Россиин Президент В.Путинай зарлигаар Буряад Уласай Толгойлогшо В.Наговицын тушаалһаа буужа, Алексей Цыденов Толгойлогшын уялга саг зуура дүүргэгшээр томилогдоо.
А.Цыденов.
Буряадта засаг ударидагшын хүлеэгдээгүй һэлгэлтэ боро юрьеэнэй хэрэг бэшэ, засаг зургаануудһаа эхилээд, хамаг эрхэтэдтэ хабаатай хадань үргэн олоной анхарал үнгэрэгшэ долоон хоногые дүүрэн эзэлжэ, мүнѳѳшье татаһаар зандаа. Шэнэ хүтэлбэрилэгшын ажалдаа хам орожо эхилхэдэнь, энэ һонирхол улам эдэбхижэхэ хэбэртэй. Улаан-Үдын Соведүүдэй талмай тойроһон байшангуудта - саг зуурын гэжэ залгалта нэрэ абаһан Буряад Уласай Засагай газарта, депутадуудай тоогоор хамагһаа олон гэжэ суурхадаг Арадай Хуралда ехэ хүлгѳѳн болоно. Халаглаһан, хороор хошхорһон зоншье бии хэбэртэй (тэрээнгүй үнгэрхэгүйл байха), Интернедэй оршомдо тэрэ мэтые уншахаар. Намар болохоёо байһан һунгалтада хабаадажа, засаг абаха хүсэлтэй бүлэглэлнүүд «яаха бэлэй даа» гэһэн бодолдо абтанхай. Юрэнхыдѳѳ, болоһон тус үйлэ ехэ һонин, һайн юумэн болоо гэһэн һанамжа таранги. Манай орондо дүшэ наһатай хүниие можын толгойлогшоор (губернатораар) табижа байхань оосотой юм. Иимэ ушар ойрын түүхэдэ һанагданашьегүй, энэ хадаа политикада хубилалтын гэршэ, сагай тренд болохо ушартай гэжэ олоной зосоо найдал түрэнхэй. Шэнэ толгойлогшо «ѳѳрѳѳл ѳѳрыгѳѳ хэһэн», ѳѳрын лэ ухаан эрмэлзэлээр, эдэбхитэ ажалаар дээшээ дэбжэһэн, үндэр тушаалнуудые эзэмшэһэн гэжэ намтарыень уншаһан зон ойлгобо. Тиимэһээ одоошье засагта технократ гэжэ нэрлүүлдэг урагшаа һанаатай залуу хүбүүд ерэжэ, «тогтомол шалбааг намаг» шэнги байдал хубилгаха аабза гэжэ ехэтэ найдана.
Дэлгэрэнгыгээр 7-дохи дугаарта.
