Һая болотор Забайкальскда дуган үгы байгаа. Забайкальскын аймагай ажаhуугшад, hүзэгшэд Согшон дугантай болохоёо шиидэжэ, дид хамба Цырен ламхайда бэшэг бэлдэжэ, зүбшөөлэй гуйлта бариhан байгаа.
Забайкальскын дуган барилган үедэ.
Түрүүн багахан дуган баригдаад, буддын шажанай талаар хэрэг бүтээгдэдэг болоо. Гурбан ламанар иишээ ерэжэ, энэ буянта хэрэг үйлэдэнэ. Мүнөө сагта Сүүгэлэй «Даша Чойпэллинг» дасанай филиалнуудай нэгэн – Забайкальскын дуган сагай ошохо бүри томо, үргэн боложо байна. Дуганда 5 ламанар мүнөө алба хаана. Дуганай даа ламаар Хэжэнгэ нютагһаа уг гарбалтай Цыренов Соёл ламбгай 9-дэхи жэлээ холын газарта буурашагүй буян дэлгэрүүлнэ. Соёл лама ахалагша болоходоо, дуганаа хорёотой болгоо, мааниин дуган барюулаа. Мүнөө Согшон дуганай гурбан дабхартай байшан бодожо байна.
Дуганай 2-дохи ба 3-дахи дабхарнууд һархайн бодоо. Шэтэ, Улаан-Үдэ хотонуудһаа барилгын хэрэгсэлнүүдые захюулжа асаруулһан байна. Барилгада Буряад ороной уран дархашуул хүдэлнэ. Шэтэhээ облицовочно хирпиисэнүүдые худалдажа асаруулаад, ханыень бодхоогоо. Забайкальск тосхоной дуганда Жинсрег хурал хурагдаа. Буряад ороной Ивалгын дасанай Жэд дуганай ламанар уригдажа, хурал хураа юм. Забайкальскын, Бооржын, Приаргунскын, Краснокаменскын аймагуудай hүзэгшэд дуган олоор ябадаг байна. Ажаhуугшадай үргэhэн хандибай ашаар барилгын хэрэгсэлнүүд абтана. Дуганда үдэр бүри Чойжал сахюусан хурагдадаг. Монгол hарын тусхай үдэрнүүдтэ Сагаан Шүхэртэ, Алтан Гэрэл, Отошо, Мандал Шивэ, Сунды, Банзарагша хурагдадаг гуримтай. Ехэ хуралнуудта дугандаа дежурна ламые үлөөжэ, Сүүгэлэй дасанаа ошодог гээшэ.
Дэлгэрэнгыгээр 43-дахи дугаарта.
