Буянта наһанай дабаан дээрэ гараһан хүндэтэ ветеран  аһан соогоо һаалишанай хүшэр ажал хэжэ, ажалай амжалта туйлаһан. Тэрэнэй хэшэг бүлүүрынь далай мэтээр билтаржа, олон үеынхидые хооллуулаа. 1962 ондо Агын аймагай түрүү һаалишан СССР-эй арадай ажахын туйлалтануудай үзэсхэлэнэй (ВДНХ) хабаадагша боложо, Москва хото ошоо һэн. 1972 ондо Цындыма Аюровна габшагай ажалайнгаа түлөө Ажалай Улаан Тугай орденоор шагнагдаа бшуу. Тэрэнэй алдар нэрэ Агын аймагай, тойрогой  үндэлэлэй самбарнуудта, газетын нюурнуудта нэгэтэ бэшэ гараа, «Табан жэлэй социалис ажалай илагша», «Коммунис ажалай ударник» гэхэ мэтэ эмдэгүүдтэ оло дахин хүртэһэн юм. Тэрэ эрхим ажалай хажуугаар ниитын хэрэгтэ эдэбхитэй хабаадаһан. Цындыма Махабадарова Шэтын можын хэнэрнүүдэй 2-дохи слёдой делегат, коммунис партиин гэшүүн, профсоюзай эдэбхитэн ябаа. 1968 ондо бүхы Росси дотор Согто-Хангил тухай дуунай онкурсын соносхогдоходо, нютаг зоной зүгhөө жюриин гэшүүн боложо, 200 гаран дуун сооһоо эрхимыень шэлэлсэһэн тухайгаа омогорхон hанадаг. Цындыма эгэшын бага балшар наһан Согто-Хангилай сээнтэрэй баруун тээ, мүн хойто хажуугайнь «Хара толгой» хүндыдэ үнгэржэ, хатуухан сагта  үлэтэйхэн байһан. Худанса шарайд угай Аюрай Махабадар абань нютагтаа зүблэлэй түрүүлэгшээр хүдэлжэ байтараа тушаалгажа, гэр бүлэдөө бусаагүй.

Баһал худанса шарайд омогой Хүнхэр нютагай басаган Ринчинэй Долгор эжынь колхозой хамаг ажал хэлсэжэ, халуун шулуу долёоһон, хатуу сагые эсэмгэйгээр гаталhан. Цындыма басаганиинь тугал буруунуудаа харалсаhаар, үбһэ хулһанда ябалсажа, огородой, һаалиин бэлэн бэшэ ажалнуудые агаhаа мэдэхэ болоо һэн.

You have no rights to post comments