Будалан нютагһаа уг гарбалтай Батор лама Шойдоков Шэтын «Дамба Брайбунлинг» дасанда алба хаадаг юм.
Тэрэ бусад лама санаартанаар үдэр бүри амгалан байдалай, эхэ зургаан зүйлэй түлөө Согой хурал, Намсарай сахюусан, тиихэдэ монгол hарын тусхай үдэрнүүдтэ Һарзай, Мандал Шива, Алтан гэрэл хурадаг. Мүнөө Сагаан hарын урда тээ hүзэгшэд Шэтын дасан ерэжэ, жэлэйнгээ зурхай зуруулна. Батор лама албаяа хаадаг 4-дэхи гэр соогоо оршолонто юртэмсэ дээрэ амгалан тайбан, зоболонгүй ажаhуухын түлөө зальбаржа, дасан ябагшадай хэрэг бүтээдэг. Батор лама Будаландаа дунда һургуули дүүргэжэ, Агын дасанда хубараг боложо ороһон намтартай. Ламын һахилда хүртэхэдэнь, дид хамба лама Цырен Дондукбаев, Агын дасанай шэрээтэ Бадма Цыбиков Батор ламые Дуйнхор дуганда алба хаахыень зууршалһан байгаа. Тиигэжэ Улаан-Үдэдэ Дээдэ Онгостойдо оршодог Дуйнхор дуганда һуража, шажанай эрдэм шудалһан байна. Тэрэ Буда ламын шаби ябажа, Калачакра гээшые нягтаар үзэжэ, эрдэмтэй болоо һэн. “Калачакра” ондоогоор хэлэбэл, “тарни” гэһэн удхатай. Буда лама багшань Түбэд орондо 13-дахи дугаар Далай лама Агван Жамсын туһалагша ябаһан гээшэ. Түбэд, Монгол оронуудаар буддын шажан дэлгэрүүлһэн. Тиин Буда багша 1993 ондо Оросой хамба ламын урилгаар Улаан-Үдэ ерэһэн байна. Хоёр жэлэй саана тагаалал болоһон. Батор лама Дуйнхор дуганда найман жэлэй туршада алба хаахадаа, мандал зуража, цам хатаржа һураа. Иимэ шадабаритай болоһондоо тэрэ багшадаа баяртай байдаг. Тэрэ Шэтын «Дамба Брайбунлинг» дасанай шэрээтэ Баир Цымпиловэй урилгаар 2014 ондо ерэжэ, унзадай туһалагша гадагба тушаалтай алба хаана.
Хуралһаа гадна Батор Шойдоков лама УФСИН-ай албатадай урилгаар, эрхэ сүлөөhөө саг зуура хаhагдаад байhан эрхэтэдтэ hара бүри уншалга бүтээдэг гуримтай. Түрмэдэ байhан зон нүгэлөө арюудхажа, ламанарта хандажа, бэе махабадаа адислуулдаг. Шэтэ хото дээрэ оршодог 3-дахи, 5-дахи дугаар хатуу журамтай түрмэнүүд, Нэршүүдэ эхэнэрнүүдэй 1-дэхи, эрэшүүлэй 11-дэхи колони ошожо, уншалга бүтээдэг байна. Батор ламын үүсхэлээр түрмэ бүхэндэ уншалгын таһалга байгуулагданхай. Субаргашье бии. Хатуу үйлын үреэр эрхэ сүлөөгөө хаһагдаад байһан зон түрмэһөө гарахадаа, һөөргөө иимэ газар руу ерэхэгүйн, эндэһээ табигдажа, ажабайдалай зүб харгыда орохын тула ехэ уншалга бүтээлгэдэг. Батор лама мүнөө үедэ түрмэнүүдээр ябажа, хаалтатай байһан зоной Сагаалганай хэрэгыень бүтээнэ. Шэтын 5-дахи колониин дарга Жаргал Бимбажапов Шэтын дасантай хэлсээ баталжа, һара бүхэндэ Батор ламые урижа, уншалга хүүлэдэг байна. Тус колонидо хаалтатай байһан уран гартай эрхэтэд тэргэтэй ногоон мори дархалаа. Шүтөөнэй үндэрынь 3 метр – иимэ мори урлаал даа. Тэрэнииень Батор лама адислажа рамнайлаа һэн.
Дэлгэрэнгыгээр 7-дохи дугаарта.
