Инаг дуранай охиндо абтаһан Баир Дамдинович ба Галина Гомбоцыреновна хоёр нэгэ амин боложо, 1974 оной февралиин 4-дэ гэр бүлэ болоһон намтартай. Багаһаа ажалда дүрэлжөөтэй залуухан бүлэ нютагтаа найдамтай ба харюусалгатай хүдэлмэрилэгшэд боложо, габшагай ажаллаһан.
Г.Лхамаева. Гэр бүлын архивай фото-зурагууд.
Хажуугаарнь залуушуул таатай дулаахан «уурхай» зохёожо, тэрээн соогоо үнэр баян бүлын жаргал тогтооһон. Аляа хөөрхэн 4 үхибүүдые үндылгэжэ, «аба», «эжы» гүүлэхэ эрхэтэй болоһон. Үдэрһөө үдэртэ, жэлһээ жэлдэ ажабайдалаа һайжаруулха, үхибүүдээ үндылгэхэ зорилготой ябаһан эдэ хоёрой мүнөө алтан түрэеэ наадаха аза талаантай байhандань урмашамаар. Зуун жэлэй тэн хахадые сугтаа ажаһууһан хоёрой инаг дуран мүнхэ гэрэлээр бадарһан зандаа. Хэдэн жэлэй хугасаада эбтэй эетэй ажаһууха сагтаа бэе бэедээ хүндэеэ, этигэл найдалаа алдаагүй байһыень сэгнэхээр. Энээндэ гэршэ болгожо, айл бүлэ болоһоор 50 жэлэй дабаанда туласа ерээд байһан эдэ хоёрой алтан бэһэлигээ андалдажа, дүмүүхэнээр вальс хатарха зуурань үхибүүдэйнь үнэн зүрхэнhөө зорюулhан үреэл үгэнүүдыень бэедээ шэнгээн абажа байхыень харахада уярмааршье, баярлахааршье.
Баир Дамдинович бүхы наһаяа ажал хэһэн гэжэ хэлэхээр, хүдэр бэетэй, даруу зантай хүн. Галина Гомбоцыреновна зөөлэхэн харасатай, энеэбхилһэн шарайтай, налгай урихан эгэшэ юм.
(Үргэлжэлэлынь 20-дохи дугаарта).
Валентина ЦЫРЕНЖАПОВА.
