Тэбхэр 50 жэлэй саада тээ, 1967 ондо Сагаан-Шулуутай нютагта Агын тойрогой түрүүшын арадай аман зохёолой бүлгэм байгуулагдаhан түүхэтэй. Сахилма сагаан шулуун умайтай баян дэлгэр газартай нютагайхид дуу хатарай бүлгэмѳѳ «Сахюур» гээд нэрлэhэн юм. Сахюур – бутардаггүй хатуу, хэтээр сохиходо, ошо галаар сасаран сахилзадаг тунгалаг сагаан шулуун.
«УРДАНАЙ ЮУМЭН - УЛА…»
«Урданай юумэн - ула, мүнѳѳнэй юумэн - зула …» гэhэн үгэтэй, үндэhэн ёhо заншалнуудай дарагдан мартагдажа байhан үе саг байгаа. Комсомолой, коммунис партиин солые магтаhан шэнэ дуунуудай дэлгэрhэн үедэ урдын дуу хүгжэм hэргээхын тула тусхай хүсэл, зориг хэрэгтэй байгаа гэжэ эли. Түрэл арадайнгаа соёл түүхэдэ, хэлэ бэшэгтэ үнэнхэ сэдьхэлhээ дурлаhан, гүнзэгы сэсэн, холын хараа бодолтой хүнүүдэйл тиимэ хэрэг эрхилhэниинь тоосоогүй. Засаг зургаануудай даабаряар бэшэ, харин ѳѳрын үүсхэлээр арадай ансамбль байгуулhаниинь онсо удха шанартай. Тэрэ бүгэдые нютагай оюун бэлигтэй, уран гартай, дууша хатарша Цымжит Лхамаева хүтэлбэрилhэн юм.
Сагаан-шулуутайнхид бүхы нютагаараа оролдожо, «ула болоhон» арадай абдарай баялигые алтан зулаар бадарааhан габьяатай. Хахад зуун жэлэй туршада «Сахюур» сог залитай баяр жаргалай элшээр сахилзана. Мүхэшэгүй галайнь дулаахан дүхэригтэ хэдэн үеын нютагайхид сэнгэн амаржа, дуулан хатаржа, олоной зүрхэ сэдьхэл хужарлуулна...
Дэлгэрэнгыгээр 21-дэхи дугаарта.
