Хабарай дунда һарын 11-эй үдэр Агын тойрогой Захиргаан соо уласхоорондын «Алтаргана» нааданда Үбэр Байгалай хизаарһаа хабаадаха түлѳѳлэгшэдые бэлдэлгээр эмхидхэлэй хорооной зүблѳѳн татагдаа. Тойрогһоо түрэл хизаараа түлѳѳлжэ, 400-гаад хүн хабаадаха гэһэн уридшалһан мэдээн бии.
Зүблѳѳндэ тойрогой Захиргаанай толгойлогшо Бато Доржиев, хизаарай правительствын социальна асуудалнуудаар түрүүлэгшын орлогшо Аягма Ванчикова ба соёлой министр Елена Михайлова, туснааданда бэлдэлгээр бэшэшье харюусалгата нюурнууд хабаадаа. Хоёр жэлэй нэгэ удаа эмхидхэгдэдэг, ябан ошон 14 зохёохы конкурсһоо, тамирай үндэһэн 6 янзын мүрысѳѳнһѳѳ бүридэдэг болоһон «Алтаргана» наадан Шэнэхээнһээ бэшэ орон нютагуудта - буряад-монгол туургатанай ажаһуудаг газарнуудта ээлжэлэн болодог гээшэ ааб даа. Тиигэжэ мүнѳѳ жэл Эрхүүгэй можынхид энэ фестивальда хабаадаха олон тоото айлшадые угтаха юм. Хэзээшье, олон мүрысѳѳтэй ехэ хэмжээнэй һайндэртэ эртээнһээ, хэдэн һара урид, бэлэдхэл ябуулжа эхилдэгынь эли: Бато Сайнсакович фестивальда бэлэдхэлээр Монгол, Хитад гүрэнүүдэй, Буряад ороной түлѳѳлэгшэдэй хабаадалга-тайгаар Эрхүү хотодо мартын 23-да болоһон уласхоорондын хорооной зүблѳѳнэй дүнгүүд тухай хѳѳрѳѳ. Тэндэ хабаадагшад «Алтаргана» наада эмхидхэхэ асуудалнуудаар өөһэд өөһэдынгөө һанамжа, дурадхалнуудые оруулаа, эмхидхэгшэд олонхи ажаглалта, дурадхалнуудые дэмжэһэн байна. Шэлэлгын конкурснууд дүүрэнтэжэ, хабаадаха зоной нэрэнүүд элиржэ байна.
Долгор
РАДНАБАЗАРОВА.
