Забайкалиин хизаараар дид хамба лама Цырен Дондукбаев Россиин Буддын шажанай заншалта сангхын хэрэгээр Энэдхэг, Түбэд ба бусадшье бурханай орон нютагуудаар шажанай хэрэгээр ябаад ерэдэг гээшэ. Тээсгэн Энэдхэг орон ошожо ерээ һэн. Цырен ламхайн холын оронһоо ерэхэдэнь уулзажа, ажалай хэрэгээрнь һонирхообди.
"Дикси Гампо" дасан. Гэр бүлын архивһаа абтаһан фото-зураг.
- Цырен ламбагай, энэ удаа ямар зорилготойгоор Энэдхэг орон ошообта: Далай ламатай уулзахаяа гү?
- Yгы. Ошоһон гол зорилгомнай гэхэдэ, Кушок Бакула римбүүшын түрэһөөр 100 жэлэй ойдо зорюулагдаһан эрдэмэй ба дүршэл абалгын конференцидэ хабаадаабди. Энэ хэмжээ ябуулга Ладак гэжэ можын Лех хотодо үнгэргэгдөө. Хамба лама Дамба Аюшеевэй намда «ошоод ерэгты» гэхэдэнь, Шэтэһээ гурбан хүн: би, минии дүтын нүхэр, зээ хүбүүн гээд холын замда гараа һэмди. Москваһаа англи хэлэ мэдэдэг оршуулагшые абаабди. Ладак гээшэ Бакула римбүүшын түрэһэн нютаг. Бакула римбүүшэ бултанаймнай багша ябаһан. Илангаяа Энэдхэгтэ, Түбэдтэ һураһан лама санаартанаймнай багша ябаһан. Буддын шажаниие дэлгэрүүлһэн, политигшье ябаһан даа. Түбэдтэ һуража, XIII дугаар Далай ламын һахилда хүртэһэн. Ладак нютагаа бусажа, һургаалай, гэгээрүүлгын ажал ябуулһан. Монголдо Энэдхэг оронһоо элшэн сайдай тушаал эзэлжэ ябаһан байна. Улаан-Баатар хотодо Бэтүвлин дасан байгуулһан юм.
- Ладак түрүүшынхеэ хараба гүт?
- Энэдхэг руу оло дахин ябадагшье һаа, Ладак гээшые түрүүшынхеэ харабаб. Түб хото Лех гээшэ 3500 метр үндэртэй газарта оршоно. Уларилдань тааража ядахаар. Хабшал газарта баригдаһан, үсөөн зотой хото болоно. Хоёр хиид дасан орожо мүргөөбди. Урданай дасангууд байгаа. Найман зуун жэлэй саана баригдаһан. Оройнь шулуугаар баряатай. «Дикси Гампо», «Гандан Чойнхорлинг» гэжэ нэрэтэй дасангууд бии. Yшөөшье олон дасан- гууд байгаа. Сагай байгаа һаань, барагсаан ябажа харахаар шуу. Ябаһан газартаа фото-зураг хээбди.
Дэлгэрэнгыгээр 43-дахи дугаарта.
