Жалсан Базаржапов Могойтын аймагай Зугаалай нютагта 1996 ондо түрэһэн юм. Гэр бүлэдөө дүрбэн хүбүүд үндыжэ, багаһаа тамирта улигтай хүмүүжэһэн.
   Базаржапов Галсан ахань – һур харбалгаар Россиин тамирай габьяата мастер, уласхоорондын, Европын, Россиин мүрысөөнүүдэй абарга. Жалсан аханарһаа жэшээ абажа, тамираар бэеэ һоридог һэн. Һур харбаха, барилдаха, футбол наадаха угаа дуратай. Тэрэ Зугаалайдаа зургаадахи анги дүүргээд, Могойтын гурбадахи дунда һургуулида һуралсалаа үргэлжэлүүлээ. Дунда һургуулиин һүүлээр Улаан-Үдэ хотодо Сибириин гүрэнэй телекоммуникациин ба информатикын университедтэ һураа. Тэндэ амжалтатай һуража байтараа, гэр бүлын шалтагаанаар һуралсалаа орхижо, Ага нютагаа бусаһан байна.
   Удангүй сэрэгэй албанда татагдаад, Курильска арал эльгээгдэжэ, дүшэн зургаадахи пулемётно-артиллерийскэ полкдо мэргэн буудагша ябаа. Сэрэгэй албанай дүүрэхэдэ, хэлсээ баталжа, тэндээ үлөө бшуу. 2022 ондо сэрэгэй тусхай үйлэ хэрэгэй эхилхэдэ, Жалсанай алба хаажа ябаһан сэрэг баруун тээшээ эльгээгдээ. Тэрэ жэлэй зун багта Жалсан Базаржапов Угледар хото шадар болоһон шанга байлдаануудта хабаадаа. Нэгэтэ болоһон хатуу байлдаанда сэрэгшэ хүндөөр шархатажа, госпитальдо удаан аргалуулаа. Арга абаһанайнгаа һүүлээр Жалсан гэртээ табигдаһан юм. Залуу сэрэгшэ баатаршалга харуулһанайнгаа түлөө орден, медальнуудта хүртэһэн.

You have no rights to post comments