Нюуса тарни
Yнэн дээрээ эндэ ямаршье нюуса юумэн үгы. Гэхэтэй хамта, тарниин номой удха тон хатуу, юрын хүнэй эшэ үндэhэндэнь хүрэжэ, тэрэниие элирүүлхэ гээшэ тон хүндэ байхын саана үнэн дээрээ бэелүүлхын аргагүй юумэн болоно. Тарниин хүсэн гээшэ баhал хэм хэмжүүргүй ехэ – нюдэ сабшаха зуура гү, али хургануудаа «тас» гүүлэхын хоорондо тарниин хүсөөр бурхан боложо болохо юм. Теэд тарниин ном гээшые юрын үгэнүүдээр хэлэхэдэ, юрын тэмдэгүүдые харуулхада ойлгогдохо юумэн бэшэ байhаниинь лабтай. Хэды хурса нюдэтэй байбашье, тарниин ном харанагүйбди. Хэды hонор шэхэтэй байбашье, тарниин ном дууланагүйбди. Хэды ехэ эрдэм номтойбди гэжэ өөр тухайгаа бододогшье hаа, тарниин ном ойлгохо ухаан манда үшөө бии болоодүй байна. Богонёор хэлэхэдэ, манай 5 махабад тарниин ном ойлгохо шадалгүй, үшөө hайнаар болбосоржо ядажа ябаhан махабад болоно. Бэемнай бодисада боложо хубилаад, hанаамнай боди сэдьхэлээр дүүрээ hаань лэ, нюуса тарниин ном ойлгожо эхилхэ болонобди. Тиигээд Ошорваани бурханда ходо зальбаржа ябаа hаа, энэ ехэ хүндэтэй, хүшэршье замда тон туhатай байха юм. Юундэб гэхэдэ, Ошорваани бурханиие Нюуса тарниин эзэн гэжэ нэрлэдэг.
