Аба эжын хэрэг үргэлжэлүүлнэ

Согто-Хангил нютагай 34 на-һатай Жаргал Шойдоков гэр бүлэтэеэ үмсэ болохо гэжэ шиидээд, Мухар Харгана гэжэ газарта ажахы байгуулжа, эбэртэ бодо мал үсхэбэрилхэ ажал эрхилнэ. Энэ нангин газарта Жаргалай аба эжы Ринчиндоржи ба Лариса Шойдоковтон гушаад жэлэй хугасаада түрэл ажахынгаа хонин һүрэг арьбадхаһан байна.

«Согто-Хангил» ажахын түрүү хонишон ябаһан улаалзай хүбдүүд омогой Ринчиндоржи Шойдоковые тойрогой малшад һайн мэдэхэ, дуулаһаншье байха. Тэрэ нютаг нугадаа хүндэтэй малшан, түл абалгаар тойрогой абарга, зуутан хонишон ябаһан юм. Жаргал хүбүүнэйнь хөөрэһөөр, абадань Россиин Хүдөө ажахын яаманай, ажахын грамотанууд, баярай бэшэгүүд олон. Мүн олон орден медальнуудшье бии. Малда ябахадань, нютагай, Шэтын можын, гүрэнэй газетэ, телевиденинүүдэй сурбалжалагшад ажахытайнь танилсаһан. Нэгэтэ гүрэнэй уласхоорондын «Russia Today» гэһэн телеканалай сурбалжалагшад ерэжэ, малшадай ажал хэрэгүүд, туйлалтанууд тухай репортаж хэһэн байна. Сибириин ба Алас Дурнын хүндэтэ эрхэтэнэй нэрэ зэргэдэ хүртэһэн. Ринчиндоржи Лодоновичой 2014 ондо гэнтын аюулда орожо, наһанһаа нүгшэхэдэнь, Шэтэ хотодо түмэр харгын ажалда хүдэлжэ ябаһан Жаргал хүбүүниинь нютагаа бусаһан байна.

Шойдоковтоной бүлэ гурбан үхибүүдые хүмүүжүүлһэн байха юм. Жаргал айлай дундахи үри болоно. Дээрээ дахаха, жэшээ абаха Түмэн ахатай. Ахань дунда һургуулиин һүүлээр сэрэгэй албанда абтажа, мүнөө болотор Эхэ орондоо албата уялгаяа дүүргэжэл ябадаг. Контрактнигаар ажалладаг, ахамад прапорщик нэрэ зэргэтэй. Одхон дүү басагатай. Тэрэнь һургуулиин шаби юм.

Жаргал Ринчиндоржиевич хайрата абынгаа эрхилжэ ябаһан хэрэгыень үргэлжэлүүлхэ гэжэ шиидээд, буусыень эзэлжэ ороо бэлэй. Ажахын баялиг – хонин һүрэг харууһалха ажал ябуулха гэжэ оролдожо байтарынь, хүдөөдэ мал харадаг олон танил нүхэдынь үмсэ боложо эхилээ. Тиихэдэнь Жаргал хамтын мал тушаажа, үмсын хамһабариин ажахы боложо, хүдөөдэ ажал хэжэ захалаа. Лариса Дмитриевна эжынь хүбүүнэйнгээ хажууда байлсажа, ажалай баян дүршэлөө дамжуулаа. Жаргал балшар наһанһаа хүдөөдэ үндыһэн, хонидой маараан соо аба эжыгээ дахажа, хара ажалда дүршэһэн юм. Хүгшэн абань - Лодон Шойдоков хонишон ябаһан, тиимэһээ аша хүбүүниинь угаар дамжаһан малшан болоно гээшэ. 

Үргэлжэлэлынь №13 дугаарта гараха.

 

You have no rights to post comments