Эндэ һая тус эмхи Ханда Дымаева гэжэ шэнэ захиралтай болоо. Залуу мэргэжэлтэн иигэжэ хөөрэнэ: «Хүүгэдэй-эдиршүүлэй уран урлалай байшан Могойтын аймагай 13 эмхинүүдтэ нэмэлтэ һуралсалай программануудые 5 шэглэлээр ябуулдаг: уран һайханай, аяншалгын-хизаар ороноо шэнжэлэлгын, социальна-педагогическа, техническэ ба бэеын тамирай. Хүмүүжэмэлнүүд олон жэлэй туршада шатараар, столой теннисээр мүрысөөнүүдтэ, буряад хэлэнэй конкурс болон фестивальнуудта аймагай, тойрогой, хизаарай, бүхэроссиин, уласхоорондын конкурснуудта хабаадажа, грамота болон дипломуудта, баярай бэшэгүүдтэ хүртэдэг. Багшанар булта дүй дүршэлтэй, нэрэ солотой, оролдосотой, ажалдаа дуратай. Байгша ондо манай эмхиин «Этноцентр «Тууза», «Эко-деревня «Хээтэй» гэһэн хоёр түлэблэл грантын дэмжэлтэдэ хүртөө. Эдэ түлэблэлнүүдээр ехэ ажал ябуулагдана. Мүн манай эмхидэ Υрөөнэйдэ оршодог Хүүгэдэй элүүржүүлгын-һуралсалай «Наран» лагерь ородог. Ерээдүй сагта бэелүүлхэ олон түсэбүүд бии.

   Мүнөө Украинада сэрэгэй тусхай операциин боложо байхада, нютагайнгаа хүбүүдые дэмжэхын тула Могойтын аймагай дунда һургуулинуудай дэргэдэхи һайн дуратанай отрядуудай ажалда хамһалсанабди, мобилизованно хүбүүдэй гэр бүлэнэртэ туһалнабди. Хүмүүжэмэлнүүднай сэрэгшэдтэ өөрын гараар бэлэгүүдые, һахюуһануудые хээ, зурагуудые зураа, бэшэгүүдые бэшээ, тэдэниие бултыень нютагайнгаа хүбүүдтэ эльгээгээбди. Донбассай, Луганскын хүүгэдые дэмжэхэ гэжэ бодоод, үхибүүд зөөлэн наадхуурнуудые, номуудые, зурагуудые, бэлэгүүдые эльгээгээ. Энэ талаар ехэ ажал ябуулагдана, дайн түргэн дүүрэһэй гэжэ сэдьхэнэбди».

   «Мозаика» хатарай студи

   «Мозаика» хатарай студиие олон жэлэй туршада нэмэлтэ һуралсалай багша Баирма Будеева хүтэлбэрилдэг. Зургаан бүлэгтэ 120 хүүгэд ябадаг, хажуугаарнь Баирма Будеева Могойтын «Буратино» гэһэн хүүгэдэй сэсэрлигэй бага бүлэгтэ хореографиин хэшээл заадаг болонхой. «Хүмүүжэмэлнүүдэй аба эжынэр бэрхэнүүд юм. Υхибүүд Могойтын аймагай, тосхоной ажабайдалда эдэбхитэйгээр хабаададаг, урдань автобустой байхадаа, аймагай һуурингуудаар ябажа, концерт-наадануудта хатарнуудые харуулдаг һэмди. Би хоёр жэлэй нэгэ дахин болодог «Жаргалай хатар» гэһэн нютаг можонууд хоорондын хатарай конкурс эмхидхэгшэб», - гэжэ тэрэ мэдүүлбэ.

   «Арт-калейдоскоп» кружок

   Энэ кружок олон жэлэй туршада Цыпылма Ванчик ябуулна. Хүмүүжэмэлнүүд элдэб янзын конкурс, мүрысөөнүүдтэ эдэбхитэйгээр хабаадажа, амжалтануудые туйладаг. «Хамта 91 хүүгэд кружогто ябадаг. Жаахан хүүгэдтэй саарһаар оригами, мүшэр, орооһон, ургамалай үрэ, яһан, дабһатай талхан г.м. эдээр элдэб юумэ хэдэгбди, ахалагша ангинуудтай һубһаар гоёолтонуудые, зүүдхэлнүүдые бүтээдэгбди. Мүн һолоомо, борбоосгой, үйһэ, элһэ, нооһо ба бусад зүйлнүүдые үргэнөөр хэрэглэдэгбди, «папье-маше» гэhэн техникэ шудалнабди. Би өөрөө нооһоор багахан гарай бэлэгүүдые хэхэ дуратайб», - гээд Ц.Ванчик тэмдэглэнэ.

Цымжидма ДОЛГОРОВА.

You have no rights to post comments