Олон хүн энэ албан мэдэхэ, хандаһан, туһа абаһан байдаг. Эндэ полициин 2 ажалтад, гражданска алба хаадаг 3 болон ажалай хэлсээгээр 1 - хамта 6 хүн хүдэлдэг юм. Тэдэ Россиин Федерациин дэбисхэр дээрэ нүүжэ ерэгшэдэй түбхинэжэ, бүридхэлдэ ороходонь туһалдаг, 14 наһа гүйсэһэн зондо Россиин эрхэтэнэй паспорт хэдэг, 20, 45 наһатай болоходо, паспортыень һэлгүүлжэ үгэдэг юм. Хари гүрэнэй эрхэтэдые бүридхэжэ, тэдэнэй Россиин Федерациин дэбисхэр дээрэ бүридхэлэй ба паспортна журамтай байхыень хинажа байдаг. Гадна хари гүрэнэй шэнэ үеын паспорт хэхэ, хари гүрэнэй эрхэтэдтэ Россиин Федерацида саг зуура ажаһууха, али эндэхи эрхэтэнэй данса абахада, зүбшөөл үгэдэг юм.

Гүрэнэй болон муниципальна хангалта (услуги) тухай федеральна хуулиин ёһоор, гүрэнэй хангалта электронно аргаар хэгдэдэг болоһон, харин Агада энэ арга 2016 онһоо дүүрэн бэелүүлэгдэжэ эхилээ. Агын албанай 2019 оной ажалай дүнгөөр, хандаһан эрхэтэдэй 90 хубинь хангалта һайнаар үзүүлэгдээ гэжэ сэгнэһэн байна, 70 гаран хуби зон мэдүүлгэ «Госуслуги» порталаар хээ. Олон үүргэтэй түбтэ (МФЦ) зарим мэдүүлгэнүүдыень абадаг болоһон. Хэрбэеэ хари гүрэнэй паспорт хэхэеэ гүрэнэй хангалтын портал руу хандабал, гүрэнэй татабаритай хангалтада 30 хуби хүнгэлэлтэ байдаг. Яһала эли бодо хүнгэлэлтэ болоно, жэшээнь, хари гүрэнэй паспорт абахын түлөө 5 мянган түхэриг түлэхэ һаа, «Госуслуги» порталаар хандабал, 3500 түхэриг түлэхэ болоно. Хүүгэд 3500 түхэригэй орондо 1750 түхэриг түлэхэ бшуу. Саг зуурын энэ хүнгэлэлтэ 2021 он болотор хэрэглэгдэхэ. Миграционно албанай приёмно соо интернедтэй компьютер бии, хэншье ерээд, мэдүүлгэ бэшэхэ аргатай. Хэншье хари гүрэнэй 2 паспорт абаха эрхэтэй, шэнэ түхэлэй 10 жэлэй хари гүрэнэй паспорт үгтэдэг болоһон. Россиин Президентын 2020 оной апрель һарын 274-дэхи, 275-дахи Зарлигуудаар, 20, 45 наһатай болоһон зон паспортнуудаа һэлгүүлжэ үрдеэгүй байбал, 2020 оной февралиин 1-һээ июниин 15 болотор болзорой харюусалгаһаа сүлөөлэгдөө.

«Ямар журам эбдэлгэ дайралдадаг бэ гэхэдэ, наһанайнгаа болзор хүсэхэдөө, баримтануудаа хубилгахадаа, жэшээнь, обогоо һэлгүүлхэдээ, саг соогоо паспортаа һэлгүүлдэггүй зон бии. Олон хүн мэхэбшэ (фиктивнэ) бүридхэлдэ ородог байна. Жэшээнь, Амидхаашада байдаг аад, хүүгэдээ Агын сэсэрлигтэ гү, али һургуулида оруулха зорилготойгоор Агада ажаһуудаг айлай хаягаар бүридхэлдэ ороно. Бүридхэлдэ ороһон, тэдэниие оруулһаншье эрхэтэндэ Россиин Уголовно кодексын 322.2 ба 322.3-дахи статьянуудаар уголовно харюусалга тохогдохо. Жэшээнь, «Олерон» компаниин хүдэлжэ эхилһээр, олон хүн «Манай гэртэ үлүү хүн бүридхэлдэ абтаатай, тэдэ зөөжэ ошоһон, гаргагты», «Хүнэй бог шоройн түлөө түлэхэгүйбди» гэжэ олон хүн хандана.

Мүнөө жэлэй эхинһээ Монгол болон Хитад гүрэнүүдэй 1-1 хүнэй Россиин эрхэтэд болоходо, паспортнуудыень барюулаабди, баяр ёһололой оршондо тэдэ тангаригаа үгөө һэн. Казахстанай нэгэ ажаһуугша гэртэхинэйнгээ тоонтодо - Агада түбхинэхэ, Россиин эрхэтэн болохо гэһэн ябуулга хэнэ. Дансануудынь бүтээ, һаядаа барюулхабди.

Дактилоскопическа (хурганай хээгээр хүниие танидаг эрдэм) бүридхэл ажалайнгаа талаар олон эмхинүүдэй хүдэлмэрилэгшэд – полициин, МЧС-эй г.м., гадна уголовно хэһээлтэдэ байһан зон заатагүй гарадаг юм. Энээнһээ гадуур өөрын дураар хэншье тус бүридхэл гараха аргатай. Ажабайдалда элдэб ушарнууд тохёолдожо магад, жэшээнь, хүн бүхыгөө мартаба, тиихэдэ хэн гээшэб гэжэ элирүүлхээр байха. Гүрэнэй мэдээ баримтануудай бааза соо ороод, хазагай баримтын байбал, буруу байһыень хурганай хээгээр баталха аргатай болоно. Хулгайн болоходо, мүрдэлгын бүлгэмтэй экспертнүүд ошодог. Жэшээнь, гэр сооһоо сонхоор юумэ хулуужа гаргаһан байгаа һаань, сонхын рамаһаа хурганай мүр сараа абажа, баазаар шалгадаг. Нээрээшье, хэдэн олон ушарта тус арга туһалаа», - гэжэ Эрдэм Дармаевич хөөрэнэ.
Миграционно албанда хари гүрэнэй эрхэтэд апрель, май һарануудта хандаагүй. Тэдэнэй журам эбдэхэгүйень хинажа, һэргылэлгын ажал миграционно албан үргэлжэ ябуулжа байдаг. Засаг зургаанай эмхинүүдтэй – судебнэ приставүүдтэй, эр-хэтэнэй байдал бүридхэдэг таһагтай, нютагаа өөһэдөө хүтэлбэрилдэг эмхинүүдтэй г.м. нягта холбоотой хүдэлдэг. Эрдэм Дармаевичай хөөрэһөөр, тэдэ оперативно-һэргылэлгын ажалда МВД-гэй структурануудтай суг хабаададаг. Жэшээнь, дулаан хаһын эхилхэдэ, олон хүн «сапожниковия растопыренная» ургамалай үндэһэ малтахаяа гарадаг болонхой. Агын полициин 4 таһагайхид рейднүүдтэ гарана. Тус үндэһэ бэлдэдэг, хадагалдаг, худалдажа абадаг зондо Үбэр Байгалай хизаарай хууляар административна харюусалга хараалагдаһан юм.

«Бидэ эрхэтэдэй персональна баримтануудые хадагалагшад болонобди. Федеральна хуулиин ёһоор, гансал найдамжата зургаанай асуултада (запрос) харюусажа, мэдээсэл үгэхэ эрхэтэйбди, ажалнай ехэ харюусалгатай, юундэб гэхэдэ баримтанууд нюуса удха шанартай юм», - гэжэ полициин майор Эрдэм Цынгуев тэмдэглэнэ.

Агын миграционно албанайхид эбтэй эетэйгээр, ажалдаа нарин нягтаар, харюусалгатайгаар хандажа, һайн дүнгүүдые харуулдаг байна. Сүлөө забдагүй үдэр бүхэндэ хэдэн олон хүнэй орёо асуудал анхаран шиидхэдэг, ганса дансануудтай хүдэлдэг бэшэ, арад зоной амгалан байдалай түлөө полициин оперативно-һэргылэлгын ажалда амжалта түгэс хүдэлдэг албан юм.

You have no rights to post comments