Октябриин 31-дэ К.И.Базарсадаевай нэрэмжэтэ Агын хүүгэдэй уран урлалай һургуули соо Агын тойрогой уран зохёолой нэгэдэлэй 70 жэлэй ойдо зорюулагдаһан «Буряад хэлэн: түүхэ ба мүнөө үе» гэһэн регионууд хоорондын эрдэмэй-практическа конференци үнгэрөө.

 

Б.Будаева (баруун гарһаа), Б.Шагдуров, Р.Балдоржиева.

 

Конференцидэ сугларагшад 4 секцидэ ажаллаа. Тодорхойлбол, буряад хэлэнэй ба литературын түүхэ ба хүгжэлтын замууд; гүрэнэй федеральна болбосоролой үндэһэн хэбэй ёһоор сэсэрлигэй ба дунда һургуулиин үхибүүдтэ түрэлхи хэлэ ба литература зааха асуудалнууд ба арга боломжонууд; хэшээлһээ гадуур хүмүүжэлдэ үхибүүдэй сэдьхэл ба оюун ухаа хүгжөөхэ онол арганууд; буряад хэлэнэй хүгжэлтэдэ гэр бүлын ба ниитын нүлөө тухай асуудалнууд харагдаа.

Мүн баһа Ц.Жамцараногой нэрэмжэтэ хизаарай номой сангай ажалтад тойрогой уран зохёолой нэгэдэлэй ойдо «Песня души – лучшая песня на свете» гэһэн үзэсхэлэн эмхидхээ. «Алтан туяа» гэһэн үхибүүдэй номтой танилсуулга, «Уран үгын алтан гуламта» гэһэн литературна салоной ажал, Жамьян Балданжабоной зохёохы зам тухай уран зохёолой гостина эмхидхэгдээ.

 

ТҮРЭЛХИ ХЭЛЭЕЭ ХҮГЖӨӨХЭ ҮҮРГЭТЭЙБДИ

Агын тойрогой Захиргаанай социальна һалбариин хүтэлбэриин дарга Билигма Будаева элидхэхэдээ, гол түлэб, иигэжэ тэмдэглэбэ: «Мүнөө буряад яһатанай түлөөлэгшэдэй гол зорилго хадаа түрэлхи хэлэеэ хамгаалга, хүгжөөлгэ болоно. Юундэб гэхэдэ, дэлхэйн глобализациин боложо байһан үедэ бидэнэй үндэһэн хэлэеэ хамгаалаагүй һаа, удаадахи үеынхиднай хэлэеэ, соёлоо, түүхэеэ алдаха гэжэ мэдэнэбди. «Үндэһэн хэлэгүй арад – арад бэшэ» гэжэ үнинэй хэлэгдэдэг, тиибэшье бодото дээрээ энэмнай аймшагтай үйлэ хэрэг гэжэ хүн ойлгоно гээшэ гү гэһэн асуудал мүнөө табинабди. Үндэһэн хэлэеэ аршалаагүй һаамнай, саашадаа үри һадаһаднай сэгнэхэ баялиггүй, дамжуулха түүхэгүй хүнүүд боложо болохо. Хэзээшье, бидэ Росси гүрэнэй дэбисхэр дээрэ ажаһуугаа сагтаа гүрэнэй хэлэн нүлөөтэй гэжэ мэдэнэбди, теэд мүнөө үедэ бүхы үндэһэн хэлэнүүдэй хүшэр байдалда ороод байхада, бидэ түрэлхи хэлэеэ хүгжөөхэ сагта түрэһэн ехэ үүргэтэй зон гээшэбди. Эрдэм һуралсалай департамент байхадаа, мүнөөшье Агын тойрогой Захиргаанай социальна хүгжэлтын таһаг, Агын социальна һалбариин ажалтадай мэргэжэл дээшэлүүлгын институдай хүдэлмэрилэгшэд гол шухала ажал ябуулна. Жэл бүри һуралсалай түсэбүүдэй шалгалта үнгэрдэг, буряад хэлэ заалгын хэмжээ шалгадаг, багшанарай мэргэжэл дээшэлүүлгэдэ онсо анхарал хандуулагдадаг. 2002 онһоо «Буряад хэлэн: түүхэ ба мүнөө үе» конференци Б-Б.Намсарайн 90 жэлдэ зорюулагдажа эхилээд, заншалта болоһон. Мүнөө 15-дахи конференци боложо байна. 15 жэл соо манай омо- горхол болохо эрдэмтэдтэ, уран зохёолшодто зорюулагдаһан конференцинүүд түрэһэн нютагтань үнгэргэгдѳѳ: Ага-Хангилда - Б.Барадинда, Сагаан-Шулуутайда – Ц-Б.Бадмаевта, Шандалида - Ж.Балданжабондо, Үбэр Аргалида – Ц.Жамбаловта, Догойдо – Д-Р.Батожабайда, Үзөөндэ – Ч-Р.Намжиловта г.м. Энэ ажалнай гүнзэгы удхатай, хүдөө нютагуудта ехэ хүгжэлтэ болоно.

 

Дэлгэрэнгыгээр 45-дахи дугаарта.

You have no rights to post comments