Агын Буряадай автономито тойрогой хүндэтэ эрхэтэн, Ажалай Улаан Тугай орденто Цыренжаб Согшигбоевич Соктоевой нэрэ, хэһэн ажалынь арадтаа алдаршанхай, хэзээдэшье мартагдахагүйнь сохом.

...Залуу, үүсхэл ехэтэй Ц.С.Соктоевые комсомолой райкомой 1-дэхи секретаряар зууршалба, тэрэ хаанашье ябахадаа, залуушуултай үгэеэ ойлголсожо ядадаггүй байгаа. Иигэжэ Цыренжаб Согшигбоевич хүтэлбэрилхы замаа залуушуулай дунда эхилһэн байна. Хожомынь “Почётные граждане Агинского Бурятского автономного округа” номдо орохо материал бүридхэжэ, Цыренжаб Согшигбоевичтой уулзахадамнай, “юу хѳѳрэхэбиб даа, ажалайнгаа намтар залуушуулай дунда, комсомолһоо эхилээд, наһатай зоной дунда, ветерануудай зүблэлдэ дүүргээб” гээ бэлэй. Эдэ 48 жэлынь – нилээд ехэ үе. Энэ саг соо гүрэн түрымнай, тойрогой түүхэдэ хэды шэнээн гүнзэгы хубилалтанууд болооб даа?! Цыренжаб Согшигбоевич эдэ бүхы үйлэ хэрэгүүдые хажуу тээһээнь хаража, эдэбхигүй һуугаа бэшэ, хам оролсожо, амар заяагүй сэдьхэлтэй ябаа ха юм.

 

ВЕРХОВНО ЗҮБЛЭЛЭЙ ДЕПУТАТ ЯБАХАДАА...

 Сэтгүүлшэн Дарма Дондоков «Наһанай үлхѳѳнүүд» гэһэн очерк соогоо иимэ баримтануудые үгэһэн: «Ц.С.Соктоев СССР-эй Верховно Зүблэлэй депутат ябахадаа, олон амин шухала хэрэгүүдые бүтээһэн байна. Тусхайлбал:

- СССР-эй дунда шатын машина бүтээлгын министр Е.П.Славскийда гуйлта барижа, Зугаалайда 640 һууритай һургуули;

- РСФСР-эй ойн ажахын министр А.И.Зверевэй аша туһаар Агын лесхоздо С16-4 түхэлэй модо хюрѳѳдэдэг станок ба ЗИЛ-157 түхэлэй автомашина;

- СССР-эй хэлхеэ холбооной министр Н.В.Талызинда хандажа, тойрогой, Оловяннын ба Ононой аймагуудай дэбисхэр дээрэ 2-дохи канал бариха 5 квт теле-дамжуулгын түхеэрэлтэ;

- РСФСР-эй эмнэлгын министр В.В.Трофимовта гуйлтатай орожо, Могойто тосхондо больница ба поликлиникэ;

- Ураалай, Сибириин ба Алас Дурна зүгэй орон нютагуудта барилга хэдэг хүтэлбэриин дарга М.Ф.Линовскийдо хандажа, РСФСР-эй Министрнүүдэй Зүблэлэй түрүүлэгшын орлогшо Н.И.Масленниковай аша туһаар 450 мянган түхэриг мүнгэ һомолуулжа, Агын райгүйсэдкомой байшан;

- «Мир» колхоздо 90 хүүгэдэй ябаха ясли-саад;

- РСФСР-эй хэлхеэ холбооной министр Г.Г.Байцурта гуйлта барижа, Могойтодо 800 номертой электросвязиин байшан, Үзѳѳндэ 90 хүүгэдэй ябаха ясли-саад;

- Ангарскын котёлой заводой директор А.П.Батовта хандажа, туршалгын 5 котёл, Агын аптекын худалдаа-наймаанай заалда ПНР түхеэрэлтэ, УАЗ-469 түхэлэй авто-унаа, нюдэнэй шэл тошииха агрегат;  

- СССР-эй энергетикын ба электрификациин министр П.С.Непорожнийдо гуйлта барихадаа, Баруун-Урдахи электросетьдэ автокран, телескопическа вышкэ, бульдозер, опоровоз;

- Зам харилсаанай министерствэдэ хандажа, Могойто станцида түмэр харгын вокзал, виадук г.м. барюулха асуудалнуудые шиидхэһэн байна.

Тэдээнһээ гадуур хүн зонһоо ороһон һуралсалай, аргалуулха, гэр байрын, автомашинын талаар, врачнуудые ординатурада эльгээхэ г.м. мэдүүлгэнүүдые харааһаа алдадаггүй, саг соонь шиидхэдэг гуримтай байгаа.

Оронойнгоо дээдын парламентда депутадаар хоёрдохёо һунгагдаад, гүрэн түрынгѳѳ хүгжэлтэдэ тон хэрэгтэй хуулинуудые зохёолсожо ябаһан хүн. Үшѳѳшье олон асуудалнуудые шиидхэхэл байгаа. Теэд Ц.С.Соктоевой хуби заяанда эрид хубилалта болоо: 1930-аад онуудта тушаалгаһан эсэгынь хэрэгээр мүрдэлгэ эхилээ. Атаа мэеэ буляалдаһан зарим зон дээшэнь бэшэг эльгээхэдээ, «нюдарган баянай хүбүүнби гэжэ нюугаа» гэһэн гомдол бариһан байна. Үнэн дээрээ 1930-аад онуудта колхозой бригадираар хүдэлһэн эсэгэнь «мал үхүүлбэш» гүүлээд, 58-дахи статьягаар гэмнэгдээ, һүүлдэ эсэгыень, гэр бүлыень сагааруулһан... Цыренжаб Согшигбоевич хэды гомдолтой байбашье, үнэн юумэн үнэн руугаа болохо ёһотой гэһэн найдалтай ябадаг юм...» Иигэжэ үнэн сэхэ, шударгы, хүлеэсэтэй зантай Ц.С.Соктоев ажаһуудалай дардам сэхэшье, болдируутай эгсэшье дабаануудые нэрэ түрэтэйгѳѳр дабажа, элитэ болоһон хүтэлбэрилэгшэдэй нэгэн, эдэбхи ехэтэй гүрэнэй ажаябуулагша болон тодороо. Тэрэнэй бүхы наһан тоонто нютагаа хүндэлэлгын, Эхэ орондоо дуратай байлгын жэшээ мүн.

 

Эхиниинь 48-дахи дугаарта

You have no rights to post comments