Энэ үзэсхэлэндэ Үбэр Байгалай 4 фото-зурагшад – Сергей Доржиев, Жалсан Лубсандашиев, Цыцык Тумурова, Евгений Епанчинцев гэгшэд хабаадаа. Жюриин түрүүлэгшэ Эрхүүгэй «Время странствий» гэһэн хэблэлэй директор Людмила Ерошенко, «Агинская правда» газетын ахамад редактор Баир Цыденов, Монголой суута фото-зурагшан Базарсадын Батоцырен, Шэнэхээнэй Дашасэрэнэй Жимба, Буряад Уласай Сергей Ильин гэгшэд 5 нютаг ороной 27 зурагшадай 120 хүдэлмэриһөө эгээл эрхим 6 ажал элирүүлжэ гаргаа.
Жюриин түрүүлэгшэ Людмила Ерошенко иигэжэ хөөрэбэ: «Зүбшэлгын үедэ һайн ажалнууд харагдаа, тэмдэглэгдээ. Тон шадабаряарнь харахада, Монголой, Хитадай Шэнэхээнэй, Буряад Уласай, Үбэр Байгалай фото-зурагшадай ажалнууд һубарин ошоно. Эрхүүгэй можын фото-зурагшадай хүдэлмэринүүд гайхуулаагүй, урмым хухалаа гэхэдэ болоно. Тэдэнэй ажал үсөөн байгаа, юундэб даа өөһэдыгөө харуулхаяа һанаагүй. Буряад сэдэбүүдээр хүдэлдэг олон фото-зурагшад бии. Байгаали, тала, агаар, тэнгэри буулгахада, ямар үргэн зай талмайб! Олоной дуугаар Шэнэхээнэй фото-зурагша Юла Делонгын ажал һонирхол татаа, тэрэнэй ажалай шэмэг гэхэдэ, маанадта танил бэшэ хүн. Хара сагаан портрет дээрэхи хүниие бидэ танихашьегүй һаа, харин бидэ тэрэнэй гаталһан наһанай хүндэ зам, сэсэн ухаа хара сагаан портрет дээрэ гүнзэгыгөөр харуулжа шадаһан байхада, харагшад тэрээнтэй танил мэтэ болонобди. Юла Делонгын ажал сэдьхэлым татаа. Юрэнхыдөө, би Монгол орондо, Шэнэхээн нютагта дуратайб, тэдэниие ойлгодогби. Фото-зураг дээрэхи зон, сюжедүүд намда ойлгосотой, тиимэһээ би досооһоонь байһан мэтэ шүүбэрилэн хэлэнэб. Буряад ороной ба Үбэр Байгалай фото-зурагшадай хүдэлмэринүүд баһал һонин байна, харин олон бэшэ. Зарим фото-зурагшадай ажалнууд һайнаар зохёогдоогүй, конкурсын дүримдэ тааралданагүй гэжэ тэмдэглээбди. Тиимэһээ ажалай һайншье һаа, буруу, хайша хэрэгээр зохёогдоһонойнь түлөө сэгнэлтэнь доошоо ороо».

You have no rights to post comments