Уг унгяараа хойто Табтаанайн Шаранта гэжэ газарай Доржын Жамбалай Урда-Агын Дугарай Жаргал хоёрой бүлэдэ 6 хүүгэдэй 2-дохинь Дашидондок хүбүүн 1939 ондо түрэһэн. Залуушуул айл бүлэ болоходоо, Урда-Агын Гээлмэдэ, нагасанарайнгаа нютагта түбхинэһэн байна. Абань модошо, мүнгэшэ дархан байгаа. Түб һууриндаа гоёор шэрдээтэй  ставнинуудтай гэр асаржа табиһан. Хүүгэдыньшье дархаша, хүгжэмшэ, талаан бэлигтэй, Буряад Уласай үзүүр хүбүүдэй тоодо ябаһан. Буряад АССР-эй габьяата артист Дугаров Бальжинима нагасань Буряад Уласай соёлой суута ажаябуулагша юм. Тэрэ 4 хүбшэргэйтэй хууртаа авторска үнэмшэлгэ абаһан. Наһан соогоо 1000 гаран буряад арадай зэмсэг дархалһан. Бальжинима нагасань Лубсанцырен зээдээ бүхы нюусаяа дамжуулһан. Буряад арадай хүгжэмэй зэмсэгүүдые бүтээлгээр мэргэжэлтэдые бэлдэхэ мастер, талаан бэлигтэй уран гартанай бүтээһэн хуурай ба шаанзын абяан концерт-наадануудта сууряатаһаар. Ахайнь наһа барахада, нагасынь шухаг зэмсэгүүд  Очиржап дүүдэнь дамжуулагдаа. Тэрэ өөрын мастерской байгуулжа, шаанза һэргээн заһаа, тенорэй шаанза шэнэлхэдэнь, оркестр ба ансамбльнуудта хэрэглэгдэдэг болоһон. Жамбалов Баясхалан дүүнь Могойтын түб больницын хирургаар олон жэл амжалтатай хүдэлһэн. 

You have no rights to post comments