Ноябриин 18-19-эй үдэрнүүдтэ Бадма Цыренович Цыреновэй дурасхаалда зорюулагдажа, дүрэ буляалдаата барилдаагаар Агын тойрогой 16-дахи заншалта мүрысөөн үнгэргэгдөө.
Б. Жамсуев Агын аймагай можын ахамад А. Будажаповта дамжуулгын кубок барюулна.
Энэ удаа тамиршадые ба барилдаанда дуратайшуулые, холын айлшадые Ага тосхон угтан абаа. Хизаарай тамирай түбэй байшан соо тойрогой можонуудай хүдэр шамбай барилдаашадай дүрэ шадал харалга болоо. Мүрысөөнэй нээлгэдэ Агын тойрогой Захиргаанай хүтэлбэрилэгшэ, эмхидхэлэй хорооной түрүүлэгшэ Бато Доржиев, Федерациин Зүблэлэй гэшүүн, хизаарай дүрэ буляалдаата барилдаанай федерациин президент Баир Жамсуев, сенатор Степан Жиряков, мүрысөөнэй ахамад судья Владимир Балданов болон бусад хүндэтэ айлшад хибэс дээрэ уригдаа. Тэдэнэр амаршалгын үгэнүүдые хэлэжэ, барилдаашадта амжалта, харагшадта багжагар хүбүүдэй дүрэ буляалдаа хаража, сэдьхэлээ ханахыень хүсөө.
Нээлгын баяр ёһололой жагсаалда мүрысөөнэй дамжуулгын кубогта 10 дахин хүртэһэн Агын аймагай можо (ахамадынь (капитан) - Жамсо Лхамажапов) түрүүлэн гараа. Тэрэнэй удаа мүрысөөндэ 5 удаа оройлһон Могойтын аймагай можо (ахамадынь – Владимир Жалсараев), Дулдаргын аймагай можо (ахамадынь - Дамдин Тумуров) һубарин гараһан байна. Агын аймагай можын ахамадынь Жамсо Лхамажапов гүрэнэй гимн доро Россиин, хизаарай, тойрогой тугуудые бодхоогоо. Могойтын аймагай ДЮСШ-гай hоригшо Цырендоржи Намсараевта «Хизаарай 2016 оной эрхим hоригшо» гэhэн баярай бэшэг ба дамжуулгын Кубог барюулагдаа. Ага-Хангил нютагай бүхэ, барилдаагаар уласхоорондын классай тамирай мастер Балдан Цыжипов “Забайкалиин хизаарай эрхим барилдаашан” гэһэн нэрэдэ хүртэжэ, Баир Баясхалановичай гарһаа бэлэг абаа. Хибэс дээрэ эдиршүүлэй, эрэшүүлэй, эрэшүүл-ветерануудай урда урдаһаа гаража, дүрэ мэхэеэ, шадал шамбайгаа үзэлсэдэг мүрысөөнүүд Россида хаанашье үнгэргэгдэдэггүй юм. Шэгнүүр бүхэндэ эрхим тамиршад барилдажа, аймагуудайнгаа нэрэ хүндые дээгүүр хамгаалха гэжэ оролдоо. Байгша ондо заншал һэлгэжэ, жээрэбэй ёһоор Могойтын ба Агын аймагуудай тамиршад хибэс дээрэ түрүүн уригдаа. Эдэ хоёр аймагай уулзалга олоной һонирхолтойгоор, анхарал ехэтэйгээр үнгэргэгдэдэг гээшэ. Агын аймагай эдиршүүлэй можо Болот Баясхалановай, Элбэк Базаровай, Бадма Базаровай, Буянто Дугаровай хүмүүжэмэлнүүдһээ бүридөө. Тамиршадые хибэс дээрэ гарахые уряалһан бүреэгэй абяан зэдэлжэ, барабан наяржа, барилдаан одоошье эхилээ. Ургажа ябаһан “улаан бургааһад” очко бүхэнэй түлөө шударгыгаар барилдаа. Эрэшүүлэй уулзалгада Агын аймагай Баир ба Батор Базаровууд, Арсалан Будажапов, Бато Дараев, Жаргал Дамдинов гэгшэд өөһэдынгөө шэгнүүртэ илалтануудые туйлаа. Могойтын аймагһаа Намжил Цыденжапов, Балдан Цыжипов амжалта асараа. Ветерануудай уулзалга хүрэтэр Агын аймаг үсөөхэн тоогоор илажа ябаа. Таби, жара наһаяа дабаһан ветеранууд - Мунко-Жаргал Чимитдоржиев (Ага), Ринчин Долсонов (Могойто) гэгшэд залуу ветерануудтай хараа бараандаа барилдаа. Буряад барилдаагаар мэдээжэ бүхэ Зорик Жамбалов, Баясхалан Бадмаев (хоюулан - Могойто), Бадма Базаров (Ага) гэгшэд мүнөө жэл 36 наһа гүйсэхэдөө, ветерануудай тоодо ороо бшуу. Агын аймагай эдиршүүл, бүхэшүүл, ветеранууд бэрхээр, шударгыгаар барилдажа, могойтынхидые 14:11 тоогоор шүүhэн байна.
Дэлгэрэнгыгээр 47-дохи дугаарта.
