Харанхы барга сагта манайхин
Хан гэхэ зэдгүй бэлигтэй хүбүүдээ
«Харгын талаанай» түхэригүүдээр
Хамhажа замдань түхеэрдэг байhан…
Тэрэ саг үнгэрөө (харанхыл hэн даа),
Тэхэришэгүйгөөр ошон ошоо.
Хубилалтагүй, тэрэл зандаа
Хуушанай энээхэн ёhо үлэшоо.
Бардам хүсэлэй хүсөөр дуудуулан,
Баруун тээ hурахаа зориhон зоноо –
Хармаануудаа дуратай уудалан,
Харгын талаангаар үдэшэнэл мүнөө.
Арсаа hаашни – наhанай гомдол,
Алмай, бүдүүрхүү ябадал гэхэл.
Арадай найдал – тоншье хүндэл,
Арадай найдал – жаргама ехэл!
Бишье нэгэтэ иигэжэ мордолойб,
Бишье иимэ хүндэдэ хүртэлэйб.
Холын Москва дуудажа байгаа,
Хонхото моридни заадажа байгаа!
Ганса бэшэб даа – олон хүн замаа
Гайхашаан, баясан иигэжэ эхилээ.
Хахасаан дээрэ нютагайхидни намай
Харгын талаангаар, харгын талаангаар үдэшэлэй…
Баяртай, баяртай! Морид шамдана,
Бархан уулын хормой зубшан.
Баруулжаа! Байгал харагдана,
Байсата эрьеэ нэрьесэ нэшэн.
Иигэжэ тиихэдэ хубияа бэдэрэн,
Эхин түрүүшын дабаа дабалайб.
Баатар хүсэ сээжэдээ мэдэрэн,
Баргажан нютагhаа гаража ябалайб.
Хүндэхэн замые шэлэнхэйб наhандаа,
Хүлhэ адхалган тоогүйл гэнэм.
Абьяаста зорилго табяад урдаа,
Алхам бүхэнөө тэмсэлээр абанам.
Хамаагүй, шуурганшье шууяг бусалжа,
Хара hанаатаншье бодог лэ тулан –
Ханилжа намтаяа ходо ябахалши,
Харгымни талаан, харгымни талаан!
Хорлой космонавт болохо гү?
Хорлой мүнөө арбаяа хүсэнхэй,
Космонавт хожомынь болохоб гэнхэй.
Һарьдаг үндэрөөр ниидэхэ хараатай,
Һара, Нарые тойрохо hанаатай.
Аажам дэлхэйдэ нэрээ нэрлүүлжэ,
Алтан медаль сээжэдээ зүүжэ,
Улаан талмайн нангин ендэрhээ,
Уран гранит Мавзолейн үндэрhөө
Арад олоноо амаршалха хүсэлтэй…
Айхабтар hайн түсэб гэлтэй!
Гансал Хорлой нэгэхэн муутай,
Гараашье хүбүүнэй хүдэлгэхэнь залхуутай.
Хүлөөшье хүбүүнэй татахань түбэгтэй,
Хүндэшэг уусатай гэжэ нэрэтэй.
Нюураа угаагаад, хүзүүгээ мартадаг,
Нюдаргаараа хамараа аршадаг,
Урогоо бэлдэжэ hуугаа гэжэ үгы,
Уhа түлеэшье оруулжа үгэхэгүй.
Унтаха эдихэ хоёртоол Хорлой
Улаан мяхан юм, hонирхолтой!
Хорготой шүлөө эдижэ хороогоод,
Хонин хүнжэлөөр бэеэ орёогоод,
Үүрэйшье сайтар одо мүшэд руу
Үгөөрөө элихэ шадалтайл, хүхирүү...
Иигэжэ ябаа hаа, шагна, хүбүүхэн,
Илалта дабахашни тон хэсүүхэн.
Һарада, Хорлой, хүрэхэгүйлши зүндөө:
Һанааншни hарьдагта аад,
Хүлшни – хүнжэлдөө!
Николай ДАМДИНОВ.
