Радна-Нима Балданович бүхы наһаяа Улаан-Үдэдэ ажаллаһаншье һаа, түрэһэн, үндыһэн тоонто нютагаа мэнэ-мэнэ болоод лэ эрьедэг заншалтай. Энэ хүнтэй Агын ЗАГС-ын байшан соо танилсаабди. Тэрэ багаһаа ханилжа нүхэсэһэн найдамтай нүхэд Баир ба Галина Лхамаевтанай алтан түрэдэ Улаан-Үдэ хотоһоо зорижо ерээд ябаа.
Балшар наһан –
һайхан мэдэрэл
Буряад Уласта мэдээжэ фото-сурбалжалагша 1951 ондо Урда-Агада Балдан Базаровай ба Удбылма Жаповагай бүлэдэ долоон хүүгэдэй хоёрдохи үринь боложо түрэһэн юм. Удангүй абань Сахюурта нютаг зүблэлэй секретаряар эльгээгдэһэн байгаа. «Сахюур» гэжэ үгэһөө бии болоһон Сахюурта һайхан нютагһаа элшэ хүсэ абажа үндыһэн хүбүүн багаһаа ниитын ажаябуулга ба соёл болбосоролдо эдэбхитэй хабаададаг байһан.
«Бүлөөрөө булта дуу дуулаха, хатар нааданда хабаадаха дуратай һэмди. Багаһаа баяан дээрэ наадажа һураһанби. Урда-Агын дунда һургуулида табадахи ангиин һурагша байхадаа, 3-4 хүбүүд гармошкоор, һүүлдэнь баяан дээрэ наададаг болоо һэмди. Баяанай кнопконуудые нэгэ нэгээр дараһаар, дуунай аялга гаргажа эхилээбди. 1967, али 1968 он байгаа гээшэ гү, 9-дэхи ангиин ябахадамни, абамни намда баяан абажа үгөө һэн. Тэрэ баяамни мүнөөшье болотор байха даа, 57 жэл үнгэршэбэ. Үетэн нүхэдөөрөө уулзахаяа нютагаа ошоходоо, заабол баяанаа абадагби. Мүнөө жэл июниин 29-дэ Урда-Агын дунда һургуули дүүргэһээр 55 жэлэймнай ойн баяр тэмдэглэгдэхэ. Тэндэ заабол баяанаа абахаб. Ахалагша ангиин ябахадамнай, һургуулида залуушуулда зорюулагдаһан үдэшын наадан болодог һэн. Тэндэ хэды хүбүүд ээлжэлэн, баяан дээрэ вальс, фокстрот гэхэ мэтэ һайса наадаһан гээшэбди. Тэрэ сагтаа дүүрэн эрмэлзэлтэй ябагдаһан», - гэжэ Радна-Нима Базаров хөөрөөгөө эхилнэ һэн.
(Үргэлжэлэлынь 25-дахи дугаарта).
Валентина ЦЫРЕНЖАПОВА.
