Даши Шагаевичайда хүрэжэ ерэхэдэмнай, гэрэй эзэн хуһан модоор тэбшэ дархалжа байгаа. Тэрэ үбһэнэй машина, түлеэ хахалха оньһон түхеэрэлтэ гэхэ мэтые хэжэ, нютагайхидтаа мэдээжэ болоһон. Зориг хүбүүниинь баһал түмэрөөр дарха хэхэ дуратай.
 
«Зүдхэли нютагһаа уг гарбалтай Данжуурай Гармын Шагайн Эрдэниин Даша гээшэб. Табтаанайн дунда һургуули дүүргээд, түрэл колхоздоо 40-өөд жэлэй туршада механизатораар хүдэлһэнби. Дээдэ үеын зонһоо дуулаһан юумэеэ хүүгэдтээ дамжуулхые оролдодогбди», - гэжэ 60 наһатай Д.Эрдынеев хэлээ һэн.

Россиин ХIХ бандида хамба лама Жамбалдоржи Гомбоев үндэр наһа наһалжа, бэеынгээ хэбэрэг болоод байхада, «гурбан субарга барихат» гэжэ гэрээд үгэ хэлэһэн ха. Энэ үгыень сэдьхэлдээ хадуужа абаһан хам-бын зээнсэр Даши Эрдынеев нютагайнгаа буддын шажанай бүлгэмэй түрүүлэгшээр 2007 ондо һунгагдаа бэлэй. Табтаанайнхид хамбын захяа дүүргэжэ, нангин шүтөөнэй 3 субарга баряа. Түрүүшын субарга Гомбын хамбын тоонто Аса Шэбэр хүндын эхиндэ арад түмэнэй хүсөөр бодхоогдожо, хамба лама Д.Аюшеев түрүүтэй шэрээтэнэр, 70-аад ламанар рамнай үргөө. Зүүн урдаханань дуганай багахан гэр баригдаа. Тиигэжэ эндэ 460000 түхэригэй барилга болоо. «Барилгада хэрэгтэй ехэнхи мүнгыень Д.Эрдынеев хэдэн нютагуудаар ябажа, арад зоной туһаламжаар олоһон» - гэжэ тэрэ үедэ «Табтаанай» хүдѳѳ һууринай захиргаанай толгойлогшоор хүдэлһэн, субарга шүтөөнүүдые байгуулгада эдэбхитэйгээр хабаадаһан Алексей Лубсанов тэмдэглэһэн байна.  
2016 ондо Аса Шэбэрэй обоо шадар, Сэнгэди уулын бооридо Ж.Гомбоевой түрүүшын багша Сохоодойн Дампил ламада зорюулагдаһан «Бадма» субарга бүтэһэн. Дампил ламын түрэл, Солонгос гүрэндэ ажаһуудаг Жаргалма Цыренова мүнгэ үргэжэ, барилгыень дааһан юм.

2011 ондо гүн ухаа гэгээрүүлхэ «Шоймпрол Шодон» субарга Дашидондок Пүнсэгэй оройдо баригдаа. Шэнэ Орловск тосхондо ажаһуудаг Жабай Сэдэн аха үри хүүгэдтэеэ хамта 100000 түхэригэй хандиб үргөө.

2016 ондо Саханай уулын бооридо харгын аюул зайсуулха шүтѳѳн баригдаа. Агын дасанай Бальжаев Бата гэбшэ ламын Соёлма абгайнь абынгаа тоонто ерэжэ, энэ барилгада 50000 түхэриг оруулһан байна. 2009 ондо Үзөөн нютагай Базаржаб Дондоковой үри хүүгэд  нагасадаа - Ж.Гомбоевой хоёрдохи багша Цыренэй Осор ламада зорюулжа, «Шоймпрол Шодон» субарга Зүдхэлиин мунхан хушуунай ойрохоно өөрынгөө зөөреэр баряа һэн.

«Жамбалдоржи нагаса эрхи, мүнгэн хутага, хашарһа намда баряа һэн. Мүнөө хамбын бэлэглэһэн эрхи татажа, хутагыень абаад ябадагби. 2007 оной июниин 6-да Гомбын хамбын Агын Хүһөөшэдэ 25 жэлэй саана  хүдөөлүүлэгдэһэн бэеыень гаргажа, 33 партизануудай нэрэмжэтэ хүүтэр асараад, ламанар хайлуулаа һэн. Цырен дид хамба ламхай шарилаарнь 36 бурхан барлажа, Аса Шэбэрэй субаргада шэнгээһэн. Тэрэ субаргада шүтэхэдөө, Гомбын хамбын бэедэнь мүргэнэбди гэжэ этигэхэ хэрэгтэй. Анхан сагта субаргын урда талмайда хамбын аба Дамдинай Гомботоной бууса байһан. Тэндэ Жамбалдоржи хүбүүнэйнгээ хүйһэ нюуһан гэжэ хүгшэн эжымни хэлэдэг һэн. 2006 ондо хамба лама Д.Аюшеевэй Аса Шэбэртэ бумба нюухаяа ерэхэдэнь, Шагайн Эрдэни абамнай хамбын тоонто харуулжа үгөө бэлэй. «Архи хараһан газарта бү үргэгты, сагаан эдеэ сүршэгты» гэжэ үндэр зиндаатан захиһан. 2017 ондо Шоното хүндын тэгэн дунда «Юндэн Шодон» субарга эб нэгэтэй ябахын тула баряабди. Уран гартай Б.Дампилон 5 шүтөөн бодхоолсоо, барилгашад Д-Ц.Дондоков, М.Шойжитжапов, Б.Бальжинимаев, Х.Дансарунов гэгшэдые тэмдэглэхээр даа», - гэжэ Д.Эрдынеев хөөрөө һэн.

Даши Шагаевич нютагайнгаа шажанай бүлгэмэй ажал ябуулхын хажуугаар Агын тойрогой нютаг бүхэнэй буддын шажанай бүлгэмүүдэй түрүүлэгшэнэрэй толгойлогшоор һунгагдаһан шуу. 
 

You have no rights to post comments