан баяр ёhололнууд бусад ондоо шухала хэмжээнүүдтэй hэлгэдэг һэн. Бидэ, «Толоной» сурбалжалагшад, ехэл сүлөөгүй, хододоо хайшааб даа яаралтай ябажа, хүдэлдэг бэлэйбди.
2004 ондо Ага тосхондо Азиин Буддын шажантадай Эб найрамдалай түлөө конференциин хуралдаан болоhон юм. Тэрээндэ Росси, Монгол, Урда ба Хойто Солонгос, Хитад, Вьетнам, Таиланд, Лаос, Камбоджо гүрэнүүдэй буддын шажанай ехэ багша-ламанар бууhан байна. Камбоджоhоо ерэhэн 90 гара наhатай үбгэн ламын хуралдаанай президиумдэ огто хүдэлэнгүй, бисалгалай байдалда hууhаниинь мартагдадаггүй.
Хуралдаанай ажаябуулга буддын шажанай Сангхын оршуулагша Борис Дондоков ба Чехи гүрэнэй эрхэтэндэ хадамда гараhан, Карловай университедэй философиин эрдэмэй доктор Лыгжима Халоупкова-Доржиева оршуулhан юм.
Холоһоо ерэһэн хабаадагшад hая hэргээгдэн заhабарилагдажа байhан Сүүгэлэй дасан бараалхажа ошоо hэн. Тэндэ АБКМ-эй түрүүлэгшэ, Монголой хамба лама Чойжамцын үшөө хооhон зогсоhон Шойрын дуганай модон баханануудта шэхэеэ няагаад, ехэ анхаралтайгаар шагнаархан зогсоһониинь мартагдадаггүй. Нэгэ хэды тиигэжэ зогсоод, бусадта хандажа хэлээ бэлэй: «Эндэ үнгэрhэн сагай хуралнуудай уншалгын, нангин хонхонуудай жэнгирhэн абяанууд дуулдаhаар зандаа…».
