Жэлһээ жэлдэ Агын тойрог дотор захиргаануудай залуушуулай политикын таһагуудта, зүблэлнүүдтэ эдэбхитэй, эрмэлзэлтэй залуу мэргэжэлтэд ерэжэ, залуушуулай хани барисаа улам бэхижүүлхэ зорилготойгоор шармайдаг шуу. Ээлжээтэ «Үетэн» гэһэн хабсаргалтадаа урагшаа һанаатай, оролдосотой залуушуултай, шэнэ нюурнуудтай танилсуулхамнай.
ЕЛИЗАВЕТЫН ХУБИТА НИЛЭЭДГҮЙ ЕХЭ…
Хоёр жэлэй саада тээ Ага тосхоной захиргаанай залуушуулай зүблэлэй түрүүлэгшээр Елизавета Вырупаева томилогдоо һэн.
Елизавета Вырупаевагай хѳѳрэһѳѳр, Ага тосхоной бүхы эмхи зургаанууд руу тосхоной залуушуулай зүблэлһѳѳ бэшэгүүд эльгээгдэһэн байна. Бэшэг соогоо ажалтай үетэнѳѳ залуушуулай зүблэлэй суглаанда урижа, ниитэ хэрэгүүдтэ хабаадахыень, хубитаяа оруулхыень уряалһан байгаа. Тиин «Ариадна» гэһэн коррекционно түбтэ дефектолог мэргэжэлтэй Е.Вырупаева залуушуулай суглаанда ошожо, хэрэгүүдээрнь ехэ һонирхоһон байгаа. Удангүй тэрэ олоной дуугаар түрүүлэгшээрнь томилогдожо, гол ажалайнгаа хажуугаар эндэ хүдэлжэ эхилээ бшуу. Залуушуулай зүблэлэй түрүүлэгшын тэмдэглэһээр, хүдэлхэеэ ерэхэдэнь, залуу хүбүүд, басагад үсѳѳхэн, бүхыдѳѳ 30 гаран хүн байгаа. Олонхинь - һурагшад ба оюутад, тэдэ суглаануудта дуратайгаар хабаададаг, түсэбүүдые табилсадаг юм. Теэд Елизавета басаган, нэн түрүүн, Ага тосхоной үшѳѳ олон залуушуулые суглуулха, һонирхуулха гэһэн зорилго урдаа табиһан байгаа. Мүнѳѳ 100-гаад эдэбхитэйшүүл залуушуулай зүблэлдэ тоологдоно гэжэ Е.Вырупаева мэдүүлнэ һэн.
Тэрэ залуушуулай зүблэлэй ажал тухай иигэжэ хѳѳрэбэ: «Хүдэлжэ байтарни, удангүй Шэтэ хотын «Союз добровольцев России» гэһэн эмхиин хүтэлбэрилэгшэ Кристина Рахманова Ага тосхондо бэлэгүй байдалда ороод байһан зондо туһаламжын түб нээхэ һаатнай, туһалхабди гэжэ хандаһан байгаа. Иигэжэ дэмжэжэ байхадань, бидэ иимэ түб нээхые шиидээбди. Нэгэ хүн бидэниие дэмжэжэ, Татауровай гудамжаар түмэр вагончик түлбэригүйгѳѳр үгѳѳ. Мүнѳѳ тэндэ «Доброцентр» гэһэн склад эдэбхитэйгээр хүдэлнэ. Складта юумэнүүдэй суглархада, мүн эндэ туһаламжа абахада болохо гэһэн соносхолнуудые манай зүблэлэй залуушуул тосхоной гудамжануудаар олон хүнэй мэдэхын тула үлгѳѳ һэн. Богонихон сагай туршада тосхонойхид тэрэ склад тухай мэдэжэ, һайнаараа байһан хубсаһануудые, нарай үхибүүдтэ хэрэгтэй юумэнүүдые (памперс, угжа, ванна, наадхуур) г.м. һайнаар асардаг болонхой. Тиигэжэ долоон хоногой нэгэ дахин складта сугларһан зѳѳри барюулжа, бэлэгүй байдалда байһан гэр бүлэнэртэ туһаламжа үзүүлдэгбди. Тэдэнэр дуратайгаар ерэжэ, хэрэгтэй юумэеэ шэлэжэ абадаг юм. Мүнѳѳ хорёод гэр бүлэдэ туһалаад байнабди. Табан бүлэ хэрэгтэй юумэн тухайгаа ходо һурагшалжа, мэдэжэ байдаг. Минии сүлѳѳ багатай байхада, Агын багшанарай колледжын оюутан В.Ларионова туһалдаг юм.
Мүн «Союз Добровольцев России» эмхиин ашаар Агын 21 бүлэдэ эдеэ хоолой талаар туһаламжа үзүүлээ һэмди. Тэрэ эмхи Шэтын спонсорско дэлгүүрнүүдһээ нэгэ гэр бүлын 10 килограмм эдеэнэй зүйл абаһан байгаа. Тиихэдэнь бидэ ошожо асараад, тараахал үүргэтэй байгаабди. Ага тосхоной захиргаанай толгойлогшын орлогшо В.Ячменёв бидэндэ авто-унаа оложо үгѳѳ. Агын шэнгэн түлишѳѳр хангадаг нэгэ хэды газарнууд тэдхэмжэ үгэжэ, бензин хэхэдэнь, бидэ Шэтэһээ асараад, айлнуудаар ябажа, бултыень тараагаабди. Иигэжэ Шэтэ хотын туһаламжын түбтэй хани барисаатайгаар, бэе бэеэ дэмжээд хүдэлхэдэ, үрэ дүнтэй байнал даа. Саашадаа Ага тосхондо тэдхэгшэдэй олон боложо, бидэнэртэй хүдэлѳѳ һаань, дуратай, баяртай байхабди.
ВЛАДА ЗАЛУУ ГЭР БҮЛЭНЭРЫЕ ДЭМЖЭНЭ
Могойтын аймагай захиргаанай һуралсалай хүтэлбэриин ба залуушуулай политикын таһагай мэргэжэлтэнээр Влада Рабданова хүдэлдэг байна.
Залуу мэргэжэлтэн 1994 ондо Дулдарга һууринда түрэһэн юм. Табадахи ангиһаа Агын гимназида һуража, 2011 ондо алтан медальтайгаар түгэсхэһэн байна. Удаань Санкт-Петербургын гүрэнэй экономическа университедтэ «Финансы и кредит» гэһэн таһагта дүрбэн жэлэй туршада һураа.
В.Рабдановагай тэмдэглэһээр, һая хүдэлжэ эхилхэдэнь, Агын тойрогой Захиргаанай социальна хүгжэлтын таһагай хүтэлэгшэ мэргэжэлтэн-эксперт Р.Гармажапов дэмжэжэ, яагаад, ямар түсэбүүдээр хүдэлѳѳ һаа дээрэб гэжэ ойлгуулһан байна. Тиигэжэ Влада Могойтын залуушуултай, оюутадтай, һурагшадтай дүтѳѳр танилсажа, мүнѳѳ элдэб янзын түһѳѳ түсэбүүдые (элүүржүүлгын акцинуудые - хара тамхинһаа, архиһаа, халдабарита үбшэнгүүдһээ яагаад бэеэ аршалхаб г.м.), КВН нааданай, волонтёрнуудай хэмжээ ябуулгануудые эбтэй эетэйгээр бэелүүлнэ. Владын хэлэһээр, һүүлэй үедэ ажал хэдэг залуушуулай сүлѳѳ сагаа үнгэргэлгэдэ анхарал яһала хандуулагдана.
Дэлгэрэнгыгээр 52-дохи дугаарта.
