Агын аймагта 14 бууса галда абтаһан байна, тэрэ тоодо - «Урда-Ага» ажахын Адуун-Шулуунда (Лаха һуурин) оршодог малшадай 3 бууса. Мүнөө Цырен-Доржи Лубсаннимаевай, Александр Галсановай ба Дмитрий Цыденжаповай буусануудта барилгын ажалнуудай 90-ээд хубинь хэгдээд байна.
   - Манай аймагаар абахада, хамтын ажахынуудай 9, үмсын 5 бууса галда абтаа һэн, - гээд Агын аймагай захиргаанай толгойлогшо Жаргал Жапов сентябриин 6-да Лаха нютагай ажаһуугшадтай уулзалга үнгэргэхэдөө мэдээсээ. Уулзалгадань мүн Агын аймагай зүблэлэй түрүүлэгшэ Бэлигто Юмов, «Урда-Ага» хүдөө һууринай захиргаанай толгойлогшо Зоригто Дугаров, энэл нютагай ажахын юрист Цырен-Доржи Цыбенжапов хабаадаа юм. Уулзалгын удаа Жаргал Владимирович һэргээгдэжэ байһан буусануудта барилгын ажалай ябаса шалгаа бшуу. Аймагай толгойлогшын тэмдэглэһээр, барилгашад ажалаа эмхитэйгээр, саг соонь хэжэ байна. 

 

    ГҮРЭНЭЙ ХҮТЭЛБЭРИЛЭГШЫН ХИНАЛТА ДОРО 
   Апрель һарада түймэрэй гарза тоололгын, хойшолонгуудыень усадхалгын асуудалнуудаар Президент Владимир Путинай Шэтэдэ зүблөө үнгэргэхэдэ, хизаарай амбан захирагша Александр Осипов: «Туһалыт даа, энэ талын түймэрые федеральна удха шанартай онсо байдалай зэргэдэ оруулха хэрэгтэй», - гэжэ хандаһан ушартай. Харюудань түймэрэй хойшолон усадхаха хэмжээ ябуулганууд тухай президентын указ апрелиин 26-да «нара» хараа. Тиигэжэ түймэртэ хохидоһон ажаһуугшадта туһаламжа хүргэхэ, заһабарилгын-барилгын ажалнуудые ябуулха зорилгонууд табигдаһан байна. Указай эрилтэнүүд бэелүүлэгдэжэ, галай аюулда ороһон зондо мүнгэн туһаламжа саг соогоо үзүүлэгдээ, үхибүүдэйнь амаралга эмхидхэгдээ. Харин октябриин 15 болотор зайн галай утаһанууд татагдаад, хонишодой буусанууд баригдаад байха болзортой юм. Энэ ехэ хэмжээнэй ажал өөрөө амбан захирагша хиналта дороо абанхай, элдэб шатын засаг зургаанай түлөөлэгшэд үе-үе болоод лэ барилгын ябаса шалгажа байна.
   Адуун-Шулуунай буусануудта барилгын ажалнууд саг соогоо дүүрэжэ лаб үрдихэ.
   - Малшадаймнай гэрнүүд, хашаарнууд, гаражнууд болон зуһалангууд хорёо хашаатаяа, эбэртэ бодо мал, хонин, гахай, адуун алдагдаа һэн. Президентын указай ёһоор, 64 сая түхэригэй түлбэри түймэрһөө хохидогшодто үгтэнхэй, – гээд Агын аймагай толгойлогшо Жаргал Жапов тэмдэглэбэ. – Дэлбэрхэйдэ болон Сүүгэлдэ зургаан айл юушьегүй үлэшоо һэн. Тэдэнэй гурбаниинь Шэтэ дээрэ гэр абаа, гурбаниинь Ага дээрэ гэртэй болохые хүсөө. Зөөриеэ алдагшадта бултандань мүнгэн туһаламжа дары үзүүлэгдээ һэн. Тэрээн бүхэниие бүридхэхэ, эмхидхэхэ ехэ хэмжээнэй ажал байгаа, аймагай болон нютагай захиргаанууд хизаарай захиргаантай нэгэ амин шэнгеэр хүдэлжэ, түсэблэгдэһэн ажалнуудаа саг соонь бүтээжэ байна бшуу. Арбан хоногой саада тээ ябагшаһаамнай хойшо нилээн ажал хэгдээ. Нэгэ буусада гэрынь сонхогүй, хоёрдохидонь – пеэшэн хэгдэжэ байна, бэшэ барилгын ажалнууд дүүрээ.

 

   ҮБһЭЕЭ АБАХА ХЭРЭГТЭЙ...
   Түймэрэй агшан зуура соо хүрэжэ ерэхэдэ, Лубсаннимаевтан өөһэдөө хэрэгээрээ Урда-Агынгаа түб һуурин ошоһон байгаа. Гэртээ гансал Арсалан хүбүүниинь үлэһэн, хогшол зөөриеэ абархаяа забдажа, нюур гараа шаташаһан угтаал даа.
   - Ехэл айгаа һэм, харахаяа болишохонь гү гэжэ һанаагаа зобоо һэм, - гээд мүнөө эжынь хөөрэнэ. – Бидэнэй гэртээ ерэжэ ябахада, түймэр болоно гэжэ хонходоо. «Аа, холо ха юм дээ…» гэжэ һанаа һэмди. Ерэн гэһээмнай...
   Ерэн гэһээнь – гэрынь үгы, 300-гаад хонинойнь хара һэенүүд, тойроод хаб хара, үнэһэн тортог... Тэрэ галынь замдаа Адуун-Шулуунай үшөө хоёр бууса шатаагаад, Таһархай һуурин хүрөө... Энэ – түүхын хуудаһан болоод үлэбэ.

   Мүнөө бууса дээрэ шэнэ модоной үнэр анхилжа, шэнэхэн барилганууд - байшан гэр, гараж, хашаар, зуһаланай гэр, сарай нюдэ хужарлуулна. Шатаһан дээрэнь бэшэ, буусыень халта урилжа, 200-гаад метр хажуу тээшэнь, хуушан трансформаторһаа зайн галай утаһа татахаараар гэрнүүд бодхоогдоо. Байһан худагһаа малшад уһа абаха болоно гэжэ хараада абтаа.

   Миин гараа хантараад байжа һураагүй малшадай шэнэхэн гэр соохи шалаяа өөһэдөө шэрдэхэеэ һанахадань, барилгашадынь «үгы, өөһэдөө хэхэбди» гэжэ арсаа. Теэд тэрээншьегүйгөөр малшадай мүнөө һабандаха ажалынь урдаа орохоор бэшэ, шухалань, үбһэеэ абаха хэрэгтэй. Тойроод шатаһан газарайнь ногоо хажуур абанагүй. Хүршэ Оловяннын аймагай дэбисхэр дээрэ арендээр газар абахадань, ажахын хүтэлбэри хамһалсаһан байжа, мүнөө Лубсаннимаевтан урма зоригтойнууд, тэндээ туха сүлөөгүй үбһэ хуряажа байна.

You have no rights to post comments