Хара-Шэбэр нютагай баатаржаан харгана омогой Лубсан Бальжуров эссе бэшэлгээр 35 хүрэтэр наһанай бүлэгтэ алтан медальда хүртэжэ, нютагайхидаа баярлуулаа. Тэрэ хоёрдохёо «Алтаргана» нааданда хабаадаба. 2022 ондо Агада шүлэгэй мүрысөөндэ эрхимлэһэн байна.
   «35 хүрэтэр наһанай бүлэгтэ хабаадагшад «Ниидэхэ жэгүүртэй аад, тэнгэри өөдэ тэгүүлхэгүй гээшэ тон дорой хэрэг» гэһэн сэдэбэй удха яажа ойлгонобиб гэжэ дэлгэрэнгыгээр тайлбарилха зорилготой байгаабди. Мүнөө сагта ямар жэшээнүүд дээрэ хэрэглэхээр бэ гэжэ удхыень харуулжа шадахань шухала һэн. Хүн гээшэ дэлхэй дээрэ өөрын бэлигтэй түрэдэг. Тэрэ талаан бэлигээ оложо хүгжөөхэ, дээшээ жүдхэхэ хэрэгтэй. Жэшээнь, уран гартай үхибүүн байна. Тэрэ пластилинээр элдэб амитадай дүрэнүүдые гаргажа шададаг. Тиимэ үхибүүдые тоонгүй орхихо бэшэ, бэлигыень саашань хүгжөөлгэхые оролдохо. Хүгжөөгөө һаа, буряад арад соомнай суута уран барималша Даши Намдаков мэтэ уран зон үшөөшье гаража магад гэжэ һананаб», - гэжэ Лубсан хэлэнэ.
   Бато-Нима Бальжуров Долгор Цынгуева хоёрой бүлэдэ 1995 ондо Лубсан хүбүүн табан хүүгэдэй одхон боложо түрэһэн юм. Нютагайнгаа газар шоройдоһоор, нютаг нугынгаа элдиндэ хүльбэрһөөр, бага балшар наһаяа үнгэргөө һэн бэзэ.
   Түрэһөөрөө Базар Барадинай дүү Түдэбэй басаган болохо, үргэмэлөөрөө Дашиева Долсон хүгшэн эжынь бэшэхэ улигтай һэн. Бага байхаһаа мэдэхэ юумэеэ шүлэглэн бэшэжэ, хадагалдаг байһан. Лубсанай Цыренханда абга эгэшын хөөрэһөөр, эжынь эдэ олон хүүгэд, аша зээнэр соо зохёохы бэлигтэй хүн гарахагүй гээшэ гү гэжэ һанадаг байһан ха. Тиигэһээр аша хүбүүн Лубсан томо болоходоо, богонихон шүлэгүүдые бэшэжэ эхилээ. Залуудаа багшаар, һургуулиин интернадта хүмүүжүүлэгшээр хүдэлһэн хүгшэн эжынь ашынгаа бүтээлнүүдтэ ехэ хүхидэг, хэдэн дахин дабтан уншадаг, дэрэ дороо хадагалаад байдаг һэн. Ашамни бэшэжэ болохо бэшэ аа гү гэжэ досоогоо сэдьхэдэг, баярладаг байһан ха.
   Лубсан дунда һургуулияа амжалтатай дүүргээд, Буряадай гүрэнэй багшанарай дээдэ һургуулиин зүүн зүгые шэнжэлэлгын институдта ороһон. Буряад хэлэнэй болон уран зохёол шэнжэлэгшын мэргэжэлтэй түгэсхөө. Һүүлээрнь магистратурада монгол хэлэ шэнжэлһэн байна. Улаан-Үдэдэ багшаар, эрдэмтэ хүдэлмэрилэгшөөр, удаань Эрдэм болбосоролой яаманда оршуулагшаар, түрүү мэргэжэлтэнээр хүдэлһэн. Харин ковид үбшэнэй дэлгэрхэдэ, Хара-Шэбэр нютагаа бусаһан юм. Наһаараа Кировэй нэрэмжэтэ колхозой хонишоноор хүдэлһэн гэртэхинтэеэ тэрэл буусадань адуу, үхэрнүүдые үдхэдэг болонхой.
   Залуу фермерэй мал Хара-Шэбэрһээ 7 модо зайда оршодог Шаазгайта гэжэ газарай тала дайдые бүрхөөн бэлшэдэг.
   Нордоп БАБУЕВА

You have no rights to post comments