Эбтэй бүлэ олон жэлэй туршада Дулдарга һууринда мяханай наймаа ябуулжа, ажалай дүй дүршэлтэй болоhон. Тэдэнэр «Дулдарга» гэжэ мал гаргадаг цехтэй. Директорээрнь Людмила Будаева хүдэлдэг байна. Тэрэ Улаан-Үдэдэ хүдөө ажахын дээдэ һургуули дүүргэжэ, наймаашан мэргэжэлтэй болоhон. Будаевтанай бүлэ Улаан-Үдэ хотодо ажаһуухадаа, мяха наймаалжа, ажалай оньһотой танилсаһан байна. Һүүлдэ Буряад Уласай ниислэлһээ Шэтэ зөөжэ ерээд, энэ шэглэлээр аралжаа наймаа ябуулаа юм.
   Дулдаргада мяханай комбинат хүдэлжэ байһанаа, мүнгэн һангай дутагдалһаа табан жэлэй туршада ашаглагдахаяа болёо һэн. Тиихэдэнь Будаевтанай бүлэ тэрэ комбинат арендээр абажа, ажал ябуулжа эхилээ. Удангүй комбинат өөрын болгожо, мяха болбосоруулдаг цех байгуулаа. Аймагай ажаһуугшадһаа мяха абажа, үйлэдбэриеэ ябуулаа. Зоной мал гаргажа үгэдэг хангалта бии болгоо бшуу. Өөhэдын мүнгэн зөөреэр тус цех нээхэдээ, арбан хүнэй хүдэлхэ ажалай hууринуудые байгуулба. Мяханай зүйлнүүдые болгодог шэнэ түхеэрэлтэнүүдые худалдажа абаа. Бууза, банша, котлетэ г.м. эдеэ хоолой зүйлнүүдые худалдажа эхилээ. Дулдарга hууринай олон газарнуудаар эдеэ хоол наймаалагдадаг юм. Олон эмхинүүдhээ захилай ороходо, тэрэнээ тараадаг гуримтай. Илангаяа Дулдаргын аймагай һуралсалай эмхинүүдһээ захил олоор ородог. Тиихэдэнь дунда һургуулинуудаар, хүүгэдэй сэсэрлигүүдээр мяханай зүйлнүүдые тараана.
   Удангүй хүршэ Хэрын, Акшаагай, Харымай аймагуудһаа захил олоор орожо эхилээ бшуу. Хэнэйшье мэдэһээр, захилай олоор орожо эхилхэдэ, үйлэдбэриеэ үргэдхэхэ хэрэгтэй. Тиимэһээ ехэ хүсэтэй түхеэрэлтэнүүдые нэмэжэ абаа ха. Удангүй олзо оршын барагсаан орожо эхилхэдэнь, Будаевтан Шэтэ хотодо мяханай цех нээхэ түсэб табибад. Тиигэжэ 2018 он-до Шэтэдэ полуфабрикадуудые үйлэдбэрилдэг цех нээһэн байна. Цех дотор мяхаар 20 янзын эдеэ хоол: бууза, банша, котлетэ, вареники, голубцы ба бусад хоол хэжэ наймаална. Бууза, банша мушхадаг Россиин ба хари гүрэнэй үйлэдбэриин тусхай түхеэрэлтэ абажа, ажалаа хүнгэдхөө. Цехтэ хүдэлдэг ажалшад диилэнхидээ оньһон түхеэрэлтээр ба гараараа мушхажа хоол хэнэ. Шэтын цехтэ үдэрэй туршада 80 килограмм мяхаар бууза, банша хэнэ бшуу. Иимэ ехэ хэмжээнэй хоол бэлдэлгэдэ олон хүн хэрэгтэй болодог. Шэтын цехтэ 70 хүн ажаллана, харин Дулдаргада – 15. Ажалшадаар ядалдадаггүй юм. Барандаа олон жэлдэ хүдэлжэ байһан зон болоно. 

(Үргэлжэлэлынь 44-дэхи дугаарта уншахада болохо).

Эрдэни  ЧИМИТДОРЖИЕВ.

You have no rights to post comments