Шүлэг уранаар уншалгын мүрысѳѳнэй илагша, Агын 1-дэхи дунда һургуулиин һурагша А.Бадмажабэ.
Октябриин 4-дэ наратай дулаахан үдэр Ага тосхоной түб талмай дээрэ «Зэндэмэнидэл һайхан буряад хэлэмнай зэдэлжэл ходо байг лэ!» гэһэн Буряад хэлэнэй һара нээлгын баяр ёһолол үнгэрһэн байна.
Буряад үндэһэн хубсаһатай наһатайшуулые, залуушуулые, хүүгэдые харахада, сэдьхэл баярламаар байба. Сугларагшад эндэ ёохор хатараа, дуунуудые дуулалдаа, түрэл хэлэн дээрээ шүлэг уншажа мүрысөѳ. Шүлэг уранаар уншалгын мүрысөөндэ Агын нэгэдэхи дунда һургуулиин 10-дахи ангиин һурагша Александра Бадмажабэ хонгёо һайхан хоолойгоор шүлэг уншажа, түрүү һуурида хүртэжэ, олониие баясуулаа юм. Тэрэ хадаа шүлэг 6-7-дохи ангиһаа уншажа эхилһэн байна. Үмдөөд ябаһан дэгэлынь эжынь байһан. Александрын олон амжалта, туйлалтануудтань буряад хэлэнэй багша Билигма Доржиевна Цыдыпова ехэ хубитаяа оруулдаг шуу.
Тиихэдэ сугларагшад монгол угсаатанай «Задагай сагаан» хатарта һураха, яармагта табигдаһан үндэһэн үйлэдбэринүүдые худалдажа абаха аргатай байба. Талмайн баруун талада уран гоёор бэшэлгын хэшээлээр һонирхоһон зон оошорто зогсожо, угайнгаа нэрэнүүдые, мүн «аза жаргал», «инаг дуран», «амжалта», «энхэ элүүр» г.м. үгэнүүдые хуушан монгол бэшэгээр бэшүүлээ.
Дэлгэрэнгыгээр 41-дэхи дугаарта.
