Дулдаргын аймагай захиргаанай залуушуулай политикаар гол мэргэжэлтэн Милена Фотина хахад гүрэнөө ябаһан хүн. Харгалзалга доро байгшадтаяа дүршэлөөрөө хубаалдажа байдаг. Аймагайнгаа хэмжээ ябуулгануудые хүтэлэн ябуулдаг.

Милена Шэтэ хотодо 25 жэлэй саана түрэһэн. Хара багаһаа гэртэхинтэеэ Орловск тосхондо ажаһууһан. Тэндээл һургуулида ороһон. Басаган эжынгээ үншэн хүүгэдэй гэртэ хүдэлдэг байхада, ажалдань ошодог байгаа. Тиихэдээл тэндэхи хүүгэдэй гэртэхи ажабайдалай шэрүүнтэй танил болоһон байгаа. Тиимэһээ арга шадалаараа тэрэ байшанай хүүгэдые һамааруулха, тэдэнтэй бэе бэеэ ойлголсохо, наадаха, ямар нэгэн хэмжээ ябуулга эмхидхэхэ гэжэ оролдодог һэн. Тиигэһээр сэбэр шарайтай басаган тайзан дээрэ хэмжээ ябуулга хүтэлхэ шадабаритай болоһон байна. Юһэдэхи ангиин һүүлээр Милена Ага тосхон ерэжэ, үдэшын һургуулида һуралсалаа үргэлжэлүүлээ. Хажуугаарнь «Агинские волны» радиогой виджейерэй ажал хэжэ эхилһэн.

Һургуули түгэс-хөөд, Милена Агын багшанарай колледжын эхин шатын ангинуудай багшын факультедтэ ороо. Хоёрдохи жэлээ тэндэ һуража байтараа, Владивосток хото «Океан» гэһэн Бүхэроссиин хүүгэдэй лагерьта вожатануудые бэлдэлгын һургуулида ошоһон байна. Вожата болоод, хоёр жэл тэндээ Россиин болон хитад, вьетнам хүүгэдтэй хүдэлһэн. Тэрэ сагта зониие дахуулха, һонирхуулха, хэмжээ ябуулга хүтэлэн ябуулха болон бусад шадабаринуудаа, журамаа улам мүлиһэн.

- Минии һанахада, «Океанай» вожатануудай «Живи, твори, мечтай» гэһэн гол хараа бодол намда тон тааруу. Тэндэ би олон юумэндэ һураһан байнаб, - гэжэ Милена хэлэнэ.

Ажалайнгаа хажуугаар Милена «Синергия» университедэй оюутан боложо, дистанционно аргаар «Юриспруденция и уголовное право» гэһэн мэргэжэлтэй болоо. Дээдэ һургуулиингаа багшанарай иигэжэ хэлэһэн: «Амжалта туйлахын тула шунал хэрэгтэй. Шуналаа хүсэлдүүлбэл, амжалта бэшэ юм гү? Амжалтатай ябахань бэлэн: урдаа түсэб табяад, жааха жааханаар бүтээхэ ёһотой» үгэнүүдые хадуужа абаад, тобшохон найруулга болгоһон.

Нютагаа бусахадань, дүй дүршэлтэй болоһон залуу басаганда Могойтын хүдөө ажахын техникумдэ хүмүүжүүлгын талаар багшын тушаалда урилга ерэбэ. Тиин Милена Могойто руу зөөжэ, багшын ажал эхилһэн юм. Техникумдэ хүдэлхэ сагтаа «Молодёжь Аги» эмхиин гэшүн болоһон байна. Энэ эмхиинхидтэй Милена Барнаул, Омск, Казань, Липецк, Астана болон бусад хотонуудта болоһон элдэб хэмжээ ябуулгануудта хабаадажа, олон янзын шангуудта хүртэһэн.

Техникумдэ хүдэлжэ бай-тарынь, Миленын дүү басаган шанга үбшэндэ нэрбэгдээ. Тиин дүүгээ аргалхын тула ажалһаа болижо, хоёр жэлэй туршада мүнгэ бэдэрэлгын ажал ябуулаа юм.

Дүүгэйнгөө бараг болоходо, Дулдаргын захиргаанда залуушуулай политикаар гол мэргэжэлтэн боложо ороо. Дулдаргын эдэбхитэдтэй «Буян» гэһэн волонтёрнуу-дай бүлгэм байгууланхай.

Дулдаргадаа Милена хадамда гараад, мүнөө декретнэ амаралтада гараһан байна.

- Би наһаараа миин һуужа үзөөгүйб. Ходо өөрыгөө намнажа, заража, урагшаа ябахые оролдодогби. Олон түсэбүүдээ бэелүүлээшье һаа, һанаан соогоо ехэ амжалтада үшөө хүртөөдүйб гэжэ һананаб. Үшөө олон һанамжа бодолнуудни бэелүүлэгдээдүй байна, - гээд Милена хэлэнэ һэн.

You have no rights to post comments