Дулдаргын аймагай хойто бэеэр үсөөн зотой багахан һуурингууд олон бии. Тээсгэн аймагай түбhөө холо бэшэ оршодог, сэбэр уһатай Элеэ голһоо нэрэ абаһан «Элеэ» хүдөө hууринай ажаһуугшадай hуудал байдалаарнь һонирхожо ябаhан байнабди. Элеэ нютаг Дулдарга һууринhаа зүүн хойшоо хорин модоной газарта, Элеэ голой зүүн эрьедэ, уужам хүндыдэ нэмжын оршодог гээшэ. Энэ нютагаар ябахадаа, «Элеэ» муниципальна байгуулалтын захиргаанай толгойлогшо Баир Аюшиевич Гомбоевтой уулзажа, нютагай мүнөөдэрэй социальна байдалтай тобшохоноор танилсаабди. Гуша наһаяа дабаһан залуу толгойлогшо энэл нютагта түрэhэн намтартай. Тиимэһээ нютагай байдал, эндэ ажаһуудаг зониие, тэдэнэй абари зан заршам ухаа орохоһоо мэдэхэ байна.
- Баир Аюшиевич, хөөрэлдөөнэй эхиндэ Танай намтартай танилсая. Харюусалгата тушаал эзэлхынгээ урда тээ хаана һураһан, хүдэлһэн байнабта?
- Элеэ нютагтаа 9-дэхи анги дүүргээд, Дулдаргын һургуулида һурахаяа ошоһон байнаб. Улаан-Үдэдэ Байгалай экономико-правовой дээдэ һургуулида юристын мэргэжэл 5 жэл шудалжа гарааб. Сахалинай олтирогто Корсаков хото шадар загаһа барилгада ба тэрэниие буйлуулдаг заводто хэдэн жэл хүдэлөөб. Удаань тоонто Элеэгээ ерэжэ, нютагай захиргаанда залуушуулай хэрэгүүдээр мэргэжэлтэнээр хүдэлһэн байнаб. Нютагайнгаа залуушуулые ниитын ажал хүдэлмэринүүдтэ эдэбхитэй хабаадуулжа ябаһанаа, 2011 оной сентябрь һараһаа нютагай захиргаанай толгойлогшын орлогшоор томилогдоо һэнби. Тэрэ үедэ «Элеэ» хүдөө һууринай захиргаанай толгойлогшо ябаһан Бато Жамбаловтай үгэ нэгэтэйгээр ажаллажа, ажалай дүршэлтэй болоһон байгдана. Захиргаанда ажаллахадаа, муниципальна албанай ажал тушаа үргэн мэдэсэтэй боложо, Бато Жамбаловай Дулдаргын аймагай захиргаанда хүдэлхэеэ ошоходонь, толгойлогшын уялга дүүргээб. Тиин 2013 ондо үнгэргэгдэһэн һунгалтада диилэнхи дуугаар толгойлогшо боложо, мүнөө болотор харюусалгата тушаалда хүдэлжэ ябанаб.
- Элеэ нютагай мүнөөдэрэй байдал ямар гээшэб? Нютаг соо хэды хүн ажаһуунаб?
- Элеэ һууринай дэбисхэр дээрэ бүхыдөө 350 хүн ажаhууна. Тэдэнэй тоодо 178 хүн ажал хэдэг гээд тоологдоно. Ажаhуугшадаймнай олонхинь - ород, бэшэниинь буряад, татар, башкир яһатан юм. Буряад яһанай 7-8 үрхэтэ айл бии. Нэрлэбэл, Болотовтон, Аюровтан, Гурожаповтан, Галдановтан, Гомбоевтон г.м. Зариманиинь совет засагай үедэ Элеэгэй һургуулида багшалхаяа, ажахыда малшанаар хүдэлхэеэ ерэжэ, эндэ нютагжаһан. Тиихэдэ Мясниковууд, Щебеньковууд, Дрёминууд г.м. олон ород гэр бүлэнэр ажаһуудаг. Ажаһуугшадаймнай тоо һүүлэй 5-6 жэлдэ тэрэл зандаа үлэнхэй. Нютагһаа гаража ошохо ябадал үзэгдэдэггүй. Урдань Дулдаргын аймагта Элеэ нютагһаа баян нютаг байгаагүй гэжэ хэлсэдэг байһан. Тэрэ саг тухай үндэр наһатайшуулнай хөөрэхэл байха. Совет засагай үедэ ажахымнай һалбаржа, нютагтамнай хамаг юумэн үнэхөөрөө хүгжэжэ байгаа. Һургуулидашье олон үхибүүд һурадаг байгаа бшуу. Хангалтын талааршье һайн, баян бардам һуурин байһан лэ даа. Мүнөө нютагтамнай һургуули, эмнэлгын газар, соёлой байшан, номой сан бии. Гадна хэлхеэ холбоо хангадаг таһаг, почто байха. Һургуулидамнай үхибүүд 9-дэхи анги хүрэтэр һураад, Балжана, Дулдарга һуурингуудта һуралсалаа үргэлжэлүүлхэеэ ошодог юм. Мүнөө Алхана нютагһаа парк хүрэтэр харгы асфальтаар хушагдана. Тиимэһээ амарагшад Элеэ һуурин дээгүүр гаража, Алханын аршаан ошохо аргатай болоһон шуу. Элеэ гол дээгүүр шэнэ хүүргэ баригдаа. Хуушарһан хүүргэ элеэгэйхидэй ба бусад айлшадай һанаа зобоодог байгаа.
Дэлгэрэнгыгээр 31-дэхи дугаарта.
