Шулуутайнхидай "Наймаа найман хүлтэй" зүжэгһѳѳ хэһэг.
СОЁЛШОДОЙ ГАБЬЯА МҮНХЭ
“Театрай намар-2016” харалгамүрысѳѳ Агын тойрогой Захиргаан болон буряад соёл хүгжѳѳлгын түб эмхидхээ юм. Тиихэдэ заншалта ёһоор тойрогой театрнуудай хүгжэлтэдэ хубитаяа оруулһан мэдээжэ режиссёрнуудай, артистнарай нэрэмжэтэ шангууд барюулагдаа. Иимэ талаан бэлигтэй соёлшодтой байһамди гэжэ мүнѳѳ үеынхид мэдэхэ ёһотой. Тиимэһээ энэ удаа ямар шангуудта хэд хүртѳѳ һэм гэжэ тодорхойгоор бэшэлтэй байна.
Драматическа бүлгэмүүдэй хоорондо «Лучшая режиссура» янзада уран зохёолшо, поэт, артист Батор Цымпилович ЦЫРЕНДАШИЕВАЙ нэрэмжэтэ шан Лхама Балдановада («Туулмаг орооhон» зүжэг) барюулагдаа. Мүн Л.Балданова энэ зүжэгтэ Дариин дүрэ гүйсэдхэһэнэй түлѳѳ Агын Буряадай тойрогой соёлой габьяата хүдэлмэрилэгшэ, режиссёр Юрий Лхамаевич ЛХАМАЕВАЙ түрэлхидэй бэлдэһэн «Лучшая женская роль» шанда хүртѳѳ. Табтаанайн Александр Арбалжинов Ж.Тумуновай «Сэсэгмаа» зүжэг соо Дамбын дүрэ эрхимээр наадаһанай түлѳѳ Россиин Федерациин габьяата артист, Советскэ Союзай болон Россиин мэдээжэ артист Цыден-Доржи Базарович ЦЫРЕНДОРЖИЕВАЙ түрэлхидэй байгуулһан «Лучшая мужская роль» шанда хүртѳѳ. Бүгэдэ буряадай соёл хүгжѳѳлгын нэгэдэлэй вице-президент, Монгол туургата зоной уласхоорондын зүблэлэй гэшүүн, Россиин Федерациин соёлой габьяата хүдэлмэрилэгшэ Баир Будаевич МУНКОЖАРГАЛОВАЙ түрэлхид зүжэгѳѳ эгээл эрхимээр шэмэглэһэнэй түлѳѳ шан сагаан-шулуутайнхидта, тиихэдэ «Лучшая женская роль второго плана» и «Лучшая мужская роль второго плана» шангуудые Согто-Хангилай Жаргалан Базаргуруевта Иван Ивановичай дүрэ («Халуун зурхэн» зүжэг) ба Дашима Цынгуевада Саруулай дүрэнүүдэй түлѳѳ (Д.Цырендашиевай «Үгы гэhэнэй үйлэ тодхор») барюулаа.
Арадай театрнуудай дунда «Лучшая режиссура» гэһэн Россиин Федерациин соёлой габьяата хүдэлмэрилэгшэ, журналист, уран зохёолшо Гарма Анандаевич ЦЫРЕНДАШИЕВАЙ шанда Могойтын Бато Цыденов хүртѳѳ. Жюриин гэшүүдэй үүсхэлээр «Лучшее инновационное решение спектакля» гэһэн шэнэ тусхай шан тогтоогдожо, Агын арадай театрта барюулагдаа. «Лучшее художественное оформление» шан Могойтын арадай театрта хүртѳѳ. «Лучшая мужская роль» шан Россиин Федерациин, Буряадай АССР-эй арадай артист, Агын Буряадай тойрогой, Монгол Улсын соёлой габьяата хүдэлмэрилэгшэ Майдари Хайдапович ЖАПХАНДАЕВАЙ түрэлхид Шулуутайн Бато Жамбаловта Далай Дамбаевай ролиин түлѳѳ барюулаа. Харин «Лучшая женская роль» шан багша, режиссёр Аюша БОРТОЕВОЙ түрэлхид Агын театрай Баирма Бороевада «Ах война, что ж ты сделала подлая» зүжэг соо басаганай дүрэ наадаһанайнь түлѳѳ олгуулба. «Лучшая мужская роль второго плана» ба «Лучшая женская роль второго плана» шангуудые Россиин Федерациин соёлой габьяата хүдэлмэрилэгшэ, режиссёр Балдандоржи Николаевич НИКОЛАЕВАЙ түрэлхид Могойтын Балжир Дамдиновта «Сэсэгмаа» соо Гомбын роль ба Дулдаргын Надежда Ефимовада Прониин роль гүйсэдхэһэнэй түлѳѳ барюулаа.
Агын Буряадай тойрогой соёлой габьяата хүдэлмэрилэгшэ Мункожаргал Жамбалович НОРСОНОВОЙ гэр бүлын тогтооһон «Дебют года» шангаар Зүдхэлиин Зоригто Дашибалов шагнагдаа. Иигэжэ Ага нютагһаамнай гарбалтай суутай соёлшодой нэрэ мүнхэлэгдэнэ. Тэдэнэй түрэлхидэй һайн дуранай артистнарай ажал дэмжэжэ, тойрог дотороо театрай хүгжэлтэдэ хубитаяа оруулалсажа байһаниинь дэмбэрэлтэй үйлэ хэрэг болонол даа.
“АЛИНИИНЬ БУЛЮУ БЭ ГЭХЫН АРГАГҮЙ”
- Ага нютаг омогорхохо ёһотой! Искусствын эгээл һайхан, эгээл һургаалтай, хүмүүжэлтэй, таабарита, шэдитэй хүсэн - театр Агын газар дэбисхэр дээрэ хүгжэлтэтэй, жэлһээ жэлдэ дэбжэжэ байна, - гээд жюриин гэшүүн, ВСГАКИ-гай профессор, РФ-гэй соёлой габьяата хүдэлмэрилэгшэ Дулмажаб Жамсоева тэмдэглэбэ. - Би ажалаараа хизаарайнгаа бүхы аймагуудаар яба- дагби, тиимэһээ сасуулха аргатайб: мүнѳѳдэр Агын тойрог бодото дээрээл зүжэг наадаха, зохёохо, табиха дуратай зоной нютаг лэ даа. Энэ хоёр үдэр театрта дуратай зондо ёһотойл һайндэр болоо. Тиимэһээ бүгэдэ зүжэг наадагшадта баярые хүргэнэб. Харагшад хадаа театрай таһаршагүй нэгэ хубинь болодог. Энэ удаашье харагшад актёрнуудай нааданайнгаа шухалыень онсолхо бүхэндэнь альга ташалгаар, эльгээ хатама энеэдээр угтаа, зарим ушарнуудта нулимсаяа аршан байгаа. Бүхыдѳѳ наада табиһан драматическа 4 бүлгэмэй болон арадай 8 театрай алиниинь бэ даа булюу эрхим коллектив байба гэжэ хэлэхын аргагүй. Юундэб гэхэдэ, коллективүүд элдэб авторнуудай бүтээлнүүдые найруулаа. Режиссёр бүхэн ѳѳрынгѳѳ харасаар али нэгэн хүндүүлхэй асуудал бодхооно. Тиимэһээ табигдаһан зүжэг бүхэн соо ямар нэгэн урагшатай һанал бодол, наадан, үйлэ байгаа...
Дулмажаб Дашицыреновна коллектив бүхэнэй нааданай һайн талыень онсолһон байна. Тэрэнэй тэмдэглэһээр, Агын, Могойтын, Дулдаргын, Шулуутайн театрнуудай зүжэг Шэтын, Москвагай тайзанууд дээрэ миил табихаар, тиимэ үндэр зэргэдэ эдэ коллективүүдэй наадан сэгнэгдээ.
Жамсо Тумуновай “Халуун зүрхэн” рассказ найруулжа, Долгорма Долгоржаповагай табиһан зүжэг согто-хангилайхин харуулхадаа, тэдэнэр манай гүрэн дотор нангин темэдэ - Эсэгэ ороноо хамгаалгын дайнай үедэ хандаа. Хүшэгын нээгдэхэдэ, тайзан дээрэ сэсэглэжэ байһан модон зогсобо. Сэсэглэжэ байһан модон хадаа манай гэрэй, гуламтын, тоонто нютагай һүлдэ мүн. Энэ модоной, саадайнгаа немецтэ хүртэхэгүйн тула зүжэгэй геройн тэрэнээ хюрѳѳдэхэ гэжэ шиидэхэдэ, харагшад эзэлүүдгүй дуһалһан нулимсаяа аршан байгаа бшуу.
Дэлгэрэнгыгээр 47-дохи дугаарта.
