Байгша оной октябрь һарада Буряадай гүрэнэй дуу хатарай үндэһэн «Байгал» театр Ага нютагаар гастрольдо ябаа бэлэй. Тиихэдэ «Байгалай» артистнар Даба Дашинорбоев Арсалан Санданов хоёртой уулзажа, нютаг хүбүүдэй ажал хэрэгүүдээрнь һонирхобобди.
А.Санданов ба Д.Дашинорбоев.
- Нэн түрүүн, «Танцуют все!» гэһэн проектдэ туйлаһан илалтаартнай үшөө дахин амаршалнабди. «Байгал» театрай олон артистнар проектдэ хабаадаа һэн гү?
Арсалан Санданов: - Энэ проектдэ хорин гурбан хүн хабаадаабди: директор Дандар Жапович Бадлуев, балетмейстер-репетитор - би, уран һайханай хүтэлбэрилгшэ Жаргал Жалсанович Жалсанов, бэшэмнай - хатаршад.
- Проектын номер бүхэндэ бэлдэлгын хэды шэнээн саг үгтэдэг байгааб?
Арсалан Санданов: - Зургаан үдэрэй туршада шэнэ номер бэлдэдэг байгаабди. Зарим ушарта энэ зургаан үдэр хүрэдэггүй, мэгдэхэ сагууд болодог һэн. Юундэб гэхэдэ, проектын гол эрилтээр стильһээ стильдэ хубилха ёһотой байгаабди. Энээнэй хажуугаар хатарай шэнэ найруулгада таарама хүгжэм шэлэгдэнэ. Хубсаһанай талаар бэлдэлгэдэ баһал саг ошоно. Хүн бүхэндэ тааруулагдана ха юм даа.
- Энэ проектын финалда илахабди гэһэн багаханшье найдал байгаа гү?
Даба Дашинорбоев: - Илахабди гэһэн найдал үгы һэн. Түрүүшын дуугаар нютагаа бусадаггүйл һаа гэһэн һанаан байгаа. Хоёр неделиин турша соо бэшэ хабаадагшадай хэр зэргэ ябахые шүүмжэлээд, түрүүшын гурбан соо орохобди гэжэ найдагдаа һэн. Бэлигтэй, дүй дүршэлтэй бүлэгүүд соо ябахадаа, сэдьхэл соо тэмсэхэ хүсэл түрэнэ.
- Түрүүшын һуури эзэлээд байхада, сэдьхэлдэ ямар бэ?
Даба Дашинорбоев: - Үбэр Байгалай арад зонойнгоо һунгалтаар бидэ илажа гараабди. Хэдышье багахан арад һаа, бидэниие проектын дүүрэтэр дэмжэжэ, үргэжэ байгаа ха юм. Һүүлшэг тээшэ тайзан дээрэ гараха бүри «ара таладамни буряад арадни байна» гэһэн бата этигэл түрэдэг байгаа, тиимэһээ найдамтайгаар дүн хүлеэгээбди. Омогорхолтой.
- Буряад арадай хатар өөрын онсо маягтай. Энэ онсо маягынь жюриин сэгнэлтэдэ нүлөө үзүүлээ гү?
Арсалан Санданов: - Хатарай номер бүхэндэ арадай онсо маяг мэдэрхээр гэжэ олонхи хатар табигшад тэмдэглээ. Тэндэ табигдаһан хатарнууднай арадайнгаа ёһо заншалтай, оршон тойронхи байгаалитай нягта холбоотой байгаа.
Дэлгэрэнгыгээр 47-дохи дугаарта
