СССР-эй арадай артист, профессор Лхасаран Линховоиной нэрэмжэтэ уласхоорондын дуушадай конкурс октябриин 12-13-да арбан хоёрдохёо үнгэргэгдэжэ, Ага нютагайхид Агын соёлой түбэй тайзан дээрэ буряад-монгол угсаатанай бэлигтэй, залуу дуушадай уянгата дуунуудые шагнажа, аргагүй ехээр баясаа юм.

 

Гран-при шанда хүртэһэн Дашноров Эрдэнэ-Ошор.

 

Энэ удаа элитэ дуушанай нэрэ мүнхэлhэн, гурбан жэлэй нэгэ удаа болодог конкурсдо Забайкалиин хизаарай, Агын Буряадай тойрогой, Буряад ороной, Эрхүү можын, Новосибирск хотын, Монгол, Хитад Уласуудай - дүн хамта 53 дуушад хабаадаһан байна. Түрэл ороноо суурхуулhан Лхасаран Линховоиной Дарима басаганиинь Ага нютаг ерэжэ, уласхоорондын жюриин түрүүлэгшээр ажалладаг. Тэрэ олон бэлигтэй дуушадые амжалтын харгыда гаргалсаһан хүндэтэй багша юм.

Уласхоорондын конкурс нээлгын баяр ёһололдо Агын Буряадай тойрогой Захиргаанай хүтэлбэрилэгшын орлогшо, социальна һалбариин хүтэлбэриин дарга Билигма Будаева сугларагшадые хани халуунаар амаршалжа, дуушадта амжалта хүсөө.

Мэргэжэлтэдэй дунда үндэрөөр сэгнэгдэдэг конкурсдо Монголhоо аяар 30-аад дуушад ерээ бшуу. Тэдэнэр hүүлэй жэлнүүдтэ тон олон шан шүүдэг болонхой. Тусхай айлшадаар уригдаhан урдахи конкурсын лауреадууд – Буряадай оперын ба баледэй театрай дуушад Доржсэдэн Батэрдэнэ (бас), Самбуу Батчимиг, дипломант, Москвагай гүрэнэй консерваториин оюутан Содном Даржаа, мэдээжэ дуушад Ешинхорло Гомбоин, Согтын Должин, Оюна Дарижапова, Шэнэхээн нютагай дууша басагад Бадмаханда Намуухан хоёр гэгшэд аялга дуугаараа гала-концерт шэмэглэhэн байна. Лхасаран Лодоновичой тоонто Ага-Хангилда халуун уулзалга, баяр ёhолол боложо, нютагайхидынь гоё концерт-наада, алдарта дуушанда зорюулагдаhан үзэсхэлэн хужарлан хараа юм. «1988 онhоо хойшо үнгэргэгдэдэг дуушадай конкурсдо 601 хүн хабаадаа. Россиин ба дэлхэйн оперно урлалай орьёлдо хүрэhэн олон дуушад анха түрүүн энэ конкурсын лауреадууд болоhон. Эндэhээ эхи абажа, мэдээжэ дуушад болоһон Ольга Жигмитова, Ариун-баатар Ганбаатар, Михаил Пирогов, Аюна Базаргуруева ба бэшэн урган гараhан», - гэжэ Забайкалиин хизаарай буряад соёл хүгжөөлгын түбэй директор Ц.Норполова хэлээ hэн.

 

Дэлгэрэнгыгээр 42-дохи дугаарта.

You have no rights to post comments