Базар ДУГАРЖАПОВ, «Дулдаргын аймаг» муниципальна аймагай толгойлогшо:
Б.Дугаржапов.
- Манай гэр бүлэһөө тон дайнда хүн ябаагүй, зүгөөр бултал ара талын ажалда хабаадаһан ааб даа. Хүгшэн абамни дайнай урда тээ наһа бараһан. Аба дайнай үедэ арба гаратайхан ябаа.
Тэрэ үеын олон түмэн хүн дайнда мордоо. Олон хүмнай мүнөө үеын зоной амгалан байдалай түлөө тэмсэһээр, баатарлигаар алдалан унажа, нютагаа амиды бусаха аза талаангүй байшоо. Тиимэһээ Майн юһэниие, нэгэ талаар, уйдхар гашуудалтай, нүгөө талаар, омогорхол түрүүлмэ һайндэр гэжэ һанадагби. Бидэ, мүнөө байһан зон, Эсэгын дайн тухай, дайнда баатаршалга гаргаһан хүнүүдэйнгээ мүнхэ дурасхаал гээшые залуушуулдаа дамжуулха уялгатайбди.
Бато БАЗАРОВ, Могойтын аймагай захиргаанай хүдөө ажахын хүтэлбэриин ахамад агроном:
Б.Базаров.
- Жамсаранай Батоцырен нагаса абамни 1915 ондо Могойтын аймагай Ага-Хангил нютагта түрэһэн. Нагаса абымни гэртэхин, өөрөөшье хуушан монгол хэлэ бэшэг һайнаар мэдэдэг байгаа. 1938 ондо сэрэгэй албанда татагдаад, 1941 оной хабар армиһаа бусаа. Оройдоол хоёр һара болоод байтарынь, дайн эхилээ. 1941 оной июль һарада фронтдо татагдаа. 1942 он болотор Хада-Булаг станци шадар байрлаһан 106-дахи артиллерийскэ полкдо наводчигоор алба хааһан байна. Һүүлээрнь топовычислитель-корректировщигой табан һарын курсда һураад, 1943 оной май һарада 99-дэхи артиллерийскэ бригадын бүридэлдэ Баруун дайнда мордоо. 1943 онһоо дайнай дүүрэтэр лэ 99-дэхи артиллерийскэ бригадын 15-дахи батарейн топовычислительнэ отделениин командир ябаһан. Бригадынгаа бүридэлдэ Ельня, Смоленск, Рославль, Витебск, Вильнюс хотонуудые сүлөөлэлсэһэн. Дайнай үедэ хэдэн дахин шархатаһан. Кёнигсберг дээрэ хүндөөр шархатаад, хэдэн һара аргын газарта хэбтээ. Хамта табан аха дүүнэр байһан: Бальжинима, Бабу, Аюрзана, Батоцырен, табадахиинь нэрэ һананагүйб. Табуулаа дайнда ябаһан. Хоёр аханарынь Курска дугааг дээрэ байхадаа, ходо бэшэг бэшэлсэдэг байһан, теэд уулзажа шадаагүй. Гурбаниинь лэ нютагаа бусажа, Аюрзана аха ветеринараар, нагаса аба агрономоор хүдэлһэн. Нагаса абын энгэр Улаан Одоной, Эсэгын дайнай орденгууд, «За отвагу», «За взятие Кёнигсберга», «За победу над Германией», «Ветеран труда», Агуу Илалтын ойн баярай г.м. медальнууд шэмэглэдэг байһан.
1924 оной (саарһаараа 1926 оной) Базарай Дамба хүгшэн абамнишье дайнда ябаһан. Эсэгын дайнай орденоор, «За победу над Японией» г.м. медальнуудаар шагнагдаһан.
Би баатаршалга гаргаһан абанараараа омогорхон, хүүгэдтээ тэдээн тухайгаа хѳѳрэдэгби.
Долгор РАДНАБАЗАРОВА.
