Коронавирус үбшэнэй һүжэрһэн шалтагаанаар тус мүрысөөн онлайнаар үнгэргэгдэбэ.
Үбэр Байгалай хизаарай буряад соёл хүгжөөлгын түбэй мэргэжэлтэн Баирма Соктоевагай мэдүүлһээр, жэлһээ жэлдэ мүрысөөндэ хабаадаха дуратайшуул олон болоно: нёдондо 8 можо байһан һаа, мүнөө 19 можо мүрысэбэ.
«Ага-интеллект» мүрысөөн 4 шатаһаа бүридөө.
«Визуализация» шатада тусхай асуудалнуудтай 10 зураг дурадхагдаа. Хабаадагшад тэдэ асуудалнуудта 5 минутын туршада харюусаха ёһотой байба.
Хоёрдохи шатада туузын үнгэнүүдэй илгаа, бүһэ андалдаан, тэбэг сохихо наадан тухай хөөрэхэ, «һураһые һураар татахагүй» гэһэн сэсэн үгэ тайлбарилха г.м. 10 даабари 20 минутын туршада дүүргэхэ эрилтэ табигдаа.
«Түргэн харюу» гэһэн удаадахи шатада можонууд 10 минутын туршада мүн лэ 10 асуудалда харюу үгэбэ. Жэшээнь, иимэ асуудалнуудта харюусаа: ямар амитан буйладаг бэ, май һарые юун гээд буряадаар нэрлэхэб г.м.
Һүүлшын 4-дэхи шатада хүгжэм дуунай зэдэлһэнэй удаа дуунай нэрэ, үгэнүүдэйнь, хүгжэмэйнь авторнуудые таажа туршаба. Дүн хамта 10 дуун дурадхагдаа.
Хабаадагшад бүхы харюунуудаа вайберай бүлгэм руу эльгээжэ, зүб харюу бүхэнэйнгөө түлөө 1 балл абажа байгаа. Тиигэжэ тон олон баллнуудые абаһан Агын аймагай соёлой байшанай «Согтой соёлшод» болон Дулдарга нютагай «Урагшаа» можонууд илажа гараба. Удаадахи һуури Могойто тосхоной «Сууряан» можынхид эзэлээ. Харин Агын 2-дохи дунда һургуулиин ба Дулдаргын «Баруун тала» можонууд 3-дахи һуури хубаабад. Гэр бүлөөрөө можо боложо наадагшад «Молодёжь Аги» эмхиһээ тусхай шанда хүртэһэн байна.
Долгор РАДНАБАЗАРОВА.
