Хүшөөгэй нээлгэ баяр ёһололой оршондо үнгэргэгдэбэ. Тус хэмжээ ябуулгада тойрогой болон аймагуудай захиргаануудай түлөөлэгшэд, хүшөө байгуулһан эмхидхэлэй хорооной гэшүүд, Пётр Бадмаевай түрэлхид суглараа.

Табтаанай нютагһаа уг гарбалтай хуасай омогой Пётр (Жамсаран) Бадмаев Агын тойрогой  суута зоной нэгэн юм. Александр III сагаан хаанай үргэмэл хүбүүн, Николай II хаанай гэр бүлын эмшэн, заабаришан, дипломат.

Бадмын Жамсаран хэрээһэ зүүхэ ёһололдоо Петр I хаанай нэрэ шэлэжэ абаад, Александр III хаанһаа обогынь абаа.

Пётр Бадмаев Эрхүүгэй гимнази дүүргэжэ, 1871ондо Санкт-Петербургын университедэй зүүн зүгэй факультет түгэсхэһэн. 1902 онһоо сагаан хаанай табадахи зэргын ноен ябаһан. Тэрэ сагһаа Гадаадын хэрэгүүдэй яаманай Азиин засаг захиргаанда алба хааһан. «Чжуд-Ши» гэһэн түбэд эм бэлдэхэ тухай трактат оршуулһан, түбэд эмшэн юм. Тэрэ Николай  II хаанай гэр бүлын аргашан байгаа. Үбэр Байгалда «П. А. Бадмаев и Ко» наймаагай гэр байгуулһан. «Жизнь на восточной окраине» газетэ гаргадаг байгаа. Ага тосхондо үнэн алдарта шажанай сүмэ байгуулһан.

- «Хорёд жэлэй саана Пётр Бадмаевта хүшөө бодхоохо гээшэ бүтэхэгүй хэрэг байха һэн. Тиимэһээ мүнөө сагта энэ баяр еһолол боложо байһанда бидэ баяртай байха еһотойбди. Наһан соогоо Пётр Бадмаев буряад  арадайнгаа хүгжэлтэдэ ехэ туһа оруулһан юм. Сагаан хаанай дүтын зоной тоодо байхадаа, Санкт-Петербург хотодо буряад хүүгэдтэ үмсын гимнази нээһэн. Тэндэнь нютагаймнай олон суута зон һуража гараад, саашадаа нэрэеэ түүхэдэ оруулһан юм. Мүнөөнэй хүүгэд энэ хүшөө хаража, энэ түрүү хүнэй намтар мэдэхые оролдохо гэжэ һанагдана», – гэжэ Б.Жамсуев хэлээ.

Тус хүшөө Россиин Федерациин габьяата юрист Владимир Цыцыковэй ударидалга доро баригдаа. Түлэблэл зохёоһон архитектор – “Россиин Федерации хүндэтэ архитектор” нэрэ зэргэтэй  Болот Дондоков. Хүшөө бэелүүлгэ нютагаархид дэмжэжэ, эмхидхэлэй хороондо 900 гаран мянган түхэриг оруулаа. Гүрэнэй бюджедһээ нэгэшье солхооб энэ түлэблэлдэ ороогүй. Хүшөөгэй нээлгын баяр ёһололдо эгээ эдэбхитэйгээр хабаадаһан зондо баярай бэшэгүүд барюулагдаа.

Поэт Батожаргал Гармажапов Пётр Бадмаевта зорюулһан «Түрүү хүбүүгээ түүрээлгэ» гэһэн шүлэгөө сугларагшадта уншаа бшуу.

Нэмэжэ хэлэхэдэ, хүшөөгэй байгуулагдаһан газар тон таарама. Юундэб гэхэдэ, һургуулиин һурагшад, тойрогой айлшад болон бусад зон музейн хорёо руу ороходоо, нэн түрүүн Пётр Бадмаевай хүшөө хаража һонирхохо. Хоёрдохёор, хүшөө дүтын түрэл Гомбожаб Цыбиковэй тушаа урдань бодхоогдоо.

You have no rights to post comments