Гэртэхин хүүгэдэйнгээ «үмсын чемодан» дүтын айлнуудта орхидог hэн. Минии, мүн Цырендулма дүүгэймни чемодан байрымнай баруун тээ Цырегма багшында байха. «Үмсын чемодан» соохи зөөри гэбэл, шанаһан хониной мяхан, ёпоошхо гү, али бариһан хилээмэн, наймааһаа абаһан хоморой сагаан саахар, гуурһан, ручка гэхэ мэтэ.
Мүнгэн зөөри гэхэдэ, ехэдээл һаа – 10 түхэриг. Тэрэ сагта «улаан шарбуунса» яһала ехэ мүнгэн байгаа. Нэгэ хүбэриг хилээмэн тиихэдэ 17-18 зэдтэ һэн.
Хаа-яа досоогоо харлахадаа, Цырегма багшында ошожо эдеэлэгшэ һэм. Хойморой орон дээрэ Цырегма багшын эжы гар хүрдэ эрьюулэн, маани уншажа һууха...
Он жэлнүүдэй хэды үнгэрөөшье һаа, нютагайнгаа эхин һургуулиин хүмүүжүүлэгшэдые, багшанараа дулаанаар һанан, дурсан ябагшаб. Абарзада Батоевич Дагбаев, Дашинима Цырендоржиевич Цырендоржиев, Цырегма Жамсарановна Жамсаранова, Будажаб Манзаргашиевна Манзаргашиева, Ханда Жамбуевна Жамбуева, Батомунко Доржиевич Доржиев, Бутит Жанчиповна Жанчипова, Клара Мункуевна Дашинимаева, Цыбегмит Бадмадоржиевна Бадмадоржиева, Должит Батомункуевна Далаева, Бальжинима Дамбиевич Дамбиев, Николай Жамсаранович Жамсаранов гэгшэдые нэрлэмээр байна.
Мүнөө урданай багшанарай нэгэн Цырегма Жамсарановна Жамсаранова тухай хөөрэхэ дуран хүрэнэ.
Цырегма Жамсарановна аяар холын Түгнэ нютагһаа зөөжэ ерэһэн сагаангууд угай үри һадаhадай нэгэн һэн. Борбын Жамсаранай һамган олон хээлитэй болоһон гэхэ. Теэд хүүгэдынь нялха нарайгаар халгажа, тогтохоёо болёод байгаа.
2023 оной сентябриин 28. Улаан-Үдэ хото. Бальжи-Һама абгайн хөөрөөнһөө: «Борбойн Жамсаранай хүгшэн хээлитэй болоод, Цырегмае Санжибалайда түрөө. Эндээ Цырегма үентэй болотороо (1,8 һара) байгаа. Иигэжэ тогтоод, өөрөө Цырегма олон хүүгэдые түрэһэн. «Гансаһаа газар дүүрэхэ» гэдэг энэ болонол даа».
(Үргэлжэлэлынь 18-дахи дугаарта).
Цырендоржи ЖАМСАРАНОВ.
АГА–УЛААН-YДЭ.
