Зандара Намдаков Агын аймагай Хүнхэр нютагта 1934 ондо түрэһэн намтартай. Хүдөө нютагта үндыһэн хүбүүн балшар наһанһаа хара ажал хэжэ хүдэржэһэн. Наһан соогоо олониитэдэ туһатай ажал хэжэ ябаа. Хамтын ба ниитын ажалай түлөө үнэн сэхэ, шударгы ажаллажа, арад зонойнгоо дурасхаалда хододоо hаруул, hайханаар hанагдажа ябадаг юм. Тэрэ түрэл хизаарайнгаа, Агын тойрогойнгоо хүгжэлтэдэ сэгнэшэгүй хубитаяа оруулжа, мүр сараа үлөөhэн гэхэдэ алдуугүй. Тэрэнэй нэрэ түүхэдэ орожо, алтан үзэгүүдээр бэшэгдэнхэй. Зандара Намдаков байгша оной хабар ерэ наһанайнгаа дабаан дээрэ алтан дэлхэйтэеэ хахасаһан байна.
   Зандара Хутуктуевичые Агын тойрог дотор мэдэхэгүй, тэрээн тухай дуулаагүй хүн хомор лэ байха. Энэмнай мэдээжэ партийна ажалшан, сурбалжалагша, түрэл Агынгаа хүгжэлтэдэ нилээд ехэ хубитаяа оруулһанайнгаа түлөө «Агын Буряадай автономито тойрогой хүндэтэ эрхэтэн» гэһэн үндэр нэрэ зэргэдэ хүртэһэн ахатан юм.
   Энэ ахын гартаа портфель баряад, Агын үйлсөөр ябахые һайсал хараһан байгдана. Түрүүн энэ ахые танихагүй байһан аад, һүүлдэ мэдэхэдээ, ехэ бэлигтэй хүтэлбэрилэгшэ, хүндэтэй хүн гэжэ ойлгоо бэлэйб. Зандара Хутуктуевич наһанай амаралтада үни гараһаншье һаа, олондо туһатай, хэрэгтэй үүргэеэ дүүргэжэл ябаа. Сурбалжалагша ябаһан байжа, Агын редакци оло дахин ородог байһыень һанагдана. Урданай үеын мэдээжэ зоной намтараар һонирхожо, энэ ахатай нэгэтэ бэшэ уулзаха хубитай байгдаа. Һүүлшын ушар гэхэдэ, бэлигтэй хүтэлбэрилэгшэ ябаһан Гуродарма Цэдашиевай түрэһөөр 75 жэлдэ зорюулжа, дурсалга бэшэхэеэ баримтануудые һуража, гэртэнь ошоһон байнаб. Тиихэдэ хүнгэн, сарюун зандаа байһан аха захатан мэдэхэ юумэеэ дууһан хөөрэжэ үгөө бэлэй. «Һониндоо гаргахынгаа урдаа тээ намда бэшэһэнээ уншуулаарайгты» гэжэ захяа һэн. Хэблэлдэ гарахынь урда тээ бэшэһэнээ абаашажа харуулхадам, эхинһээнь адаг хүрэтэрнь хаража, заһаха, зураха юумыень зураад абаа. Энэ ахые нарин нягта хүн гэжэ тиихэдэ ойлгоо бэлэйб.

You have no rights to post comments