Агын тойрогой Жамьян Балданжабоной нэрэмжэтэ уран зохёолой нэгэдэлэй байгуулагдаһаар 70 жэлэй ойдо зорюулагдаһан хэдэн хэмжээ ябуулга үргэн дэлисэтэйгээр үнгэргэгдэһэн байна. Уран зохёолой нэгэдэлэй ойн баярта иимэ ехэ анхарал хандуулагдаа хадаа тойрог дотор уран зохёол хүгжѳѳлгэдэ нилээд түлхисэ үгтэбэ бэзэ гэжэ найдамаар. Энэ этигэл найдал түрүүлһэн хэдэн баримта дээрэ тогтоё.
Д.Доржиева Ж.Жербаевта шагнал барюулна.
Октябрь һарада «Алтан үлгы - Агамнай» гэһэн шүлэг эхилэн найруулагшадай конкурсдо 86 (!) хүн хабаадаа бшуу, тэдэнэй 38-иинь ородоор, 48-иинь буряадаар зохёоһон байна. Хараһан хүн шүлэгэй мүрнүүдые найруулдаггүй. Минии бодомжоор, яруу найрагша хадаа юртэмсэ дэлхэйе, юрын ажабайдал бэшэнһээл һаа ондоохоноор ойлгодог, юумэн бүхэнэй удха шанар шэнжэлхэ, далда талыень тодолхо шадабаритай, ульгам баян хэлэтэй оюун бэлигтэн байха ёһотой. Хабаадагшад булта иимэ зон байгаашгүй гэел даа, зүгѳѳр бултал зохёохы бэлигтэй, шүлэг найруулха шүлһэтэй зон байгаа.
«Энэ конкурсдо 30-40-һѳѳ олон хүн байхагүй гэжэ бидэ, жюриин гэшүүд, һанаа һэмди, теэд аяар 86 хүн байбал даа. - гээд конкурсын дүнгүүдые татахадаа, жюриин түрүүлэгшэ мэдээжэ поэт, сэтгүүлшэн Батор Шагдаров хэлэнэ һэн.
Эхилэн найруулагшадай шүлэгүүдые нэрэтэй солотой мэргэжэлтэд сэгнээ. Секретариин ажал Б-Б.Намсараевай нэрэмжэтэ Агын аймагай номой сангай директор, уран найруулга хүгжѳѳхэ талаар һүүлэй үедэ эдэбхитэйгээр ажал ябуулжа байһан Дарима Цэдашиева эрхилээ, гэшүүдээрнь мэдээжэ поэдүүд Батожаргал Гармажапов, Дугарма Батоболотова, тойрогой Захиргаанай пресс-секретарь Татьяна Колоколова ажаллаа бшуу. Эдэ зохёохы мэргэжэлтэдэй сэгнэлтэ үнэтэй даа. Юундэб гэхэдэ, эхилэн найруулагшада шүүмжэлэл хэрэгтэй. Дүтын зон – түрэлхид, нүхэд тайзан дээрэхи артист мэтээр, уранаар ямаршье текст уншаа һаа, «ямар гоё шүлэг гээшэб?» гэхэ ха юм. Харин шүлэг гээшэ яагаад найруулагдадаг юм гэжэ тон һайнаар мэдэхэ яруу найрагшад шүлэглэмэл зохёолнуудай, нэн түрүүн, удха шанарыень харана ха юм. Конкурс наһанай гурбан бүлэгтэ – хүүгэдэй, залуушуулай, бүдүүн зоной дунда үнгэргэгдэжэ, бүлэг бүхэнэй илагшад нэрлэгдээ бэлэй. Эхилжэ байһан поэдүүд энэ анха түрүүшынгээ үндэр амжалтаар далижаа байха. Конкурсдо эльгээгдэһэн эрхим шүлэгүүдэй согсолбори хэблэгдэхэ гэжэ соносхогдоо һэн.
Дэлгэрэнгыгээр 47-дохи дугаарта
