Хори гаран жэлэй саада тээ нэгэ үеын хэдэн залуу айлнууд гэр бүлѳѳрѳѳ үелжэ, хүхюутэй зугаатай һуугша бэлэйбди. Үри хүүгэд багашагууд. Айл бүхэн мотоциклтай. Зунай зулгыхан сагта амаралтада булта гаранхайнууд, бэе бэеһээ үлэхэгүй гэжэ огородоо ажаллахаш, алим жэмэс түүхэеэ мотоциклнуудаараа урилдан, ой гарахаш. Бүхэли үдэр ябажа олоһон, түүһэн олзодоо омогорхон, гэртээ шаг шууяатай бусахаш.
Зунай нэгэ үдэр булта сугларжа, Балдандугарайдаа ошобобди. Гэртэнь хүсэд орожо үрдеэгүй байтарнай, Наташа (гэрэй эзэн эхэнэр) угтан, бидэниие огород руугаа оруулжа:
- Харыт энэ үгэрсыемнай, - гэбэ.
Теплицэ соо үндэр гэгшээр жэрылдэн ургажа, үгэрсэ үгэжэ байһан арбаад эшэ «үсэгэлдэр бидэниие бүхэли үдэрѳѳр орхёод, хайшаа зайгаабши?» гэжэ эзэндээ гомдоһондол гунхайлданад.
- Энэ үгэрсэтнай яашаба гээшэб? Халуунда шаташаба гээшэ гү? Али хорхой шумуулда барюулшаба гээшэ гү? - гэжэ үрдилдэн һурабабди.
- Үгы. Энэ - эдэ хоёрой ажал, - гэжэ үхибүүд тээшээ зааба.
- Эдэш яагаа юм? - гэлдэбэбди.
- Үсэгэлдэр нэрһэ түүхэеэ ошоходоо, эдэ хоёрто үгэрсэеэ үндэһэн доогуурнь һайнаар уһалаарайгты гээд гараа һэмди. Үглѳѳгүүр теплицэ руугаа орон гэһээмни, үгэрсымни эшэнүүд булта наршылдашанхайнууд байба. Гэртээ гүйжэ ороод: «Юундэ үгэрсэеэ уһалаагүйбта?!» - гэжэ шангарбаб. Тиихэдэм: «Бидэ танай хэлэһээр, һайнаар уһалаалди», - гэжэ хүбүүмнай хэлэбэ. «Теэд яагаад уһалаабта?!» - гэжэ бүри шангарбаб. «Хүрзѳѳр үгэрсын эшэ дээшэнь үргэхэдэм, дүү басагамни хүнэгѳѳр дүүрэн уһа нүхэ руунь адхадаг байгаа. Тиихэдэнь би үгэрсынгѳѳ эшэ һѳѳргэнь һууридань табидаг байгааб», - гэбэ хүбүүмнай. «Хаанаһаа үгэрсын эшэнүүдые хүрзѳѳр малтахаяа һанаабши?» - гэхэдэм, «теэд та ѳѳрѳѳл үгэрсэеэ һайнаар «под корень» уһалаарайгты гээ бэшэ һэн гүт» гээ, - гэжэ Наташынгаа урмаа хухарангяар хѳѳрэхэдэнь:
- Эдэшни бүхыгѳѳрѳѳ оролдожол, ойлгоһоороол уһалаа ха юм даа. Теэд мэдэхэгүй байхадаа, яаха гээшэб? - гэлдэн, Балдандугартанайнгаа үхибүүдэй үгэрсэеэ уһалхыень нюдэндѳѳ хаража байһандал, унажа бодожо байжа энеэлдэбэбди.
Тэрэ жэл Наташамнай үгэрсэ дараһан юм гү, али үгы гү, һанагшагүйб. Зүгѳѳр энэ ушар оройдоошье мартагшагүйб: зундаа үгэрсэеэ уһалха бүрим һанаандамни орогшо.
Дэлгэрэнгыгээр 1-2-дохи дугаарта.
