Аргали нютагта Доржижаб Дамдинов ба Должит Батоевагай Дондок хүбүүн болон Базарсадо Ойдопов ба Ханда Амоголонова хоёрой Цырегма басаган – олон үхибүүдтэй бүлын хүүгэд – номдоо, ажалда бэрхээр үндыһэн юм. Арбан жэл суг һуража, 1984 ондо дунда һургуулияа түгэсхэһэн Дондок Цырегма хоёр хара багаһаа бэе бэеэ табан хурган шэнги мэдэхэ. Дамдиновтан 8 хүүгэдые үндылгэжэ, тэдэнэй хоёрыень харгалзалжа, гарыень ганзагада, хүлыень дүрөөдэ хүргэһэн юм. Үнэр баян, бата бэхи гэр бүлэ байгуулһан энэ айл 7 аша зээнэрэй жаргалтай хүгшэн, нагаса аба эжы юм.
Тэдэ 2013 ондо Россиин Федерациин Юрэнхылэгшын зарлигаар «Родительская слава» орденой медаляар шагнагдаһан.
Үхибүүн бүхэн өөрын юртэмсэтэй
Үхибүүн бүхэн өөрын юртэмсэтэй, өөрын һонирхолтой, зантайшье ха юм даа. Хүүгэдынь ямар мэргэжэл эдлэжэ, ажалай үргэн харгыда хэр амжалта туйлажа ябанаб гэжэ танилсая.
Ехэ Бутит басаган һургуулидаа бэрхээр һуража, Агын аймагай эрдэм һуралсалай таһагай грамотаар шагнагдаһан, бү-хэроссиин хүүгэдэй «Океан» лагерьта амарха путёвкоор урмашуулагдаһан. Благовещенскын финансово-экономическа колледж улаан дипломтой дүүргэжэ, энэл мэргэжэлээрээ дээдэ һургуулитай болоһон. Примориин хизаарай Фокино хотодо «ФМБА МСЧ №100» эмхидэ бухгалтераар хүдэлдэг. Сэрэгэй онгосодо хүдэлдэг моторист Жаргал нүхэртэеэ 3 хүүгэдые хүмүүжүүлнэ.
Нэгэ жэлээр дүү Батор хүбүүн һургуулиин ба тосхоной ажабайдалда эрхимээр хабаадаһанай түлөө бүхэроссиин «Океан» түб ошохо путёвкоор шагнагдаһан. Шэтын эмнэлгын дээдэ һургуулида һуража байхадаа, хүнгэн атлетикээр ехэ амжалта туйлаһан. Мүнөө Сахалинда шүдэнэй эмшэнээр хүдэлнэ. Туяна нүхэрынь врач-терапевт, Оха хотын поликлиникые даагшаар ажалладаг. Хоёр хүүгэдые үндылгэнэ.
Бэлигма басаган 2015 ондо Агын тойрогой гимнази мүнгэн медальтай дүүргэжэ, Буряадай гүрэнэй дээдэ һургуули «лингвист-переводчик» мэргэжэлтэй түгэсхэһэн. Улаан-Үдэ хотодо Тумэн нүхэртэеэ Алексей хүбүүе үндылгэнэ.
2002 оной Цыден хүбүүн П.И.Чайковскиин нэрэмжэтэ урлалай колледжын «Вокальное искусство» факультет дүүргээд, Д.Хворостовскиин нэрэмжэтэ Красноярскын урлалай институдта оперно дуушанай мэргэжэлдэ һурана. Тэрэ XIV «Алтаргана» нааданай үльгэршэдэй мүры-сөөндэ илаһан, гадна «Невские просторы» гэһэн уласхоорондын IX фестиваль-конкурсын «Дети XXI века» гэһэн хүүгэдэй ба эдиршүүлэй зохёохы ба хубиин хүгжэлтын түлэблэлэй 2-дохи шатын лауреат, «Гуранёнок» фестивалиин дипломант. Мүн Цыден тамирта дуратай: тамаралга, дүрэ буляалдаата барилдаан, теннис, волейбол гэһэн тамирай янзануудаар бэеэ һоридог. Дүрэ буляалдаата барилдаагаар Үбэр Байгалай хизаарай мүрысөөндэ 3-дахи һуури, харин гүйдэлөөр «Ага тосхон» хотын тойрогой мүрысөөндэ 2-дохиие эзэлһэн. Теннисээр элдэб хэмжээнэй мүрысөөнүүдэй илагша юм. Россиин эмнэлгын эрдэмүүдэй академиин гүрэнэй эрдэмэй ба шэнжэлэлгын эдеэ хоолой институдай эмхидхэһэн «Разговор о правильном питании» гэһэн гэр бүлын фото-зурагуудай мүрысөөндэ бүлөөрөө хабаадаха үүсхэл гаргаһан шуу. Тиигэжэ Дамдиновтанай бүлэ хизаарай мүрысөө шүүжэ, Москва хотодо үнгэргэгдэһэн «Воспитываем здоровое поколение» гэһэн бүхэроссиин хуралдаанда уригдаа һэн.