Агын «Дэшэн Һүндэблин» дасанай ба буддын шажанай академиин урилгаар эрдэмтэн, түүхын эрдэмүүдэй кандидат, Түбэд орон шэнжэлэгшэ Раиса Крапивина ерэжэ, ажаһуугшадта буддын шажанай гүн ухаа дэлгэрүүлгээр лекцинүүдые уншаһан байна.
Раиса Николаевна наһанайнгаа олон жэл урданай түбэд хэлэ бэшэг үзэлгэдэ зорюулһан юм. Түбэд ороной нангин шүтөөнэй газарнуудаар аяншалһан. Эрдэмтэн буддын шажанай сэдэбээр олон номуудые хэблүүлһэн, Түбэд ороной суута эрдэмтэдэй хүдэлмэринүүдые ород хэлэн дээрэ оршуулһан габьяатай. Тэрэ Чжамьян Кенцзэ гэбшэ һаарамбын оршуулагша ябаһан. Р.Крапивина Улаан-Yдэ хотодо түрэһэн намтартай. Санкт-Петербург хотодо зүүн зүгэй арадуудай хэлэ бэшэг шэнжэлдэг дээдэ һургуулида эрдэмтэ хүдэлмэрилэгшөөр ажалладаг гээшэ.
Р.Крапивина ажалайнгаа хэрэгээр Ага нютаг ябантуу байдаг. Энэ удаа Ага ерэхэдээ, хоёр хэһэгһээ бүридэһэн бурханай жаяг ёһо гуримууд, һургаалнууд тушаа сугларагшадта хөөрэһэн байна. Лама санаартан, Агын буддын шажанай академиин багшанар, оюутад, мүн ажаһуугшад ерэжэ, тэрэнэй лекции шагнаһан байха юм. Уулзалгын эхиндэ Раиса Крапивина «Ганжуур» ба «Данжуур» номуудай Хитад гүрэндэ хэблэгдэн гараһан тушаа тодорхойгоор хөөрэжэ үгөө. Эрдэмтэн түбэд хэлэ бэшэг, һургаал, номнол шэнжэлжэ, тэрэнээ залуу үетэндэ дамжуулха гэжэ Россиин олон газар нютагуудаар ябажа, лекцинүүдые уншадаг гуримтай. Россида олон хотонуудаар оршодог зүүн зүгэй арадуудай хэлэ бэшэг шэнжэлдэг дээдэ һургуулинуудаар түбэд хэлэ үзэлгые дэлгэрүүлхэ гэжэ оролдодог бэлэй. Энэ шугамаар түһөө түсэбүүдые зохёожо, оюутадай эрдэм һуралсалда нэбтэрүүлдэг. Агын буддын шажанай академидэ оюутадта түбэд хэлэ бэшэг, эмнэлгэ заалгын ажаябуулгада эрхим сэгнэлтэ үгэһэн байна.
Дэлгэрэнгыгээр 43-дахи дугаарта.
