Айдар Дондоков - Агын тойрогой гимназиин «Фараоны» гэһэн КВН-эй бүлгэмэй гэшүүн:
- Би 2001 ондо «Нарһан» лагерь амархаяа ошоо һэнби. Тэндэ Дамдин Батуев, Золто Эрдынеев г.м. залуу багшанар вожатануудаар хүдэлдэг һэн. Тэдэ КВН наададаг байжа, энеэдэтэй сценкэ, миниатюрануудые харуулдаг байгаа. Тэрэл ондо би гимназида һурахаяа ороод, талаан боложо, Дамдин Баторовичтай уулзажа, КВН-эй бүлгэмдэ ороо бэлэйб.
Бүлгэмэймнай хүтэлбэрилэгшэ Дамдин Баторович, аха гэшүүд намда эрхим жэшээ боложо, юумэ заажа, харуулжа үгэдэг һэн. Нэгэтэ Буряад оронһоо суута КВН наадагша Марк Николаев ерэжэ, мастер-класс харуулаа һэн. Иимэ шанартай олон хэмжээ ябуулгануудта ябажа, би хүн болооб гэжэ һанадагби.
КВН наадан намайе тон түрүүн һайн нүхэдтэй болгоо. Ганса «Фараоной» бэшэ, ондоо мэеэрхэлдэгшэ (соперники) бүлгэмүүдэй гэшүүдтэй мүнөөшье болотор нүхэсэдэгби. Хоёрдохёор, зон соо ябажа һурааб. Яагаад хүндэ хандахаб, һанаһанаа зүбөөр хэлэхэб, түргэн харюу үгэхэб г.м. дүршэл дадалтай болооб. КВН-дэ наадажа, би дуу дуулажа, хатаржа һурааб. Тойрогой лигын финал шүүжэ, хоёр дахин Бүхэроссиин «Океан» лагерь ошоо һэнби. «Молодёжь Аги» эмхиинхидтэй тойрогой һуурингуудаар миниатюрануудые харуулжа ябаабди. Мүнөө һанахада, гоёл байгаа.
Маанад болон Могойтын 2-дохи дунда һургуулиин «Горячие головы» бүлгэм олон жэлэй туршада хэмнай һайнаар шоглоноб гэжэ мүрысэжэ байгаабди.
Мүнөө би Эрхүү хотодо ажаһуудагби, инженер-барилгашан мэргэжэлтэйб. КВН-эй һургаал мүнөөшье болотор намда хэрэгтэй байдаг, ажалдам бүришье.
КВН-эй үдэрѳѳр дашарамдуулан, тойрогой лигын эмхидхэгшэдтэ, наадагшадта амжалта, улам ехэ хүгжэлтэ хүсэхэ байнаб. КВН наадаһан хүн ерээдүйнгээ ажамидаралда бэлэдхэлтэй болодог юм.
Батор Дамдинов - Агын 1-дэхи дунда һургуулиин «Юта» бүлгэмэй капитан:
- 2002 ондо 6-дахи ангиин байгаад, харгын аюулда ороо һэнби. Аргашад намда хүндэ юумэ үргэхэгүй, физкультураһаа «холуур ябаха» гэһэн зууршалалга үгөө. Үүри нүхэдэйнгөө тамирай секцинүүдтэ ябахадань, би гэртээ һуудаг байгааб. Жэл үнгэрѳѳд, һургуулидамнай ангинуудай хоорондо КВН наадан болоо. Тэрэл минии наһанда гол хубилалта оруулаал даа. Манай бүлгэм тиихэдээ илажа гараа һэн. Тэрэнэй һүүлээр һургуулиин КВН-эй хүтэлбэрилэгшэ Золто Эрдынеев намайе бүлгэмдѳѳ уряа. Саашадаа би КВН орхёогүйб, мүнөөшье болотор наададагби.
Агын тойрогой лигын һүүлээр би Бүхэроссиин «Океан» лагериин, мүн Красноярск хотодо болодог түб Азиин лигэнүүдтэ, Сочидо болодог фестиваль болон бусад наадануудта хабаадаһанби. Тэндэ олон нүхэдтэй болооб. Тиигэһээр Аюша Нанзатовтай «Кобзон» гэжэ дуэт байгуулжа, ТНТ каналаар гарадаг «Comedy Баттл» түлэблэлдэ хабаадааб. Саашадаа би хэмжээ ябуулгануудые хүтэлэн ябуулагшаар хүдэлжэ эхилээд, мүнөө болотор гэр бүлэеэ даагаад ябанаб. Һанаад үзэхэдэ, энэ наадагүйгөөр минии наһан ехэл борошог байха һэн ха.
Минии КВН наадажа эхилһэн сагые мүнөө сагтай зэргэсүүлхэдэ ондоо даа: мүнөө интернет соо шог, хошон үгэнүүд, энеэдэтэй ушарнууд олоор табигдаһан байдаг. Харин КВН-дэ харагшадые һонирхуулхын тула шэнэ юумэ һанаха ёһотой юм. Тиимэһээ КВН наадахада хүндэ болоод байна. Мүнөө КВН наа-дажа эхилжэ байһан зондо өөртөө этигэлтэйгээр ябахыень хүсэнэб.
Дмитрий Блохин – Могойтын 2-дохи дунда һургуулиин «Горячие головы» бүлгэмэй, Үбэр Байгалай «Гураны» бүлгэмэй капитан:
- Би багаһаа телевизорээр КВН хаража гоёшоодог һэнби. 14 наһатайдаа өөрөө наадажа туршахаяа һанаад, нүхэдтэеэ бүлгэм байгуулаабди. Тэрэ сагта маанадые бэлдэхэ хүн үгы байгаа. Өөһэдөө шогуудые бэшэжэ, дуунуудые хубилгаад, тайзан дээрэ гарадаг байгаабди. Һүүлээрнь һургуули дүүргэһэн ахатан ерэжэ, заажа, харуулжа үгэдэг болоо, олон хүтэлбэрилэгшэд һэлгээ һэн. Һургуулияа дүүргээд, бидэ КВН наадаяа орхёогүйбди. Түрүүн Үбэр Байгалай хизаарай лигэ шүүжэ, Сибириин лигэдэ абарганууд болоод, ябан ошон «Гураны» гэһэн бүлгэм бии болгообди. Сочи хотодо болодог фестивальда хабаадажа, Премьер лигэдэ наададаг болоо һэмди. Һүүлээрнь Дээдэ лигэдэ орообди. Маанадай тон ехэ туйлалта хадаа энэ лигын хахад финалда хүрэһэмди, хажуугаарнь Светлогорск хотодо үнгэргэгдэһэн «Голосящий КиВиН» хүгжэмэй фестивалиин «Малый КиВиН в светлом» шанда хүртөөбди.
КВН минии наһанда ехэ нүлөө үзүүлээ гэжэ һанадагби. Росси дотор үнгэргэгдэһэн наадануудта ябажа, газар харахаһаа эхилээд, хатуу, хэсүү ушарнуудые шиидхэхэ аргатай, анда нүхэдтэй болооб. Наһанайм нүхэр баһал КВН-дэ наададаг. Үнэхөөрөө би энэ нааданда доро дохиноб.
Мүнөө сагта КВН түргэн наадан болоһон байна. Маанадай наадажа эхилхэ сагта шог зугаа яарангүйгөөр, бахархан байжа, харагшадта харуулдаг һэмди. Мүнөө тиимэ юумэ харуулаа һаа, булта унтан алдаха. Тиимэһээ мү-нөөнэй наадагшадта һанаһан юумэеэ хээд, наадаяа орхингүй эрмэлзэгты гэжэ хүсэхэ байнаб.
Ринчин Гармажапов - Агын тойрогой КВН-эй лигын юрэнхылэгшэ:
- Жэл соо КВН-ээр тойрогто 3 наадан үнгэргэгдэдэг. Тон түрүүн гурбан аймагта фестивальнууд болодог, тэндэ гурбан түрүү һуури эзэлһэн бүлгэмүүд хахад финалда наададаг. Тэрэ нааданай эрхимүүд тойрогой лигын абаргын нэрэ зэргэдэ хүртэхэеэ финалда наададаг юм.
Тойрог дотор 15 бүлгэм бии. Наадануудта булта эдэбхитэйгээр хабаададаг. Тон урагшатайнуудынь гэхэдэ, гимназиин «Фараоны», Могойтын 2-дохи дунда һургуулиин «Горячие головы», Могойтын 1-дэхи дунда һургуулиин «Земляне», Гүнэйн «ОПГ», Ушарбайн «Проспект смеха» г.м. тойрог дотор болон Үбэр Байгалай һургуулинуудай лигын илагшад ба эрхимүүд юм. Нэмэхэдэ, тойрогой КВН-эй бүлгэмүүдэй олон гэшүүд һургуулияа дүүргэжэ, дээдэ һургуулинуудта саашадаашье КВН наа-дажал, хүүгэдые бэлдэжэ, өөһэдыгөө харуулжал ябадаг.
Олон жэлэй туршада тойрогой КВН-эй лигэ ябуулагшад гэхэдэ, би хүтэлбэрилэгшэньби, редакторнууд - Болот Батожаргалов, Баир Жамсоев, эмхидхэгшэд - Милена Фотина, Нима Дашицыренов, аймагуудай болон залуушуулай хэрэгүүдээр мэргэжэлтэд болоно.
Минии һанахада, КВН шангахан һургуули болодог. Тайзан дээрэ наадана гүш, эмхидхэнэ гүш, бэлдэлсэнэ гүш, али миин харана гүш - хадуужа абахаар юумэн заабол байха. Тойрогой лигын юрэнхылэгшын зүгһөө КВН-эй уласхоорондын үдэрѳѳр дашарамдуу-лан, тойрогой КВН наадагшадта энэ хэрэгээ орхингүй, амжалтада хүртэжэ ябыт гэжэ үреэхэ байнаб.
