Акшаагай, Хэрын, Дулдаргын аймагуудта ажаhуудаг арад түмэн Yзөөнэй дасан ерэжэ, буянта хэрэгээ бүтээдэг юм.
Тэдэнэр энэ дасанай жиндагууд (прихожане) болоно. Холын сагые эрьен харахада, Yзөөн нютагай дэбисхэр дээрэ Онон голой хойто эрьедэ Тарбагатайн дасан 1825 ондо баригдаhан түүхэтэй. Дасанай горлом соо Согшон дуган, Отошын сүмэ, Диваажин сүмэ, Мааниин дуган анхан байhан ха. Тэрэ үедэ 70-80 ламанар хурал хурадаг байгаа. Доодо Элеэ, Хужартай, Загдаша, Алхана нютагуудай гартаа дүйтэй, уран дархашуул дасан дугангуудые бодхоолсоо. Элеэгэй Адаг hууринай ород дархан Сухулин Согшон дуганай барилга бүтээһэн. Тарбагатайн дасан «Даши Түбдэнлин» гэжэ түбэд нэрэтэй болоо. Энэл нэрэнь 2001 ондо шэнээр рамнайлагдаhан Yзөөнэй дасанда олгогдоо бэлэй. Дасанай шэрээтын тушаалда Yзөөн нютагай Гүрожаб ламын шаби Ирдынеев Баир лама томилогдоо. Тэрэ сагhаа Баир ламхай буянта хэрэг эрхилжэ, лама багшынгаа замаар олоной түлөө оролдоно.
Үзѳѳнэй дасан.
2005 ондо Баир ламхайн урилгаар, үндэр түрэлтэ Далай ламын багша Кирти Ценшаб римбүүшэ Yзөөн дасан морилжо, Цеваан ба Чойжалай Жинан номуудые табяа hэн. 2007 оной августын 24-дэ шэнэ Согшон дуганда рамнай үргэгдэжэ, ехэ найр, эрын гурбан наадан болоо. Акшаагай, Хэрын, Дулдаргын аймагуудай урдын шүтөөнэй газарнууд hэргээгдэнэ. Акшаагай аймагай Хуралга нютагта лама санаартанай бисалгал хэдэг Байса шүтөөнэй газарта дуган баригдаа. Мүн Хэрын аймагай Тарбалжын дуганда Сахюусанай хурал хурагдана, баруун нютагуудай нангин шүтөөнүүд тахигдана. Ирдынеев Баир ламхай Агын Буряадай тойрогой түлөөлэгшэдэй суглаанай гэшүүн, Дулдаргын аймагай депутат юм. Нютагайхидтаа туhаламжа үзүүлдэг арадай hунгамал hаяхан хизаарай «За укрепление дружбы народов» медаляар шагнагдаа.
Ага тосхон тойрогой зүблөөндэ ерэhэн Баир ламхайтай уулзахадамнай, иигэжэ хөөрөө: «Жэлэйнгээ бүхы хуралнуудые хураабди, Тарбалжын дуганда уншалга бүтээгдэдэг. Бишэн жэлэй шухала хэмжээ ябуулга гэхэдэ, Тарбагатайн дасанай байгуулагдаhаар190 жэлэй ойн баяр үргэнөөр тэмдэглэгдээ. Тиихэдээ Улаан-Yдэ хотоhоо Дуйнхор дасанай 30-аад ламанарые урижа, Чойжил сахюусанай цам түрүүшынхеэ гаргаабди, ехэ уншалга, Эрын гурбан наадан үнгэрөө.
Дэлгэрэнгыгээр 7-дохи дугаарта.