Оросой Уласта зарим хубиин сэрэгтэ таталга сентябриин 21-дэ соносхогдожо, сэрэгэй уялгатай 300 мянган хүн хабаадуулагдахаар хараалагдана. Тэрэл үдэрһөө Агын тойрогтошье сэрэгтэ таталгын кампани эхилһэн байна.
Сентябриин 24-дэ – Сэрэгэй болон албанай уялга дүүргэжэ ябаһаар наһа бараһан үбэр-байгалайхидай дурасхаалай үдэр сэрэгтэ татагдаһан бүлэг зониие Ага тосхоной «Зарница» талмай дээрэһээ үдэшэлгэ боложо, захяа үгэнүүд хэлэгдэһэн байна.
«Зэбсэгтэ Хүсэнүүдтэ алба гараад, запаста байһан, тусхай сэрэгэй-учётно мэргэжэлтэй ба сэрэгшэнэй дүй дүршэлтэй зон Агын тойрогһоомнай гурбан үдэрэй туршада сэрэгтэ татагдажа байна. Эдэ зоной сэдьхэлэй байдал ойлгоноб. Таанадые сэрэгэй частьнуудаар тараагаад һургаха, тэрэнэй һүүлээр, магад, сүлөөлэгдэһэн дэбисхэрнүүд руу ба сэрэгэй тусхай операциин зорилгонуудые бэелүүлжэ байһан хүбүүдтэ туһаламжа болгожо эльгээхэ. Манай ниигэм нэгэдэнги, эрэлхэг зоригтой байхадаа хүсэтэй болоно», - гэжэ сенатор Баир Жамсуев хэлээд, Эхэ ороноо аюулһаа хамгаалжа шадаха зон бии, хүсэнүүд бии, урдын сэрэгшэд, ёһото эрэшүүл байха гэжэ тэмдэглээ.
«Эсэгэ ороноо хамгаалгын дайнай үедэ, локальна дайнуудта гүрэнөө хамгаалһан болон мүнөө сэрэгэй тусхай операцида хабаадажа байһан сэрэгшэдэйнгээ дурасхаалда хүрэмөөр, шэн зоригтой, тэсэбэритэй, амжалтатай, элүүр энхэ ябахыетнай хүсэнэб», - гэжэ Агын Буряадай тойрогой Захиргаанай хүтэлбэрилэгшэ Буянто Батомункуев албанда мордожо байгшадта захиба.
«Боевое братство» бүлгэмэй нютагай таһагай түрүүлэгшэ Тумэн Санданов үгэ абахадаа, агынхидайнгаа нэрэ унагаангүй, һайнаар уялгата албаяа хаажа, түргөөр, бултал элүүр мэндэ гэртээ бусахыень үреэгээ.
Дарима БАЗАРОВА.
